Xəbər verildiyi kimi, gələn ildən Azərbaycanın heyvandarlıq və quşçuluq təsərrüfatlarında istifadə edilən yem və yem əlavələrinin satışı 4 il müddətinə əlavə dəyər vergisindən (ƏDV) azad ediləcək. Bununla yanaşı, gələn ildən Azərbaycanda heyvan ətinin satışı 4 il müddətinə əlavə dəyər vergisindən (ƏDV) azad ediləcək. Amma vergi güzəşti kəsilmiş və dondurulmuş heyvan ətləri istisna olmaqla, emala göndərilən ətə aid deyil.
Həmçinin, sənəddə quş ətinin satışının ƏDV-dən azad edilməsi ilə bağlı 2017-ci ildən tətbiq edilən qaydanın müddətinin 2023-cü ilin sonuna qədər uzadılması təklif olunur.
Qeyd edək ki, bu məsələ "Vergi Məcəlləsinə dəyişiklik edilməsi haqqında” qanun layihəsində öz əksini tapıb.
Heyvan və quş əti, yem və yem əlavələrinin ƏDV-dən azad olunması ətin satış qiymətinə necə təsir edəcək? Ümumiyyətlə, bu hal bazarda qiymət dəyişikliyinə səbəb ola biləcəkmi?
Ekspertlərin fikrincə, heyvan ətinin ƏDV-dən azad edilməsi həm istehlakçıların işini asanlaşdıracaq, həm də istehsalçıları təşviq edəcək. Bu qərardan sonra ət məhsullarının qiymətində müəyyən ucuzlaşma müşahidə edilə bilər.
“Heyvan ətinin əlavə dəyər vergisindən azad edilməsi ən çox xaricdən gətirilən ət məhsullarının qiymətinə təsir edəcək”
İqtisadçı-ekspert Natiq Cəfərli bildirdi ki, heyvan ətinin əlavə dəyər vergisindən azad edilməsi ən çox xaricdən gətirilən ət məhsullarının qiymətinə təsir edəcək: “Bununla yanaşı, yerli heyvan ətinin qiymətində də ucuzlaşma olacaq. Xaricdən heyvan əti gətirilən zaman rəsmiləşdiriləndə gömrük rüsumu və əlavə dəyər vergisi ödənilirdi. Xaricdən gətirilən heyvan əti də əlavə dəyər vergisindən azad ediləcəksə, bu həmin ətin qiymətinə müəyyən dərəcədə təsir edəcək.
Ancaq daxili satış fərqlidir. Çünki hazırda ölkədə ət satışı ilə kiçik sahibkarlar məşğul olurlar. Bakıda kifayət qədər kiçik qəssab dükanı var və onlar onsuz da əlavə dəyər vergisi vermirlər. Onlar kiçik sahibkar kimi VÖEN ilə fəaliyyət göstərirlər. Bu səbəbdən, heyvan ətinin ƏDV-dən azad edilməsi ən çox xaricdən gətirilən məhsullara təsir edəcək”.
Həmsöhbətimiz hesab edir ki, bu qərar yerli heyvan ətinin qiymətini çox ucuzlaşdırmayacaq: “Çünki Azərbaycana xaricdən gətirilən ətin istehlak istiqamətləri bir qədər fərqlidir. Bu ət daha çox dövlətin öz ehtiyacları və ordu üçün istifadə edilir. Bundan başqa, xaricdən gətirilən ət kolbasa istehsalında istifadə olunur. Yəni ölkə əhalisi gündəlik istehlak üçün xarici ətdən istifadə etmir. Bizim toplum, bizim cəmiyyət ağız dadı olaraq yerli ətə öyrəşib. Bu gün hamı ev üçün ancaq yerli heyvan əti alır. Hesab edirəm ki, ət məhsullarının ƏDV-dən azad edilməsi yerli heyvan ətinin qiymətinə ciddi təsir etməyəcək. Yerli ətin qiymətində ucuzlaşma bir qədər az olacaq“.
Günel CƏLİLOVA
