Saleh Məmmədov Bakının qəsəbə yolları ilə bağlı Prezidentin tələbini hansı müddətə yerinə yetirəcək…
Bakıətrafı kənd və qəsəbələrin çoxunda məhəllədaxili yolların vəziyyəti heç də xoşagələn deyil. Qəsəbədaxili yolların vəziyyəti paytaxt sakinlərini narahat edən əsas məsələlərdən biridir. Bakı qəsəbələrinin əksəriyyətinin yolları ötən illərdə asfalt işlərinin görülməsinə baxmayaraq, yenə də bərbad olaraq qalır.
Hətta Bakı qəsəbələrinin yollarının təmir olunması məsələsinə ölkə başçısı İlham Əliyev də dəfələrlə toxunub. Prezident aidiyyəti qurumlara bir neçə tapşırıq verib ki, Bakı qəsəbələrinin yolları təmir olunsun. Ancaq buna baxmayaraq, vəziyyət yenə də olduğu kimi qalır. Havalar soyuyan ərəfədə yağış, qar yağanda asfaltı xarab olmuş yollardan keçmək zülümdür. Həmin yolun palçığa qərq olması həm yoldan keçən nəqliyyat vasitələrinə təsir edir, həm də insanlara. Hətta bəzi yerlər var ki, orada hələ də torpaq yollar mövcuddur. O yollar da asfaltlanmalıdır.
Prezident İlham Əliyev Avtomobil Yolları Dövlət Agentliyinin idarə heyətinin sədri Saleh Məmmədovu qəbul edən zaman qəsəbədaxili yolların təmir olunması məsələsinə yenidən toxunub. Ölkə başçısı qeyd edib ki, yol tikintisi Azərbaycanda geniş vüsət alıb. Hər il bizdə min kilometr yeni yol çəkilir: “Bu il, eyni zamanda, şəhərlərarası yolların çəkilişinə və kənd yollarının tikintisinə vəsait nəzərdə tutulub. O cümlədən, son dəfə mən sizə tapşırıq verdim ki, Bakı qəsəbələrinin yollarına da diqqət yetirilsin. Bakının həm qəsəbələrarası, həm də qəsəbədaxili yolları təmir olunmalıdır, yeni yollar çəkilməlidir. Bəzi yerlərdə hələ torpaq yollar mövcuddur. Torpaq yollar olmamalıdır. Qəsəbədaxili yollara asfalt vurulmalıdır”.
Maraqlıdır, Bakının daxili yollarının təmir olunması hansı müddətə gerçəkləşə bilər və bu iş hansı vəsait hesabına hazır ola bilər?
- “Təkliflər hazırlandıqdan sonra işin icra müddəti göstərilir”
Nəqliyyat üzrə ekspert Azər Allahverənov “Bakı-Xəbər”ə açıqlamasında qeyd etdi ki, yolların təmirinin hansı müddətdə yekunlaşması görüləcək işin həcmindən asılıdır: “Aidiyyəti strukturlar qarşısında paytaxt yollarının təmir olunması ilə bağlı məsələ qaldırılan zaman onlar bu məsələ ilə bağlı araşdırmaya başlamalıdırlar. Görüləcək işin həcmi müəyyən olunduqdan sonra aidiyyəti qurumlar Maliyyə Nazirliyi qarşısında vəsatətlə çıxış edirlər. İşin həcmi müəyyən olunduqdan sonra icra müddəti təyin olunur. Ölkə başçısı yolun təmir olunması ilə bağlı tapşırıq verdikdən sonra aidiyyəti strukturlar dərhal təkliflər hazırlamağa başlayırlar. Təkliflər hazırlandıqdan sonra işin icra müddəti göstərilir. İşin mərhələli şəkildə yekunlaşacağı da qeyd olunur. Həmçinin, işin hansı ərazilərdə aparılacağı və tələb olunan vəsaitin məbləği qeyd olunur. Həmin təklif hökumətə göndərilir. Hökumət tərəfindən təklifə razılıq verildikdən sonra yolların təmir olunması qeyd etdiyim sistem üzrə həyata keçirilir”.
A.Allahverənov onu da vurğuladı ki, yolların təmir olunması, abadlaşdırılması gündəmdə olan ərəfədə qiymətləndirmə aparıldıqdan sonra bu işin həcminin bir neçə dəfə artıq olduğu müəyyən oluna bilər. Bunun üçün, ilk növbədə, qiymətləndirmə aparılmalıdır ki, işin nə zaman yekunlaşacağı bəlli olsun.
Günel CƏLİLOVA
