21/11/2019 00:24
728 x 90

Müasir informasiya texnologiyalarına yaxın bələdçilik polis kadrlara hansı üstünlükləri təmin edir - nazirin tövsiyəsinə ekspert şərhi...

Mehman Muradlı: “Hazırda bütün transmilli cinayətkar qruplar öz fəaliyyətlərini internet üzərindən aparır”

img

Oktyabrın 22-də Daxili İşlər Nazirliyində bu il Polis Akademiyasını bitirmiş, sıravi və kiçik rəis heyəti vəzifələrində xidmət edən əməkdaşların paytaxtın polis orqanlarında vakant olan zabit yerlərinə təyin edilmələrinə həsr olunmuş tədbir keçirilib.

Daxili işlər naziri, general-polkovnik Vilayət Eyvazov təyinatın şəffaflıq, aşkarlıq və ədalət prinsipləri əsasında gerçəkləşdiyini xatırladıb və son illər bu praktikadan geniş istifadə olunduğunu bildirib. Nazir qeyd edib ki, Azərbaycan Respublikasının Prezidenti İlham Əliyev ölkəmizin gələcəyinin yüksək intellektə, geniş dünyagörüşünə, dərin biliyə və işgüzarlığa malik, mükəmməl təhsil almış, dövlətçiliyə sadiq, vətənpərvər gənclərdən asılı olduğunu dəfələrlə vurğulayıb. O deyib ki, ümumilikdə, kadrların hazırlıq səviyyəsinin artırılması, onların peşəkarlığa, xidməti borca sədaqətə görə vəzifədə irəli çəkilmələri, gənc əməkdaşlara lazımi diqqət və qayğı göstərilməsi ölkə və DİN rəhbərliyinin fəaliyyətində prioritet istiqamətlərdəndir. Tədbirə yekun vuran Daxili işlər naziri gənc zabitləri təbrik edərək onlara tapşırıq və tövsiyələrini verib. Qeyd olunub ki, bu gün uğurla davam etdirilən cinayətkarlıqla qətiyyətli mübarizə, ölkəmizdə sabitliyin təmini, insan və vətəndaş hüquq və azadlıqlarının nümunəvi qorunması kursu daxili işlər orqanlarının da üzərinə böyük və məsul vəzifələr qoyur.

Vilayət Eyvazov gənc zabitlərə çətin və şərəfli xidmətlərində uğurlar arzulayıb, polis adını uca tutmalarını, daim bilik və təcrübələrini artırmalarını, öz üzərlərində işləmələrini, ən müasir informasiya texnologiyalarına yiyələnmələrini, vətəndaşların müraciətlərinə həssaslıqla və operativ şəkildə yanaşmalarını, fəaliyyətlərində peşəkar həmkarlarının təcrübəsindən yararlanmalarını tövsiyə edib.

Göründüyü kimi, nazir gənc zabitlərə xüsusi olaraq ən müasir informasiya texnologiyalarına yiyələnmələrini  və ondan istifadəni tapşırıb. Müasir informasiya texnologiyalarına bələdçilik polislərə xidmətdə hansı üstünlükləri qazandırır?

  • “İstər asayişin bərpası, istərsə də cinayətkarlıqla effektli mübarizə baxımından polislərin İKT biliklərinə yiyələnmələri vacibdir”

Hüquqşünas Mehman Muradlı “Bakı-Xəbər”ə açıqlamasında bildirdi ki, cənab nazir yeni fəaliyyətə başlayan polislərə çox düzgün və lazımi məsləhət verib: “Biz düşünməliyik ki, texnologiya inkişaf etdikcə, cinayətlərin taktikası da dəyişir. Yəni cinayətin törədilməsi alətləri sırasına müasir İKT-dən istifadə də daxil olur. Bu baxımdan da polis zabitləri deyilən sahəni yaxşı mənimsəməlidirlər ki, onlarla mübarizə apara bilsinlər.

Bilirsiniz ki, əməliyyat axtarış tədbirlərini, korrupsiya cinayətlərindən başqa, qanunçuluğun qorunmasını əsasən polis orqanları həyata keçirir. Müasir dünyada internet resurslarından istifadə etməklə oğurluq faktları geniş vüsət alıb. Bu baxımdan, polis əməkdaşlarının yüksək hazırlığı tələb olunur və cənab nazirin bu yönümdə atdığı addımlar cinayətkarları vaxtında ifşa etmək nöqteyi-nəzərdən lazımi tədbirdir. Digər bir məsələ də xakerlərlə bağlıdır. İndi sosial şəbəkədə istənilən şəxsin adından qeydiyyatdan keçməklə cinayətkar qruplar öz istəklərini həyata keçirə bilirlər. İnternet resursları vasitəsilə dələduzluq cinayətlərinin çoxluq təşkil etməsi  nəinki əməliyyatçılara "başağrısı" verir, hətta istintaqçılar da bu məsələdə bəzən çarəsiz vəziyyətə düşürlər. Bir çox radikal çağırışlar da sosial platformalar üzərindən edilir. Yəni müasir polislər sosial şəbəkələrlə iş metodunu və biliklərini də yaxşı mənimsəməlidirlər. Hazırda bütün transmilli cinayətkar qruplar öz fəaliyyətlərini internet üzərindən aparırlar. İstər asayişin bərpası, istərsə də cinayətkarlıqla effektli mübarizə baxımından polislərin İKT biliklərinə yiyələnmələri vacibdir”.

Məhəmmədəli QƏRİBLİ

Son xəbərlər