21/11/2019 18:14
728 x 90

Bakıda kitab rəflərinə niyə icazə verilmədi?

img

Bu gün Azərbaycan cəmiyyətində mütaliə mədəniyyətinin formalaşdırılması əsas məsələlərdən biri kimi diqqət mərkəzində olmalıdır. Bütün dünyada insanlar arasında oxu mədəniyyətinin təbliği əsasdır və müxtəlif kafelərdə, yol kənarlarında xüsusi kitab köşkləri yaradılır. Dayanacaqda durub avtobus gözləyən sərnişinlər, eləcə də kafelərdə oturan insanlar bu kitabları ayaqüstü də olsa oxuyurlar.

Azərbaycanda son illər dövlət səviyyəsində kitab təbliğatı ilə bağlı bir sıra tədbirlər görülür, layihələr icra edilir, kitab sərgi-yarmarkaları keçirilir. Kitab təbliğatı ilə bağlı bütün təşəbbüslərin dəstəkləndiyi bir zamanda bir neçə gün əvvəl paytaxda yaradılan “'Kitab dayanacağı”'nın sökülməsi barədə xəbərlər yayılır. Sosial layihə çərçivəsində ilk olaraq həmin “kitab dayanacağı”' paytaxtın Nərimanov rayonu Nazim Hacıyev küçəsində qoyulub. Məlumatlara görə, ötən gün səhər saatlarında Bakı Şəhər İcra Hakimiyyətinin Ticarət və Xidmət Departamentinin əməkdaşları kitabları götürərək dayanacağın söküntüsünə başlayıblar. Onlar buna səbəb kimi həmin dayanacağın ora icazəsiz qoyulmasını göstəriblər.

Layihənin koordinatoru Ramil Hüseynzadə isə mətbuata deyib ki, həmin dayanacağı SOCAR-ın Elmi-Tədqiqat İnstitutunun Nərimanov rayonundakı idarəsinin qarşısında qoyulduğu üçün onlardan rəsmi qaydada icazə alıblar. Qeyd edək ki, sözügedən dayanacaqdan kitab götürüb oxuyan insanlar da həmin yerin sökülməsindən narahatdılar. Onlar bu sosial layihəni dəstəklədiklərini və insanlarda kitab oxuma vərdişlərini artırmağa kömək etdiyini deyirlər.

Ticarət və Xidmət Departamenti: “Layihənin rəhbərləri rəsmi qaydada icazə almadıqları üçün həmin dayanacaq ordan götürülür”

Bakı şəhər Ticarət və Xidmət Departamentindən baki-xeber.com-a bildirdilər ki, artıq bu məsələ ilə bağlı departamentin mövqeyi açıqlanıb. Departamentdən verilən məlumata görə, “kitab dayanacağı”'nın həmin ünvana qoyulması üçün onlardan icazə alınmalı idi, lakin alınmayıb. “Layihənin rəhbərləri rəsmi qaydada icazə almadıqları üçün həmin dayanacaq ordan götürülür” - deyə qeyd etdilər. Bundan başqa departamentdən bildirdilər ki, bu tip təşəbbüsləri, layihələri dəstəkləyirlər, lakin bu icazəli şəkildə olmalıdır: ”Bu tipli təşəbbüsləri rəsmi prosedur qaydalarına əməl etdikdən sonra dəstəkləyirik”.

Qeyd edək ki, departament tərəfindən atılan bu addım kəskin ictimai reaksiya doğurub. Ziyalılar, yazarlar departamentin bu hərəkətini pisləyirlər.   

Aydın Xan Əbilov: “Bahalı kitabları alıb oxuya bilməyən sadə insanlar üçün nəzərdə tutulan “kitab dayanacağı” kimi sosial-kultroloji layihəyə qarşı belə vandal bir hərəkət edirlər və biz bunu pisləyirik”

Yeni Sənətçilər və Yazarlar İctimai Birliyinin sədri, yazıçı-kultroloq Aydın Xan Əbilov “kitab dayanacağı”nın sökülməsinə kəskin etirazını bildirdi. “Əslində, bu tipli layihələr Azərbaycanda əvvəllər də gerçəkləşdirilib. Yadıma gəlir ki, Yeni Sənətçilər və Yazarlar İctimai Birliyinin kitabxana.net portalının dəstəyi ilə Azərbaycan Respublikası Prezidenti yanında Gənclər Fondu (Azərbaycan Gənclər Fondu) paytaxtda açıq səma altında kitab rəfi yaratmışdı. Daha sonra Milli Kitabxana da açıq kitab rəfləri layihəsi həyata keçirirdi. Bundan əlavə, bütün dünyada trendə çevrilən “açıq kitab dayanacağı” adlı layihə gerçəkləşdirildi. Bu “dayanacağı”n açılışı Azərbaycanın görkəmli yazıçısı, Azərbaycan Yazıçılar Birliyinin katibi, xalq yazıçısı Çingiz Abdullyevin iştirakı ilə açıldı. Bu “kitab dayanacağı”nın sökülməsi bilmirəm hansı məmurun ağlına gəlib? Məmurlar özbaşına hərəkət etməklə və bu dövlətin arxasında gizlin işlər görməklə dövlətə xəyanət etdiklərini bilmirlərmi? Öz uşaqları onsuz da kitab, dərs oxumur, dövlətin istedadlı abituriyentlər üçün ayırdığı vəsait hesabına övladlarını xaricdə təhsil almağa göndərirlər. Bahalı kitabları alıb oxuya bilməyən sadə insanlar üçün nəzərdə tutulan “kitab dayanacağı” kimi sosial-kultroloji layihəyə qarşı belə vandal bir hərəkət edirlər və biz bunu pisləyirik. Baxmayaraq ki, bütün dayanacaqlarda hər şeyin satılmasına icazə verirlər, amma pulsuz kitab oxunmasına yox. O vaxt çox maraqlı bir layihə vardı, dayanacaqların elektronlaşdırılması və burada monitorların quraşdırılması. Biz Bakı şəhərinin məmurlarına təklif etmişdik ki, həmin monitorlarda elektron kitabların, qəzetlərin, məlumatların olması üçün şərait yaradılsın. Təəssüflər olsun ki, bu barədə heç bir iş görülmədi. Cənab Prezidentin də iqtisadi müşavirədə qeyd etdiyi kimi bəzi məmurların köhnə təfəkkürü imkan vermir ki, yeniliklərə açıq olsunlar. Onlar dövlətin həmişə dəstəklədiyi layihələrə qarşı çıxış edirlər”.

A.X.Əbilov hesab edir ki, “kitab dayanacağı”nı sökən məmurlarla bağlı tədbirlər görülməlidir. Onun sözlərinə görə, həmin məmurlar həqiqətən də “qanunsuzluqlara” qarşı mübarizə aparırlarsa onda Nərimanov rayonu ərazisində “masajxana” adı altında fəaliyyət göstərən kafeləri, əxlaqsızlıq yuvalarını bağlasınlar. “Əxlaqızlıq yuvasına çevrilən masajxana, klub adı ilə fəaliyyət göstərən restoranları, əyləncə mərkəzlərini qapatsınlar. Biz kitaba qarşı bu vandalizmi əlbəttə ki, çox kəskin şəkildə pisləyirik. Eyni zamanda da yenə qeyd edirəm ki, kitab təbliğatı ilə bağlı dayanacaqlarda elektron kitab xidmətləri fəaliyyət göstərməlidir, bu məsələyə şərait yaradılmalıdır” - deyə A.X.Əbilov bildirdi.

İradə SARIYEVA

Son xəbərlər