Bu gün holland pendiri dünya bazarında kütləvi istehlakçı marağı cəlb edən məhsullardan biridir. İstehlak bazarında ən çox alıcısı olan holland pendirlərinin müxtəlif çeşidlərindən istifadə edən insanlar minlərlədir.
Rusiya bazarında da geniş yayılan və istehlakçıların daim istifadə etdikləri holland pendir növlərində insan sağlamlığına zərər vuran təhlükəli viruslar aşkarlanıb. “Roskontrol" Ümumrusiya İstehlakçılar Birliyinin ekspert mərkəzinin həyata keçirdiyi monitorinqlər zamanı məşhur holland pendirinin tərkibi araşdırılıb və bu məhsulda təhlükəli bakteriya olduğu aşkarlanıb. Rusiya mətbuatının yazdığına görə, ümumilikdə, mütəxəssislər altı çeşiddə pendiri sınaqdan keçiriblər. “Qırmızı Qiymət”, “VkusVill”, “Izbenka”, “Birinci iş”, “Sıroboqatov”, “Hər gün” “Valio və digər pendir markalarında virus tapılıb. Artıq sözügedən pendir markaları Rusiyada “qara siyahı”ya daxil edilib.
Bu gün Azərbaycan bazarında da müxtəlif çeşid və markalar adı altında holland pendiri satılır. Azərbaycan bazarında satılan holland pendir növlərində insan sağlamlığı üçün zərərli olan bakteriyalar ola bilərmi? Ümumiyyətlə, bu kimi məhsulların monitorinqi keçirilirmi?
“...bu tam mümkündür”
Azad İstehlakçılar Birliyinin sədri Eyyub Hüseynov bizimlə söhbətində bildirdi ki, Azərbaycan bazarlarında satılan holland pendir çeşidlərində də təhlükəli virusların olması istisna edilmir, sadəcə, bu istiqamətdə monitorinqlər aparılmadığı üçün, əlimizdə hər hansı bir fakt yoxdur: “İlyarımdan çoxdur ki, cənab Prezident istehlak bazarına nəzarət edən Dövlət Agentliyinin yaradılması ilə bağlı fərman imzalayıb. Təəssüflər olsun ki, indiyə qədər Prezident fərmanı icra olunmayıb və Nazirlər Kabineti bu agentliyi yaratmağa tələsmir. Qida Təhlükəsizliyi Agentliyi malların, məhsulların təhlükəsizliyini yoxlayır. İstehlak bazarlarına daxil olan məhsulların tərkibini, keyfiyyətini isə yeni yaradılması nəzərdə tutulan Dövlət Agentliyi həyata keçirməlidir. O agentliyin də əvəzində indiyə qədər Antiinhisar Siyasəti və İstehlakçıların Hüquqlarının Müdafiəsi Dövlət Xidməti fəaliyyət göstərib. Qanuni əsası olmadan bu xidmət indi də fəaliyyət göstərir. Lakin heç bir iş görmür, araşdırma aparmırlar, onların normal bir işi göz önündə deyil. Ona görə də bazarda yoxlamaların tam məhdudlaşdırılması, eyni zamanda, biznes qurumlar üçün yaradılan kifayət qədər rahat şərait biznes qurumlarının istehlakçıların hüquqlarını pozmasına gətirib çıxarır. İstisna edilmir ki, Rusiyada aşkarlanan həmin məhsullardan Azərbaycanda da ola bilər. Lakin bu o demək deyil ki, holland pendirlərinin hamısı təhlükəlidir. Gətirilən məhsulun bir qismi təhlükəli və keyfiyyətsiz ola bilər. Bu gün ciddi yoxlama aparılmalıdır ki, tərkibində təhlükəli bakteriya aşkarlanan həmin pendir növlərindən bizim bazarda var, yoxsa yox? Əlbəttə, o pendir növləri bizim bazara da gəlib çıxa bilər, bu tam mümkündür”.
İradə SARIYEVA
