Rauf Zeyni: “Korrupsiya və rüşvətxorluq halları ilə mübarizədə cəmiyyət, ictimaiyyət də aktivlik göstərir”
Azərbaycanda korrupsiya ilə mübarizə sahəsində davamlı olaraq tədbirlər həyata keçirilir. Amma bununla belə, hələ də bu sahədə mövcud olan problemlər var ki, Prezident İlham Əliyevin yanında oktyabrın 15-də keçirilən iqtisadi müşavirədə ölkə başçısı bu məsələyə də toxunub.
Prezident İlham Əliyev çıxışında korrupsiyaya qarşı mübarizədə ictimaiyyətin də fəal olmalı olduğunu deyib: “...Bu yaxınlarda aparılan sorğuya əsasən demək olar ki, əhalinin mütləq əksəriyyəti Azərbaycan rəhbərliyini, bizim apardığımız siyasəti birmənalı şəkildə dəstəkləyir. Əlbəttə ki, bu dəstək bizə güc verir, iradəmizi artırır və biz islahatlara daha da böyük həvəslə, daha da böyük imkanlarla meyl göstəririk, bu islahatları aparırıq. Ancaq buna baxmayaraq, əlbəttə, bir daha demək istəyirəm ki, istifadə olunmayan kifayət qədər ehtiyatlar var və biz bu ehtiyatları aşkar etməliyik. Elə etməliyik ki, Azərbaycanda hər bir sahə şəffaf olsun və ən yüksək standartlara cavab versin. Əlbəttə ki, bu məqsədə nail olmaq üçün korrupsiyaya, rüşvətxorluğa qarşı amansız mübarizə aparılmalıdır. Hesab edirəm ki, hazırda bu mübarizə bizi tam qane edə bilməz. Çünki biz bilirik ki, korrupsiya halları geniş vüsət alıb, təkcə Azərbaycanda yox, bütün MDB məkanında. Yəni bu bizim keçmişdən qalan acı mirasımızdır. Ancaq biz xoşagəlməz hallara qarşı mübarizə aparmalıyıq və təkcə hüquq-mühafizə orqanları yox, bütün aidiyyəti qurumlar, o cümlədən vətəndaşlar. Mən dəfələrlə demişəm ki, ictimai nəzarət daha da güclü olmalıdır. Hər bir yerdə, hər bir bölgədə, Bakının hər bir yerində əgər hansısa qanunsuzluq baş verirsə, aidiyyəti orqanlar bunu aşkarlamalı və bu qanunsuzluğa yol açan vətəndaşları, insanları məsuliyyətə cəlb etməlidirlər. Vətəndaşlar da, öz növbəsində, məlumat verməlidirlər, ictimai nəzarət baxımından daha da fəal olmalıdırlar ki, biz islahatları aparaq və ölkəmizin qüdrətini artıraq”.
Korrupsiya və rüşvətxorluğa qarşı mübarizədə vətəndaş aktivliyi qənaətbəxşdirmi?
- “Vətəndaş cəmiyyətinin ictimai nəzarəti və şəffaflığı təmin etməsi üçün...”
Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Bakı-Xəbər”ə bildirdi ki, ölkə başçısının vurğuladığı bu məsələ cəmiyyətdə çox aktualdır və daim müzakirə predmetidir. R.Zeyni hesab edir ki, ictimaiyyətlə yanaşı, QHT-lər, ictimai təşkilatlar, bütövlükdə isə cəmiyyət korrupsiya və rüşvətxorluqla mübarizədə dövlətə dəstək verməlidir. Dəfələrlə rəhbərlik etdiyi forumun xətti ilə keçirilən tədbirlərdə dövlət və cəmiyyət üçün zərərli olan korrupsiya və rüşvətxorluqla bağlı tənqidi fikirlər səsləndirdiyini deyən R.Zeyninin sözlərinə görə, cəmiyyətin bu problemdən xilas olması üçün həm Azərbaycan xalqı, həm də qeyri-hökumət təşkilatları ölkə başçısının və dövlətin yanındadır. “Mən özüm dəfələrlə çıxışlarımda bildirmişəm ki, ölkə başçısının apardığı islahatlara, təəssüflər olsun, bu gün onun komandasında olan məmurlar tərəfindən sobataj hallarına yol verilir. Cənab Prezident də bunu öz çıxışında qeyd etdi. Çünki bu çox önəmli məsələdir. Biz bunu deyəndə bəziləri bu