Azərbaycan çoxmillətli, çoxmədəniyyətli bir dövlət olaraq dünyaya bir örnəkdir. Ölkəmizdə mövcud olan multikulturalizm, tolerantlıq mühiti dünyanın ən sivil ölkələrinə belə nümunə olmaq əzmindədir. Bu gün Azərbaycan milli və dini birgəyaşayışın ən sivil formasını bütün dünyaya göstərir.
Ölkəmizdə mövcud olan multikulturalizm bir fənn kimi ali məktəblərdə tədris edilir. Əvvəlki dövrlərdə multikulturalizm ali məktəblərdə fakültativ fənn kimi tədris edilirdisə, artıq həm bakalavr, həm magistr pilləsində multikulturalizm müstəqil və aparıcı fənn kimi tədris edilir. Bu gün ölkəmizin ali məktəblərində, eləcə də dünyanın bir neçə ali məktəbində açılmış azərbaycanşünaslıq bölmələrində Azərbaycan multikulturalizmi tədris edilir, tələbələrə öyrədilir.
Bir ay yarımdır ki, ölkəmizdə orta və ali məktəblərdə dərslər başlayıb. Qeyd edilənə görə, ali məktəblərdə bəzi fənlər, o cümlədən də multikulturalizm fənni üzrə dəsrliklər nəşr edilmir. Tələbələr bu fənn haqqında məlumatı internet resurslarından, bir də fənn müəllimlərinin mühazirələrindən əldə edirlər. Bir çox ali məktəb tələbəsi ilə söhbətimiz zamanı onlar bildirdilər ki, multikulturalizm haqqında məlumat almaq üçün əsasən elektron vəsaitlərdən, ayrı-ayrı alimlərin məqalələrindən istifadə edirlər.
Multikulturalizmin beşiyi olan və bütün dünyada multikulturalizm örnəyinin yüksək səviyyədə inkişaf etdiyi ölkə kimi tanınan Azərbaycanda bu sahədə dərslik niyə yoxdur? Azərbaycan ali məktəblərində tədris edilən multikulturalizm ixtisası, fənni üzrə dərs kitabları hansı səbəbdən nəşr edilmir?
“Tələbələrin narazılığının əsası yoxdur, onların bu dərsliklərdən istifadə etməsi üçün hər cür şərait yaradılıb”
Bakı Beynəlxalq Multikulturalizm Mərkəzinin İnformasiya təminatı və sənədlərlə iş şöbəsinin müdiri Yadigar Məmmədli “Bakı-Xəbər”ə bildirdi ki, tələbələrin dedikləri həqiqəti əks etdirmir. 2019-2020-ci tədris ilində ilk dəfə olaraq mərkəz tərəfindən bu sahə üzrə dərsliklər çap olunub. Onun dediyinə görə, həmin dərsliklər Prezident İlham Əliyevin göstərişinə uyğun olaraq, Təhsil Nazirliyinin əmrilə bütün ali məktəblərdə tədris edilir. “Multikulturalizmlə bağlı dərsliklər bu il nəşr edilib və biz həmin dərslikləri bütün ali məktəblərə vermişik. Bizim bu sahədə iki dərsliyimiz var - “Azərbaycan multikulturalizmi” və “Multikulturalizmə giriş”. “Azərbaycan multikulturalizmi” keçən il nəşr edilib və iki xarici dilə tərcümə edilib. Bu dərslik xaricdə də tədris edilir. Bu dərslik üç dildə artıq mövcuddur. “Azərbaycan multikulturalizmi” magistratura, “Multikulturalizmə giriş” isə bakalavr pilləsində tədris olunur. Biz bu dərsliyin hər birindən ali məktəblərə 20-30 ədəd vermişik. Bu fənn 4 ildir tədris olunur, əvvəllər bu, fakültativ, seçmə fənn kimi keçilirdi. Bu il isə cənab Prezidentin göstərişi ilə Təhsil Nazirliyi əmr verib və bütün daxili ali məktəblərdə əsas fənn olaraq tədris edilir”.
Bu dərsliklərin tələbələr üçün əlçatan olmamasına və onları tam olaraq əhatə etməməsinə gəlincə, Y.Məmmədli qeyd etdi ki, nəşr edilən dərsliklər sayla bütün ali məktəblər arasında bölünüb və bu dərsliklər universitetlərin kitabxanalarındadır. O, həmçinin, bildirdi ki, sözügedən dərsliklərin PDF variantı da qurumun saytında yerləşdirilib, yəni tələbələr o saytdan da kitabın PDF variantını əldə edə bilərlər. Onun sözlərinə görə, bu dərsliklər, ümumiyyətlə, satışda yoxdur: “Tələbələrin narazılığının əsası yoxdur, onların bu dərsliklərdən istifadə etməsi üçün hər cür şərait yaradılıb. Biz bu dərsliyi satışa buraxmamışıq, onu öz layihəmiz əsasında hazırlamışıq. Kitabların müəllifləri bu sahəni tədqiq edən peşəkarlardır. Çox mükəmməl dərslik hazırlamışıq. Biz bu dərslikləri öz təşəbbüsümüzlə bütün ali məktəblərə göndərmişik”.
İradə SARIYEVA
