Oktyabrın 28-də Qəbələ rayonunun Böyük Əmili-Bılıx-Əmirvan avtomobil yolunun yenidənqurmadan sonra açılışı olub. Prezident İlham Əliyev avtomobil yolunun açılışında iştirak edib. Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov bildirib ki, Böyük Əmili-Bılıx-Əmirvan avtomobil yolu 10 min nəfər əhalinin yaşadığı 11 yaşayış məntəqəsini birləşdirir. Uzunluğu 19 kilometr olan yol dördüncü texniki dərəcəlidir. İki hərəkət zolaqlı yol üzərində xeyli yol nişanı və göstərici lövhə, siqnal dirəkləri və 8 avtodayanacaq quraşdırılıb.
Avtomobil yolunun 10-cu kilometrliyində Qaraçay çayı üzərində dördaşırımlı yeni körpü tikilib, Zalamçay çayı üzərində isə ikiaşırımlı körpü təmir edilib. Bu yolun inşası əhalinin mənzil başına tez və rahat çatmasına, həmçinin, kənd təsərrüfatı məhsullarının vaxtında bazarlara və digər satış məntəqələrinə çatdırılmasına şərait yaradacaq.
Prezident İlham Əliyevə rayonun Nic-Mıxlıqovaq-Yemişanlı-Uludaş-Tikanlı-Abrıx avtomobil yolunun tikintisi barədə də məlumat verilib. Qeyd olunub ki, 11 min əhalinin yaşadığı və 8 yaşayış məntəqəsini birləşdirən yolun uzunluğu 18 kilometrdir.
Prezident İlham Əliyev Şamaxı-İsmayıllı yolunun yenidən qurulması barədə göstəriş verərək deyib: “Mən indi Bakı-Şamaxı yolu ilə gəlmişəm. Bu yol yaxşıdır. Vaxtilə göstəriş vermişdim ki, yol dörd zolağa genişləndirilsin, demək olar başa çatıb. Amma Şamaxı-İsmayıllı yolu bərbad vəziyyətdədir. Belə bir yolla biz barışa bilmərik. Niyə məlumat vermirsiniz bu haqda? Biz indi kənd yollarını magistral yollar səviyyəsində inşa edirik. Amma şəhərlərarası, xüsusilə turizm zonasına gedən yol belə bərbad vəziyyətdə qala bilməz. Təkliflər verin ki, biz Şamaxı-İsmayıllı yolunu investisiya proqramına salaq. Gələn il gərək Şamaxı-İsmayıllı yolu istifadəyə verilsin, özü də yüksək səviyyədə”.
Göründüyü kimi, Prezident yenə də məmurların ciddi nöqsanını aşkar edib. Məlum olub ki, Azərbaycanın iki rayonunu və ən əsası da turistik zonasını birləşdirən Şamaxı-İsmayıllı yolu çox bərbad vəziyyətdədir. Ölkə başçısı yerində bu halla tanış olmasaydı, nə baş verəcəkdi? Proses belə də davam edəcəkdi? İlham Əliyevin iradından məlum oldu ki, o, yolun real vəziyyəti barədə məlumatsız olub. Bir daha ortaya çıxır ki, məmurlar lazımi informasiyanı dövlət başçısına zamanında çatdırmırlar. Bəzən elə hallar olur ki, ölkə başçısının məmurların qarşısına qoyduğu tapşırıqlar zamanında yerinə yetirilmir. Ölkə başçısının zəngin qrafiki var. Hər bir xırda detalla maraqlanmağa onun zamanı yetmir. Məmurların yol verdikləri bu cür nöqsanlar daha hansı fəsadlara səbəb ola bilər və məmurların bu istiqamətdə məsuliyyətlərini artırmaq üçün nələr edilməlidir?
“İnşallah, aparılan islahatların fonunda biz məmurlarda bu keyfiyyətlərin də inkişaf etdiyini görəcəyik”
“Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, bizim Prezidentimiz hər zaman xalqın gələcəyini nəzərə alan addımlar atır: “Çörçilin belə bir sözü var: “siyasətçilər gələcək seçkilərdə nəticə əldə etmək üçün çalışırlar, ancaq dövlət xadimləri xalqın gələcəyini firavan etməyə çalışırlar. Məhz bunu əsas gətirərək, qeyd edirəm ki, bizim Prezidentimiz xalqın gələcəyini nəzərə alan addımlar atır. Bizm Prezident dünya liderləri arasında çox nadir olan keyfiyyətə malikdir. O, xalqa tam açıqdır. Cənab İlham Əliyev ən ucqar rayonlarda ictimaiyyət nümayəndələri ilə görüşür, onların problemlərini dinləyir. Həmçinin, bölgələrimiz üçün zəruri olan infrastruktur layihələrinin təməlinin qoyulması və açılışında iştirak edir. Məhz buna görə də xalq onu lider kimi qəbul edir. Cənab Prezidentin əldə etdiyi bu nailiyyət həm də xalqla hakimiyyətin birliyini möhkəmləndirir. Tam məsuliyyəti ilə demək olar ki, bizim məmurlar bu xüsusiyyətlərə görə cənab Prezidenti qabaqlaya bilmirlər. Çox təəssüflər olsun ki, bizim məmurların çoxunda yaradıcılıq, təşəbbüskarlıq imkanları məhduddur. Əksinə, onlar sırf icraçılıq funksiyasını yerinə yetirirlər. Bu da ümumi inkişafa töhfə vermir. Hansısa bir rayonda yol infrastrukturunun mühüm hissəsi yaddan çıxaraq təmirsiz qalıbsa, bu yalnız yol təsərrüfatına cavabdeh olan məmurun günahı deyil. Burada yerli icra hakimiyyətlərinin, turizmə cavabdeh olan qurumların da təqsiri var. Birbaşa aidiyyətləri olmasa da, dolayı yolla öz təkliflərini irəli sürə bilərdilər”.
Rasim Quliyevin sözlərinə görə, cənab Prezidentin bu iradından bütün məmurlar pay götürməlidir: “Yalnız icraçılıqla iş bitmir. Elə detallar var ki, ölkə rəhbərliyinin gözündən yayına bilər. Bunları da məmurlar deməli, təşəbbüslə çıxış etməlidirlər. Məmurlar bu çevikliklə ayaqlaşmağa çalışmalıdırlar. İnşallah, aparılan islahatların fonunda biz məmurlarda bu keyfiyyətlərin də inkişaf etdiyini görəcəyik”.
Məhəmmədəli QƏRİBLİ
