Son illər ölkəmiz müxtəlif göstəricilər üzrə beynəlxalq təşkilatların tərtib etdiyi hesabatlarda ön sırada qərarlaşır. Bu günlərdə Prezident İlham Əliyev Ağdaş şəhərinin içməli su təchizatı və kanalizasiya sistemlərinin istismara verilməsi ilə bağlı tədbirdə rayon ictimaiyyətinin nümayəndələri ilə görüşən zaman Azərbaycanın iqtisadi gücünün beynəlxalq agentliklərin diqqətində olduğunu dilə gətirib.
Prezident qeyd edib ki, Dünya Bankının, Davos Ümumdünya Forumunun hesabatlarında göstərilir ki, elektrik enerjisinə əlçatanlıq əmsalına görə Azərbaycan dünyada ikinci yerdədir: “Baxın görün, dünyada nə qədər inkişaf etmiş ölkələr var. Onların arasında, bütün dünya ölkələri arasında biz ikinci yerdəyik. Xalqın hökumətə inamına görə indi biz birinci onluqdayıq. Bu nəyi göstərir? Bunu biz demirik, bunu geniş təhlil aparan dünyanın ən mötəbər qurumları deyir və bu da həqiqətdir. Bizim gücümüzün də mənbəyi budur. Çünki xalq-iqtidar birliyi bizim inkişafımızı şərtləndirir və bu dəstək bizə güc verir ki, biz öz sözümüzü deyək, öz mövqeyimizi müdafiə edək”.
“Beynəlxalq maliyyə qurumları, reytinq agentlikləri ölkəmizdə biznes şəraitinin inkişaf etdirilməsi ilə bağlı göstəriciləri qiymətləndirərkən…”
Elektrik enerjisinə əlçatanlıq əmsalına görə ölkəmizin ikinci yerdə olmasına münasibət bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, ölkədə sahibkarlığın inkişaf etməsi üçün dövlət tərəfindən hər bir şərait yaradılıb. Sahibkarlığın inkişafı üçün müvafiq şərait yaradılmaqda davam edir: “Yeni müəssisələr, sosial obyektlər açılarkən onlar elektrik mühərrikinə sərbəst şəkildə qoşulurlar. Eyni zamanda, kommunal xidmətlərdən istifadənin yüngülləşdirilməsi üçün prosedurlar sadələşdirilib. Sahibkarlar çox vaxt sərf etmədən elektrik enerjisindən sərbəst şəkildə istifadə edə bilirlər. Sahibkarlar qısa müddət ərzində müəssisələrini elektrik enerjisi ilə təmin edə bilirlər. Bu da beynəlxalq maliyyə qurumlarının, reytinq agentliklərinin diqqətini cəlb edir. Onlar hər zaman ölkəmizdə biznes şəraitinin inkişaf etdirilməsi ilə bağlı göstəriciləri qiymətləndirərkən sahibkarların sərbəst şəkildə elektrik enerjisinə qoşulmasını, bir sözlə, onlar üçün yaradılan şəraiti nəzərə alırlar”.
Günel CƏLİLOVA
