Bu ilin sonuna kimi Bakıda şəhərdaxili marşrut xətləri üzrə hərəkət edən bütün avtobusların kart sisteminə keçməsi planlaşdırılır. Bu barədə “Trend”ə açıqlamasında Bakı Nəqliyyat Agentliyinin (BNA) Mətbuat xidmətinin rəhbəri Mais Ağayev danışıb.
Onun sözlərinə görə, qurum hazırda bu istiqamətdə işləri davam etdirir: "Hazırda bu istiqamətdə işlər aparılır. Marşrut avtobuslarının hamısı kart sisteminə keçəndən sonra gediş haqlarında da dəyişiklik ola bilər. Yəni çalışacağıq ki, marşrut avtobuslarında gediş haqqı ayrı-ayrı vaxtlarda müxtəlif qiymətlərə olsun. Bu, həm də pik saatlarda sərnişin sıxlığını azaltmaq məqsədi daşıyır. Pik saatlarında gedişhaqqı qiymətləri ayrı ola bilər, adi vaxtlarda başqa. Bunun üçün aylıq ödəmə kartları da ola bilər. Bu proses bəzi ölkələrdə mövcuddur".
M.Ağayev bildirib ki, bu məsələyə bütün marşrutlar kart sisteminə keçəndən sonra baxıla bilər.
Bakı Nəqliyyat Agentliyi (BNA) pik saatlarda paytaxtdaxili sərnişin daşıyan avtobuslarda gediş haqqının fərqli olması ilə bağlı yaranan anlaşmazlığa aydınlıq gətirib. Agentliyin Mətbuat xidmətinin rəhbəri Mais Ağayev agentliyə açıqlamasında bildirib ki, məlumat ictimaiyyət tərəfindən səhv anlaşılıb: "Marşrutlarda kart sisteminə keçid tam başa çatandan sonra gediş haqqının ödənilməsində müəyyən fərqliliklərin ola biləcəyini bildirmişəm. Yəni ortada hələ konkret nəsə yoxdu, sadəcə, bu məsələ fikir olaraq söylənilib.
Bəzi KİV-lər bu açıqlamaya istinad edərək guya marşrut avtobuslarında gediş haqqının artacağı ilə bağlı məlumatlar yayıblar. Qiymət artımı ilə bağlı əsası olmayan bu məsələ insanlar arasında ciddi narahatlığa səbəb olub.
Bildirirəm ki, heç bir qiymət artımından söhbət getmir. Digər yandan, qiymət tənzimlənməsi BNA yox, digər müvafiq qurum tərəfindən həyata keçirilir.
Səslənən fikirlərin izahına gəlincə bildirim ki, məsələn, Türkiyənin İzmir şəhərində səhər 06:00-07:00, axşam 19:00-20:00 arasında ictimai nəqliyyatda tariflər 50 faiz azaldılır. Bu ildən tətbiq edilən bu təcrübənin məqsədi pik saatlarda daha çox insanın məhz ictimai nəqliyyatdan istifadəsinə nail olmaqdır.
Bizim də məqsədimiz insanların ictimai nəqliyyatdan istifadəsini stimullaşdıran bu cür təcrübələrdən istifadə etməkdir. Bir daha qeyd edirəm, qiymətlərin artacağı ilə bağlı səslənən fikirlər yalandır".
