Polisin işindən ictimai məmnunluq reytinqinə görə Azərbaycanın fantastik yüksəlişi – 52-ci yerdən 30-cu yerə…

İctimai-siyasi sabitlik hüquqi dövlət və vətəndaş cəmiyyəti quruculuğu yolu seçmiş hər bir dövlətin mövcudluğunun mühüm şərtlərindən biridir. Müstəqil Azərbaycan son illərdə bütün sahələrdə sürətlə inkişaf edir. Azərbaycanın dünya miqyasında sivil, demokratik yolla irəliləyən, beynəlxalq hüquq normalarına və prinsiplərinə hörmətlə yanaşan dövlət imici daha da möhkəmlənib.

Respublikamızda ictimai asayişin, qanunçuluğun və hüquq qaydalarının etibarlı təminatı, vətəndaşların konstitusion mənafelərinin yüksək səviyyədə qorunması, kriminogen durumun sabitliyi Azərbaycanın ötən müddətdə qazandığı ən mühüm nailiyyətlər sırasındadır. Danılmaz həqiqətdir ki, respublikamızın ictimai-siyasi sabitlik şəraitində inkişafında, ictimai asayişin qorunmasında, cinayətkarlığa qarşı mübarizənin səmərəli təşkilində, dövlətçiliyin hər cür cinayətkar qəsdlərdən müdafiəsində, vətəndaşların təhlükəsiz yaşamaq kimi fundamental hüququnun təminatında Daxili İşlər Nazirliyinin və onun ayrı-ayrı strukturlarının müstəsna rolu var. Cinayətkarlığın bütün forma və təzahürlərinə qarşı amansız mövqe tutan daxili işlər orqanları qanunla üzərlərinə düşən vəzifələri yerinə yetirməklə, iqtisadi inkişafın mühüm şərti olan sabitliyin təminatı üçün bütün zəruri tədbirləri həyata keçirməklə xalqın və dövlətin sadiq keşikçisinə çevrilib, ictimai etimad qazanıblar.

Azərbaycan uzun illərdir əminamanlığın yüksək səviyyədə qorunduğu təhlükəsiz ölkələrdən olmaqla, asayişin təmininə, cinayətkarlıqla mübarizənin nəticələrinə görə MDB, habelə Şərqi Avropa məkanında ön sıralardadır.

Azərbaycanda ictimai asayişin qorunmasında polisin fəaliyyəti tək ölkə daxilində deyil, beynəlxalq təşkilatlar tərəfindən tərtib olunan hesabatlarda da yüksək qiymətləndirilir.

Polisin fəaliyyəti ilə bağlı 141 ölkə arasında tədqiqat keçirilib. Hesabata əsasən, polis orqanlarına əhali tərəfindən inamın səviyyəsinə görə Azərbaycan 30-cu yerdədir. Məlumat üçün bildirək ki, iki il öncə tərtib olunan beynəlxalq hesabatda isə Azərbaycan 52-ci yerdə idi. İki il ərzində Azərbaycanda polisin fəaliyyətindən əhalinin məmnun olması beynəlxalq hesabatlarda da öz əksini tapır.

• “Azərbaycan cəmiyyətinin polisə inam və etimadının artması beynəlxalq təşkilatların diqqətindən yayınmır”

“Konstitusiya” Araşdırmalar Mərkəzinin rəhbəri, hüquqşünas Əliməmməd Nuriyev “Bakı-Xəbər”ə açıqlamasında qeyd etdi ki, Azərbaycan cəmiyyətinin polisə inam və etimadı artır: “Azərbaycan polisinə olan ictimai münasibət beynəlxalq təşkilatların hesabatlarında da yüksək qiymətləndirilir: “İki il öncə tərtib olunmuş beynəlxalq hesabatda Azərbaycan polisi 52-ci yerdə idi. Ancaq bu il isə polisə olan münasibət həmin yeri dəyişib. Beləliklə, polisə olan münasibətə görə ölkə polisi 30-cu yerdə qərarlaşıb. İki il fərqlə 52-ci yerdən 30-cu yerə yüksəlmək böyük göstəricidir. Danılmaz faktdır ki, Azərbaycan polisinə inam və etimad günü-gündən artır. Polis həm ictimai təhlükəsizliyi təmin edir, eyni zamanda, kriminal durumun gərginləşməsinin qarşısını alan mühüm strukturdur. Polisin fəaliyyətində şəffaflıq müşahidə edilir. Azərbaycan polisi, yaşından, tutduğu vəzifədən asılı olmayaraq, hər kəsə isti münasibət sərgiləyir. Polis ən ağır vəziyyətdə olan insanlara köməklik göstərir”.

Həmsöhbətimiz onu da vurğuladı ki, vətəndaşlar bu gün daha arxayın və rahat şəkildə polisə müraciət edirlər. Əhali əmindir ki, polis onların ictimai təhlükəsizliyini lazımi şəkildə təmin edir. Ölkə əhalisinin polisə münasibəti beynəlxalq ekspertlərin diqqətindən yayınmır. Təbii ki, bu hal beynəlxalq hesabatlarda öz əksini tapır.

Günel CƏLİLOVA