Prezident İlham Əliyev Anar Tağıyevi Yevlax Rayon İcra Hakimiyyətinin başçısı, Elnur Rzayevi isə Xaçmaz Rayon İcra Hakimiyyətinin başçısı vəzifələrinə təyin olunması ilə əlaqədar qəbul edən zaman rayonlardakı Gənclər mərkəzləri və Heydər Əliyev mərkəzlərindəki vəziyyətin qənaətbəxş olmadığını dilə gətirib:
“Rayonların abadlıq-quruculuq işlərinə diqqət yetirilməlidir, mövcud obyektlərin işlək vəziyyətdə olması da çox önəmlidir. Mənə verilən məlumatlara görə, bir neçə rayonda mənim iştirakımla açılmış Gənclər Mərkəzi indi bağlıdır, qapıya qıfıl vurulub və sadəcə olaraq, görüntü naminə fəaliyyət göstərir. Bu, dözülməzdir, buna vəsait xərclənib. Gənclər mərkəzlərində gənclər öz asudə vaxtlarını keçirməlidirlər, orada maraqlı tədbirlər, intellektual oyunlar, vətənpərvərliklə bağlı tədbirlər təşkil olunmalıdır. Bu mərkəzlər tikilir, bir çox hallarda istifadə olunmur. Heydər Əliyev mərkəzləri, demək olar ki, hər bir rayon mərkəzində vardır. Nədir bu mərkəzlərin məqsədi? Odur ki, o mərkəzlərə vətəndaşlar gəlib öz asudə vaxtlarını keçirsinlər, o mərkəzlərdə dərnəklər fəaliyyət göstərməlidir, o mərkəzlərdə sərgilər keçirilməlidir. O mərkəzlər rayonun mədəni həyatının ayrılmaz hissəsi olmalıdır. Ancaq mənə verilən məlumata görə, bəzi hallarda açılışdan sonra yenə də qapıları qıfıllanır və faktiki olaraq bu mərkəzlər işləmir. Siz bu məsələ ilə çox ciddi məşğul olun. Yəni rayonlarda həyat daha da dinamik xarakter almalıdır. Əlbəttə ki, rayonlarla böyük şəhərlər arasında fərq var, hər bir ölkədə. Ancaq biz bu fərqi azaltmalıyıq. Rayon yerində elə şərait yaradılmalıdır ki, oradakı vətəndaşlar elə orada yaşasınlar. İş yerləri olmalıdır. İndi dövlət xətti ilə bu proqram icra olunur, o cümlədən, ödənişli ictimai işlər yaradılıb”.
Göründüyü kimi, ölkə başçısı konkret fakta toxunaraq rayonlarda deyilən istiqamətdə vəziyyətin qənaətbəxş olmadığını dilə gətirib. Belə ciddi nöqsanların aşkar edildiyi rayonların icra başçıları ilə bağlı nə kimi ölçülər götürülməlidir?
Qabil Hüseynli: “Həmin icra başçılarının cəzası yalnız tənbeh yox, həm də cinayət məsuliyyəti olmalıdır”
Sabiq dövlət müşaviri Qabil Hüseynli “Bakı-Xəbər”ə açıqlamasında bildirdi ki, belə hallar hər zaman olub: “Məsələn, Rusiyanın tarixində belə halların olması ilə bağlı kifayət qədər hadisə baş verib. Söhbət yerlərdəki məmurların ölkə başçısına yalan danışmasından gedir. Gördünüz ki, Prezident açıq şəkildə bunu etiraf etdi. Dedi ki, saxta raportlar verirlər, guya vəziyyət əladır. Bunu icra başçısı tək edə bilməz. Çünki Prezidentə raportu təqdim etmək kimi imkanı nadir hallarda ola bilər. Deməli, artıq ölkə rəhbərliyini aldatmaq, yalan məlumatlar verməklə bağlı bir şəbəkə yaradılıb. Belə hal acınacaqlıdır. Dövlət idarəçiliyinə mənfi təsir göstərir. Görürsünüz ki, Prezident artıq real vəziyyəti özü aşkar edir. Hansı üsullarla? Yerində hadisə ilə tanış olub, əhalini dinləməklə, alternativ informasiya vasitəsi olan media ilə. Bu baxımdan da hakimiyyətin bütün qollarının bir-birinə nəzarət formasında işləməsini təmin etməliyik. Gənclər mərkəzlərində olan vəziyyət acınacaqlıdır. Olimpiya komplekslərində də eyni vəziyyətdir. Rayonlarda tikilən Olimpiya komplekslərində məşq etmək üçün elə qiymətlər qoyurlar ki, orada məşqə gedən olmur. Məgər həmin binalar tamaşa olunmaq üçün ərsəyə gətirilib? Bunun məsuliyyətini yalnız icra başçıları daşımır. Həmin binaların balansında olduğu nazirlik və ya hansısa dövlət qurumu da buna nəzarət etməlidir. Ancaq icra hakimiyyətləri real vəziyyəti doğru olaraq rəhbərliyə çatdırmalıdırlar. Biz regionlarda gənclərimizin inkişafına nail olmasaq, onlar zərərli ideologiyaların təsirinə düşəcəklər. Yaxşı olardı ki, rəhbər işçilərin bu cür səhlənkarlığı ilə bağlı Cinayət Məcəlləsinə bir maddə əlavə olunsun, özü də sərt sanksiyalar nəzərdə tutsun. Belə halları bağışlamaq olmaz. Həmin icra başçılarının cəzası yalnız tənbeh yox, həm də cinayət məsuliyyəti olmalıdır”.
Məhəmmədəli QƏRİBLİ
