Bakıdakı əksər iri ərzaq mağazasında, eləcə də bütün bazarlarda müxtəlif şirkətlərə məxsus ağartı məhsulları satılır. Əsasən də “İvanovka”, “Slavyanka”, “Şamaxı” və “Qəbələ” adı altında müxtəlif qatqılı ağartı məhsulları satışa çıxarılır. Bu günlərdə Azərbaycan Qida Təhlükəsizliyi Agentliyi (AQTA) ağartı məhsulları ilə bağlı marketlərdə monitorinq keçirib.
AQTA tərəfindən Binəqədi rayonunda fəaliyyət göstərən fiziki şəxs Muradov Elxan Mürşüd oğluna məxsus süd məhsulları istehsalı sexində aparılan yoxlama zamanı texniki normativ hüquqi aktların tələblərinin pozulması faktları aşkar edilib. Belə ki, “İvanovka”, “Slavyanka”, “Şamaxı” və “Qəbələ” adı altında müxtəlif qatqılı ağartı məhsullarının tərkibində insan həyatına təhlükə yaradan konservantların olduğu aşkar olunub.
Məhsulun markalanmasında “İvanovka” coğrafi adından istifadə etməklə istehlakçıların aldadılması və hüquqlarının pozulması faktı üzə çıxıb. Emal prosesində qəbul edilən xammal və yarımfabrikatların təhlükəsizlik və keyfiyyət göstəricilərinin yoxlanılmadığı müəyyən olunub.
Məlumdur ki, Bakıdakı əksər iri ərzaq mağazasında, eləcə də bütün bazarlarda “İvanovka məhsulları” adı altında şıdırğı satış həyata keçirilir. “İvanovka mallarıı” kimi təqdim edilən yağ, pendir, xama, qaymaq, süd, qatıq və sair ağartı məhsullarına alıcıların müsbət yanaşdığı heç kimə sirr deyil. Böyük əksəriyyət bu qidaların İsmayıllı rayonunun malakanlar yaşayan məşhur İvanovka kəndindən gətirildiyini düşünərək, onları keyfiyyətli və qatqısız ağartı məhsulları kimi almağa tərəddüd etmir. Amma, əslində, heç xəbərimiz də yoxdur ki, “İvanovka” brendi altında süfrələrimizi bəzəyən bu məhsullar saxtadır. Axı İvanovkadakı Nikitin adına balaca bir kolxoz hər gün min tonlarla ağartı məhsullarını necə istehsal edə bilir ki, Bakı və digər şəhərlərdə, hətta rayonlarda belə, bütün ticarət obyektlərinə çatdırsın?
Qeyd edək ki, bu gün bazar və dükanlarda “İvanovka şoru”, “Şamaxı şoru”, “Slavyanka şoru”, “Qəbələ şoru” markası ilə satılan məhsullara rast gəlirik. Eynilə bu adlarda qaymaq və digər ağartı məhsulları da var. Danılmaz faktdır ki, mağazalarda bu cür qidalar kifayət qədərdir. Qiymətləri isə fərqli olur.
“Uzun müddətdir bir sıra gizli sexlərdə quru süddən, mənşəyi məlum olmayan südlərdən “İvanovka” mal nişanı adı altında ağartı məhsulları istehsal olunur”
Məsələ ilə bağlı fikir bildirən Azad İstehlakçılar Birliyinin (AİB) sədri Eyyub Hüseynov bildirdi ki, uzun müddətdir bir sıra gizli sexlərdə quru süddən, mənşəyi məlum olmayan südlərdən “İvanovka” mal nişanı adı altında ağartı məhsulları istehsal olunur: “Uzun ömür İvanovka” və “Qafqaz İvanovka” MMC də Bakı ətrafında antisanitar şəraitdə mal istehsal edirlər. Həm “Uzun Ömür İvanovka”, həm də “Qafqaz İvanovka”nın sahibkarları ilə görüşmüşəm. Bu pis əməllərindən əl çəkmələri barədə ağsaqqal söhbəti aparmışam. Lakin onlar buna məhəl qoymayıblar. Bu məhsulları alarkən diqqətli olmaq lazımdır. Ən əsası, “İvanovka” adı ilə istehsal olunan malların hansının təmiz olduğu ictimaiyyət üçün aydınlaşdırılmalıdır. Əks halda, Elxan Muradov kimi adamlar Binəqədidəki sexlərdə əhalinin orqanizminə ziyanlı olan maddələrdən hazırlanmış şor satmağa davam edəcəklər”
Günel CƏLİLOVA
