Prezident ünvanlı yardım alan ailələrin sayının artırılmasına yol açdı…

Respublikamızda həyata keçirilən sosial-iqtisadi siyasətin başlıca məqsədlərindən biri vətəndaşların həyat səviyyəsinin yüksəldilməsi və əhalinin sosial müdafiəsinin təmin edilməsidir. Son bir neçə ildə iqtisadiyyatın inkişafında əldə edilən nailiyyətlər bu məqsədin uğurla reallaşmasına şərait yaradıb.

Bütün kateqoriyalardan olan vətəndaşların sosial müdafiəsinin gücləndirilməsi, əhalinin aztəminatlı təbəqələrinə kömək göstərilməsi, yoxsulluğun aradan qaldırılması Azərbaycanda dövlət siyasətinin başlıca istiqamətlərindən biridir. Prezident İlham Əliyevin sosial siyasətinin fəlsəfəsi də ondan ibarətdir ki, ölkədə aztəminatlı, yoxsul insan olmasın. Fərəhli haldır ki, iqtisadiyyatda həyata keçirilən köklü islahatlar bu sferada dinamik və davamlı inkişafı təmin etməklə bərabər, əhalinin sosial-iqtisadi vəziyyətinin yaxşılaşdırılmasına geniş imkanlar açıb. İqtisadi inkişaf maliyyə imkanlarının çoxalması, adekvat olaraq, xalqın sosial rifahının, güzəranının daha da yaxşılaşdırılması, sosial problemlərin həlli istiqamətində atılan addımların real nəticələri ilə müşayiət olunmaqdadır.

Prezident İlham Əliyevin sosial sahəyə diqqət və qayğısının nəticəsidir ki, son illər dövlət büdcəsi təsdiq olunarkən ali maliyyə sənədində sosialyönümlülük prioritet olaraq qalır. Məhz dövlət başçısının qətiyyətli siyasəti sayəsində ölkədə yoxsulluğun səviyyəsi minimuma endirilib.

Məlumdur ki, yoxsulluğun aradan qaldırılması üçün aztəminatlı ailələrə ünvanlı sosial yardım verilir. Maddi durumu zəif olan ailələrin rifah halının yüksəlməsi üçün ünvanlı sosial yardım alan ailələrin sayı artacaq. Bu barədə Azərbaycan Prezidenti İlham Əliyev oktyabrın 15-də keçirilən iqtisadi müşavirədə çıxışı zamanı deyib.

Prezident qeyd edib ki, sosial müdafiə sahəsində Azərbaycan dünya miqyasında nümunəvi ölkədir: “Bizim sosial siyasətimiz birmənalıdır. Dəfələrlə demişəm ki, siyasətimizin mərkəzində Azərbaycan vətəndaşı dayanır. Sosial müdafiə sahəsində Azərbaycan, hesab edirəm ki, dünya miqyasında nümunəvi ölkədir. Həm minimum əməkhaqqının, pensiyaların qaldırılması, özünəməşğulluq proqramının geniş vüsət alması, - bu il on mindən çox insan bu proqramla əhatə olunacaq, - ünvanlı sosial yardımı alanların sayı artır və əmək və əhalinin sosial müdafiəsi nazirinin qarşısında mən vəzifə qoydum ki, biz bu kateqoriyadan olan insanlara daha geniş həcmdə yardım göstərək. İndi orta hesabla 200 manatdan çox hər bir ailə alır. O, ailələrin sayı artmalıdır. Belə vəzifə qoyulub. Əlbəttə ki, əsas vəzifəmiz iqtisadi inkişafı şərtləndirən islahatları dərinləşdirməkdir”.

• “Azərbaycan iqtisadiyyatı inkişaf etdikcə, əhalinin rifahının yaxşılaşdırılması istiqamətində də müvafiq addımlar atılır”

Ünvanlı sosial yardım alacaq ailələrin sayının artmasının əhəmiyyəti barəsində danışan millət vəkili Flora Qasımova “Bakı-Xəbər”ə açıqlamasında qeyd etdi ki, Prezident İlham Əliyev dəfələrlə öz çıxışında deyib ki, ölkə siyasətinin mərkəzində Azərbaycan xalqı dayanır. Danılmaz faktdır ki, İlham Əliyev ölkə əhalisinin rifah halının yaxşılaşdırılması istiqamətində mühüm işlər görür. Aztəminatlı ailələrin maddi durumunun inkişaf etməsi üçün həmin ailələrə dəstək olmaq məqsədilə ünvanlı sosial yardım verilir: “Məlumdur ki, cari il ərzində həyata keçirilən sosial islahatlar paketi ölkədə vətəndaşa nə qədər dəyər verildiyinin aydın göstəricisidir. Bu islahatlar nəticəsində 4 milyon 200 mindən çox insanın maddi vəziyyəti yaxşılaşdı, pensiyalar, əməkhaqları, müavinətlər artırıldı. Azərbaycanda minimum əməkhaqqının bir ildə iki dəfə artırılması nəticəsində ölkəmiz bu göstərici üzrə MDB-də 1-ci yerdə qərarlaşdı”.

Xanım millət vəkili vurğuladı ki, əhalinin sosial müdafiəsi sahəsində həyata keçirilən bu islahatlar dünyaya nümunə ola bilər. Azərbaycan iqtisadiyyatı inkişaf etdikcə, əhalinin rifahının yaxşılaşdırılması istiqamətində də müvafiq addımlar atılır. Azərbaycan dövlət büdcəsinin sosialyönümlü olması da bunu bir daha təsdiq edir. Prezident İlham Əliyevin qeyd etdiyi kimi, 2020-ci ilin dövlət büdcəsi həm sosial, həm də investisiyayönümlü olacaq.

Həmsöhbətimizin sözlərinə görə, ünvanlı sosial yardım alacaq aztəminatlı ailələrin sayının artması sevindiricidir.

Günel CƏLİLOVA