“Mən sizə göstəriş vermişdim ki, qəsəbədaxili yollar, Bakıətrafı qəsəbələrin yolları da abadlaşdırılmalıdır”. Bunu Prezident İlham Əliyev oktyabrın 31-də paytaxtın Yasamal rayonunda Şəfayət Mehdiyev küçəsinin Tbilisi prospektindən Landau küçəsinədək olan hissəsində yenidənqurmadan sonra görülən işlərlə tanış olarkən deyib.
Dövlət başçısı bildirib ki, bununla bağlı müvafiq işlər görüləcək: “Siz ilkin təklifləri göndərmisiniz, baxılacaq və müvafiq göstərişlər veriləcək, sərmayə ayrılacaq ki, biz Bakı qəsəbələrində bütün daxili yolları abadlaşdıraq. Torpaq yollar asfaltlanmalıdır. Bakı şəhərində, o cümlədən, onun qəsəbələrində torpaq yol olmamalıdır”.
Əvvəl Kürdəxanı qəsəbəsinin yollarının abadlaşdırıldığını vurğulayan Prezident İlham Əliyev əlavə edib ki, indi digər qəsəbələr növbədədir.
Bakı ətrafında elə qəsəbə və yaşayış massivləri var ki, yolları ucqar dağ kəndlərinin yollarından fərqlənmir. Bu problem ölkə başçısı İlham Əliyevin də diqqətini cəlb etdiyindən, qəsəbədaxili yolların təmir olunması yenidən diqqət mərkəzindədir. Bir müddət əvvəl ölkə başçısı Avtomobil Yolları Dövlət Agentliyinin İdarə Heyətinin sədri Saleh Məmmədovu qəbul edərkən ona xüsusi tapşırıqlar verib. Bu dəfə də Prezident məsələyə xüsusi diqqət ayırdı. Görünən odur ki, sözügedən problemin həlli getdikcə prioritet məsələyə çevrilir.
“Bakıətrafı kənd və qəsəbələrin çoxunda məhəllədaxili yollar bərbad vəziyyətdədir”
Məsələyə münasibət bildirən ekspert Rəsul Cahangirlinin sözlərinə görə, ölkə başçısının bu məsələyə xüsusi diqqət ayırması təqdirəlayiqdir: “Çünki Bakıətrafı kənd və qəsəbələrin yolları yaxşı vəziyyətdə deyil. Bu gün elə Bakıətrafı yaşayış məntəqələri var ki, orada əhalinin sayı 100 min nəfərə yaxındır. Məsələn, Qaraçuxur, Maştağa, Bakıxanov, Binəqədi, Biləcəri qəsəbələrindəki əhalinin sayı 100 min nəfərə yaxınlaşır. Binə qəsəbəsində isə əhalinin sayı 130 min nəfərə çatıb. Bakıətrafı kənd və qəsəbələrin çoxunda məhəllədaxili yollar bərbad vəziyyətdədir. Kosmetik xarakterli müəyyən işlər görülür, iki gündən sonra yollar dağılır. Ya görürsən ki, asfalt örtüyü yaxşı salınmayıb, ya da heç, ümumiyyətlə, yol asfalt deyil. Məhəllədə yaşayanlar öz məhdud imkanları ilə yolları düzəltmək istəyirlər. İritonnajlı avtomobillərin intensiv hərəkəti kənd və qəsəbədaxili yolların daha da bərbad günə düşməsinə gətirib çıxarır. Yağış yağan kimi yolların bir çoxu su altında qalır, palçıq əlindən tərpənmək olmur. Uşaqlar məktəbə gedə bilmirlər. Yay aylarında da toz əlindən tərpənmək olmur. O dərəcədə ciddi problemlər var. Hesab edirəm ki, mərhələli şəkildə bu problemlər həll edilməlidir. Bu zaman yolların keyfiyyətinə xüsusi diqqət yetirilməlidir”.
Vidadi ORDAHALLI
