Hazırda dünyada, o cümlədən, ölkəmizdə çalışan qadınların sayı getdikcə artmaqdadır. Dünya statistikasına nəzər salsaq, qadın məşğulluğunun ən yüksək olduğu ölkə hər yüz qadından 71-nin çalışdığı Danimarkadır. Növbəti sırada 70 faizlə İsveç, 66 faizlə Hollandiya, 65 faizlə Finlandiya, 62 faizlə İngiltərədir. Onların çalışma faizinin aşağı olduğu ölkələrdən biri 24 faizlə Türkiyədir.
Qadınların çalışma səbəblərinə gəldikdə, ilk olaraq, ailəyə əlavə gəlirin daxil olmasını göstərmək olar. Araşdırmalara görə, son 20-30 ildə xüsusilə inkişaf etmiş ölkələrdə qadınların işə cəlb olunmasında artım olub. Açıqlanan statistik rəqəmlərə əsasən, məşğulluq xidməti orqanları tərəfindən ölkə üzrə rəsmi işsiz statusu verilmiş şəxslərin sayı 29,1 min nəfər olub, onların 39,2 faizini qadınlar təşkil edib.
Sevindirici haldır ki, ölkəmizdə də əmək fəaliyyət ilə məşğul olan qadınların sayı artır. Azərbaycan qadınları bu gün dövlət quruculuğunda, ölkənin ictimai-siyasi həyatında fəal iştirak edir və bütün sahələrin inkişafına layiqli töhfələrini verirlər. Demək olar ki, respublikanın bütün sahələrində qadınlarımız təmsil olunurlar. Elə bir sahə yoxdur ki, orada Azərbaycan qadınının səsi eşidilməsin, onun fəaliyyəti şaxələnməsin. Azərbaycan qadını həm həkim, həm müəllim, həm memar, həm dövlət qulluqçusu, həm də ictimai-siyasi xadimdir. Bu və ya digər amilləri özündə cəmləşdirən qadınlarımızın nüfuzu günü-gündən artmaqdadır.
Bununla yanaşı, qadınlarımız toxuculuq, xalçaçılıq və digər sahələrə də maraq göstərirlər. Tarixən Azərbaycan qadınlarının hazırladığı xalçalar tək ölkəmizdə deyil, eyni zamanda, xarici ölkələrdə yaşayanların da diqqətini cəlb edib.
Məlumdur ki, ölkəmizdə xalçaçılıq inkişaf dövrünü yaşayır. Prezident İlham Əliyevin göstərişinə əsasən, bölgələrdə xalçaçılıq müəssisələri yaradılaraq əhalinin ixtiyarına verilir.
Bu günlərdə “Azərxalça” ASC-nin Qəbələ filialı açılıb. Açılış mərasimində iştirak edən Azərbaycan Prezidenti İlham Əliyev müəssisənin qadın kollektivinə tövsiyələr verib, qadınlara uğurlar arzulayıb: “Arzu edirəm ki, bu müəssisədə yaxşı işləyəsiniz. Həm ailə büdcəsinə töhfə verəsiniz, həm də ərlərdən bir qədər az asılı olasınız. Və burada gözəl sənətimizi yaşadasınız”.
Dövlət başçısının qadınlara əmək fəaliyyəti ilə məşğul olmaq və həyat yoldaşlarına maddi baxımdan yardımçı olmaq tövsiyəsi ölkənin ictimai-siyasi xadimləri tərəfindən yüksək dəyərləndirilir.
“Prezident İlham Əliyevin həyata keçirdiyi islahatlar nəticəsində Azərbaycan qadını digər ölkələrə iş dalınca gedən ərinin nə vaxt evə pul göndərəcəyini gözləmir”
“Vəfa” Sosial Problemlərin Həllinə Dəstək İctimai Birliyinin sədri Fatimə Hacıbəyli bildirdi ki, ölkənin sosial-iqtisadi həyatının elə bir sahəsi yoxdur ki, orada qadınlar fəal iştirak etməsinlər. Bu gün Azərbaycan qadınları tək rəhbər vəzifədə deyil, eyni zamanda, qeyri-neft sektorunun müxtəlif sahələrində çalışmağa maraq göstərirlər: “Son illər Prezident İlham Əliyevin həyata keçirdiyi islahatlar, o cümlədən, unudulmuş ənənəvi kənd təsərrüfatı sahələrinin bərpa edilməsi, keçmiş şöhrətinin qaytarılması böyük əhəmiyyət daşıyır. Bu gün ailənin başçısı da, xanımı da öz evindədir və hər ikisinin iş yeri var. Başqa sözlə desək, Azərbaycan qadını digər ölkələrə iş dalınca gedən ərinin nə vaxt evə pul göndərəcəyini gözləmir, yaxud özü də həyat yoldaşı ilə Rusiyaya, Ukraynaya, Qazaxıstana, Türkiyəyə getmək məcburiyyətində qalmır. Bu gün kəndli qızlar şəhərə gəlib özlərinə iş axtarmaq fikrinə düşmürlər. Torpağa bağlı olan, bağ-bostan becərən kənd qadını dolanmaq üçün çıxış yolunu qutab bişirib satmaqda, xırdavat alveri etməkdə görmür. Pambıq tarlası, üzüm bağı, tütün plantasiyası yenidən əmək meydanına, çörək təknəsinə çevrilib. Məhz bu səbəbdən də dövlət başçısı bölgələrdə olarkən qadınlar onlar üçün belə bir şəraitin yaradıldığına görə məmnunluqlarını bildirir, minnətdarlıqlarını söyləyirlər”.
Birlik sədrinin sözlərinə görə, xalçaçılıq bizim milli sənətimizdir, milli sərvətimizdir. Azərbaycan xalqı bu sənəti əsrlər boyu yaşadıb. Bizim xalçalarımız dünyanın aparıcı muzeylərində sərgilənir. Xalçaçılığın ölkə sənayesində əhəmiyyətli yer alması qadınların işləməsi üçün yeni imkanlar yaradıb: “Məlumdur ki, "Azərxalça” ASC-nin istifadəyə verilən filiallarında yüzlərlə qadın işlə təmin olunub. Onlar toxuduqları xalçalarla həm qədim el sənətini yaşadır, həm öz dolanışıqlarını təmin edir, həm də Azərbaycan məhsulunun ixrac potensialını artırırlar.
Prezident “Azərxalça” ASC-nin Qəbələ filialının açılışında iştirak edərkən qadınların çalışmasının ilk növbədə onların özü üçün əhəmiyyətli olmasını dilə gətirib. Qadınlar istənilən sahədə çalışarkən həm ailə büdcəsinə dəstək olur, həm də hansısa sənəti öyrənib, onu yaşadırlar”.
Günel CƏLİLOVA
