Xəbər verildiyi kimi, gələn il yanvarın 1-dən şənliklərdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik və digər oxşar fəaliyyətlə, o cümlədən, foto, audio-video sahəsində məşğul olan şəxslərin və iaşə obyektlərinin müştərilərinə xidmət göstərən fiziki şəxslərin (ofisiantın) fəaliyyətə başlayanadək “Sadələşdirilmiş vergi üzrə sabit məbləğin ödənilməsi haqqında qəbz” əldə edilmədən işlərin yerinə yetirilməsinə cəlb edilməsinə görə cərimələr tətbiq ediləcək. Bu, Vergi Məcəlləsinə təklif edilən dəyişikliklərdə əksini tapıb.
Bu şəxsləri “Sadələşdirilmiş vergi üzrə sabit məbləğin ödənilməsi haqqında qəbz” əldə edilmədən işlərin yerinə yetirilməsinə cəlb edən işəgötürənə (vergi orqanında uçotda olan sifarişçiyə) hər bir belə şəxs üzrə təqvim ili ərzində bu hala birinci dəfə yol verdikdə 2000 manat, ikinci dəfə yol verdikdə 4000 manat, üç və daha çox dəfə yol verdikdə 6000 manat məbləğində maliyyə sanksiyası tətbiq ediləcək.
Onu da qeyd edək ki, şadlıq sarayında hər hansı bir işçinin bu sənədi olmadan çalışdığı müəyyən olunarsa, bu zaman məsuliyyəti həmin şadlıq sarayının rəhbərliyi daşıyır və buna görə o cərimə oluna bilər.
Şadlıq sarayında çalışan işçilər fəaliyyətə başlayanadək sadələşdirilmiş vergi üzrə sabit məbləğin ödənilməsi haqqında qəbz əldə etməlidirlər.
Ekspertlərin sözlərinə görə, yeni qaydanın tətbiqi bəzi şəxslərin vergidən yayınmasının qarşısını alacaq. Vergi ödənilmirsə, cəzalandırma olmalıdır. Vergilər Məcəlləsinə edilən dəyişikliklərə əsasən, vergini ödəməyənlər və fəaliyyətini gizlədənlər qanun qarşısında məsuliyyət daşıyacaqlar.
“…həmin dövriyyənin vergiyə cəlb edilməsi ilə bağlı bəzi çətinliklər var”
İqtisadçı-ekspert Vüqar Bayramov bildirdi ki, Konstitusiyaya uyğun olaraq, hər bir vətəndaş dövlət qarşısında öhdəsinə düşən vergini ödəməlidir. Onun sözlərinə görə, şadlıq sarayları xidmət göstərən zaman öncədən qeydiyyatdan keçməlidirlər. Qeydiyyatdan keçdikdən sonra sadələşmiş vergi üzrə qəbzə malik olmalıdırlar: “Əvvəlki dövrlərdə, sadəcə, qeydiyyatdan keçməklə, yəni VÖEN-ə sahib olmaqla xidmət göstərmək mümkün idi. Daha sonra isə xidmətə görə dövriyyə elan olunurdu və dövriyyə elan olunduqdan sonra vergi hesablanırdı”.
İqtisadçının sözlərinə görə, şadlıq sarayları sahəsində vergi dövriyyəsi kifayət qədər böyükdür. Amma həmin dövriyyənin vergiyə cəlb edilməsi ilə bağlı bəzi çətinliklər var. Yalnız o şəxslər sözügedən xidmətləri göstərə biləcək ki, onların məhz həmin qəbzi olsun”.
Günel CƏLİLOVA