fikirləri qeyri-hökumət təşkilatlarının fikri, mövqeyi kimi qəbul edirdilər ki, bu qərəzlidir. Amma ölkə başçısı öz çıxışında bildirdi ki, bu gün hökumətdə təmsil olunan bəzi qüvvələr hətta Prezident tərəfindən aparılan çoxşaxəli və vacib islahatları da sobataj etməkdən çəkinmirlər. Bu çox ciddi məsələdir və dövlətimizin müstəqilliyinə, təhlükəsizliyinə çox böyük bir təhlükədir. Biz qeyri-hökumət təşklatları olaraq ölkə başçısının apardığı islahatları dəstəkləyirik və Prezidentin yanındayıq. İnanırıq ki, bu islahatlar nəticəsində Azərbaycan daha da inkişaf edəcək və bu islahatlar ölkəmizi işıqlı gələcəyə aparacaq, torpaqlarımızın da işğaldan azad edilməsinə çox böyük təkan olacaq. Bu baxımdan da daim şəffaflığın və ictimai nəzarətin aktual olduğunu cəmiyyətin diqqətinə çatdırmışıq, cəmiyyəti bu mənfi halla mübarizədə aktivlik göstərməyə çağırmışıq. Biz mütəmadi olaraq korrupsiya və rüşvətxorluğa qarşı mübarizə aparmışıq, səsimizi cəmiyyətə çatdırmışıq və ictimaiyyəti də bu sahədə maarifləndirmişik. Korrupsiya və rüşvətxorluq halları ilə mübarizədə cəmiyyət, ictimaiyyət də aktivlik göstərir. Qeyri-şəffaflıq, korrupsiya kimi mənfi hallar nə qədər vurğulanmayacaq və diqqətdən kənar qalacaqsa, bir o qədər də cəmiyyətdə bu hallar tüğyan edəcək, bu da bizim dövlətimizə zərbə vuracaq. Dəfələrlə bu fikri vurğulamışıq. Ulu öndər də vaxtilə deyirdi ki, rüşvətxorluq cəmiyyət, dövlət üçün çox böyük təhlükədir. Ona görə də korrupsiyaya, rüşvətxorluğa qarşı mübarizədə vətəndaş aktivliyi daha da artmalıdır və qeyri-hökumət təşkilatları olaraq davamlı şəkildə bu istiqamətdə ictimaiyyət arasında maarifçilik işləri həyata keçiririk.
Cəmiyyət korrupsiya və rüşvətxorluq məsələsində çox həssasdır. İctimaiyyət bu kimi hallara qarşı öz aktivliyini və həssaslığını ifadə edib. Hesab edirəm ki, ictimaiyyət rüşvətxorluq və korrupsiya ilə mübarizədə dövlətin yanındadır. Bəzi tədbirlərdə biz korrupsiya və rüşvətxorluqla bağlı mübarizə haqqında danışarkən burada ictimaiyyətin də tələblərini eşidirik. İctimaiyyət bizdən korrupsiya və rüşvətxorluq, dövlətimizin, cəmiyyətimizin inkişafına zərbə vuran bu kimi neqativ hallarla daha kəskin mübarizə aparmağımızı tələb edir”.
R.Zeyni qeyd etdi ki, Prezident öz çıxışında cəmiyyətdə korrupsiya, rüşvətxorluqla mübarizə sahəsində ictimaiyyətin aktiv, fəal olmalı olduğunu qeyd etməklə, ictimaiyyətin qarşısında yeni vəzifə qoydu. Onun sözlərinə görə, ölkə başçısının rüşvətxorluq və korrupsiya hallarının mövcudluğunun kökünün kəsilməsi istiqamətində irəli sürdüyü fikirlərə ictimaiyyət dəstək verir. “Vətəndaş cəmiyyətinin ictimai nəzarəti və şəffaflığı təmin etməsi üçün dövlət səviyyəsində vətəndaş cəmiyyətinə diqqət və qayğı artırılmalı, layihələrin həyata keçirilməsi üçün dövlət tərəfindən vətəndaş cəmiyyəti təşkilatlarına fəaliyyət təminatı verilməlidir. Hansı qurumun ofisi yoxdursa, ofislə, kimin maliyyəsi yoxdursa, maliyyə ilə təmin olunmalıdır ki, qeyri-hökumət təşkilatları özlərinin kadr potensialını ətrafında saxlaya, bu istiqamətdə ölkə başçısının həyata keçirdiyi işlərə dəstək verməyi həyata keçirə bilsinlər” - deyə R.Zeyni qeyd etdi.
İradə SARIYEVA
