12/11/2019 22:42
728 x 90

Azərbaycan xalqına yaraşmayan təzahür - ictimai yerlərdə qadın saçyolduları artır

Mahirə Əmirhüseynova: “Küçədə, ictimai yerdə dava edən, saçyolduya çıxan, həmcinsi ilə əlbəyaxa olan, təhqiramiz sözlər işlədən qadınlar cəmiyyət üçün pis örnəkdir”

img

Qadın incəlik, zəriflik simvolu olsa da, müəyyən hallarda bəzi Azərbaycan qadınlarının milli adət-ənənələrimizə, dəyərlərimizə zidd davranışlarını müşahidə etməli oluruq. Vaxt vardı ki, qadının səsini nəinki qonşular, heç ailə üzvləri belə eşitmir, o öz abır-həyasına sığınıb həyatını davam edirdi.

Bu gün artıq vəziyyət başqadır. Biz bu başqalaşmanı bəzi qadınların hərəkətlərini izləyərkən görə bilirik. Son zamanlar bəzi qadınların müxtəlif ticarət mərkəzləri, gözəllik salonları, paklar, gecə barları, bir sözlə, ictimai yerlərdə dava etməsinin, hətta saçyolduya çıxmasının, bir-birinə şillə-təpik atmasının, bir-birini ağır söyüşlərlə təhqir etməsinin şahidi oluruq.

Hətta sosial şəbəkələr, internet kanallarında qadınlar arasında baş verən fərdi və kütləvi davaların videolarına da, fotoşəkillərinə də, səs yazılarına da rast gəlirik. Qadınlar arasında baş verən bu cür davaların, saçyolduların əsas səbəbi kimi bölüşdürə bilmədikləri oğlanlar, kişilər göstərilir. Bu qadınların çox vaxt kişi üstündə dava etdikləri qeyd edilir. Bəzi hallarda qadın ərinin sevgilisini “razborkaya” çağırıb onunla haqq-hesabı çürütmək istəyir. Onu da deyək ki, qadınlar arasında başlanan mübahisə böyük davaya çevrilir və camaatın gözü qarşısında baş verən bu davaların sonu polis müdaxiləsi ilə nəticələnir. Hətta dalaşan, saçyolduya çıxan qadınların bir çoxuna da cinayət işi açılır. Yəni tərəflərdən birinin şikayəti əsasında qadınlardan birinin məsuliyyətə cəlb edilməsi təhlükəsi yaranır.

  • “...bunu hansısa bir kişiyə, sevdikləri adama görə edirlər, amma bu yolverilməzdir”

 “XXI əsrin qadınları” İctimai Birliyinin sədri Mahirə Əmirhüseynova “Bakı-Xəbər”ə bildirdi ki, ictimai yerlərdə qadınlar arasında baş verən qalmaqallar, mübahisələr və əlbəyaxa döyüşlər, saçyoldular qəbuledilməzdir. Bunun Azərbaycan qadınına yaraşmayan hərəkət olduğunu deyən M.Əmirhüseynovanın sözlərinə görə, bu davaların baş verməsi kişi amili ilə bağlıdır: “İctimai yerlərdə qadınların bu şəkildə dava etməsi, ümumiyyətlə, qadına yaraşmayan hərəkətdir. Hesab edirəm ki, belələrinə də qadın demək olmaz. Mən qadınların ictimai yerlərdə, camaatın gözü qarşısında mübahisə etməsinə, saçyolduya çıxmasına mənfi yanaşıram, normal qadın belə bir hərəkətə yol verməz. Araşdırsanız görərsiniz ki, o qadınlar ziyalı, savadlı qadınlar deyil, tamam başqa yolun yolçularıdır. Çünki savadlı, təhsilli, özünə hörmət edən qadın belə hərəkətlərə yol verməz. Bildiyim qədər, ictimai yerlərdə dava-dalaş edən qadınlar bunu hansısa bir kişiyə, sevdikləri adama görə edirlər, amma bu yolverilməzdir. Qadınlar kişi üstündə dava etməli deyillər. Ümumiyyətlə, kişi üstündə dava etmək, saçyolduya çıxmaq, konfliktə girmək qadına yaraşmır. Hesab edirəm ki, qadınlar dava etmək əvəzinə, daha da birləşməli, qadınların birliyi sarsılmaz olmalıdır. Küçədə, ictimai yerdə dava edən, saçyolduya çıxan, həmcinsi ilə əlbəyaxa olan, təhqiramiz sözlər işlədən qadınlar cəmiyyət üçün pis örnəkdir”.

Leyla QARAXANLI

Son xəbərlər