12/11/2019 22:08
728 x 90

Məktəblərdə pedaqoji şuraların formallığına nazirlik də tənqidi yanaşdı…

Kamran Əsədov: “Bu sahədə yaşanan formallığı aradan qaldırmaq üçün qanunvericiliyə müəyyən dəyişiklik etmək lazımdır”

img

“Məktəblərdə keçirilən pedaqoji şuraların iclaslarında məktəbləri narahat edən çox ciddi məsələlər müzakirə olunmalıdır. Lakin bir çox hallarda həmin iclaslar formal xarakter daşıyır”. Bunu təhsil nazirinin müavini Məhəbbət Vəliyeva “Bakı təhsili: uğurlar və hədəflər” mövzusunda keçirilən konfransda çıxışı zamanı deyib.

Nazir müavini bildirib ki, əslində, həmin iclaslarda heç kim şura iclaslarının ildə 5 dəfə keçirilməsini tələb etmir: “Zərurət yarananda narahatedici məsələlər, yəni qərar qəbul etmək, fikir bildirmək, fikir mübadiləsi aparmaq üçün bir sıra məsələlər pedaqoji şuraların müzakirəsinə çıxarılmalıdır. Yaxşı olardı ki, bu il keçirilən şura iclaslarına Təhsil Nazirliyinin nümayəndələri də dəvət edilsin. Şəxsən mən, böyük məmnuniyyətlə, bu iclaslarda iştirak edə bilərəm. Çünki belə iclaslarda ortaya qoyulan təcrübələr bütün ölkə üçün faydalı ola bilər”.   

Ekspertlər də məktəblərdə keçirilən pedaqoji şuraların formal xarakter daşıdığını bildirirlər.

  • “…pedaqoji şurada təmsil olunanlar öncədən müəyyən olunmuş qərarı qəbul edir”

Təhsil eksperti Kamran Əsədov “Bakı-Xəbər”ə açıqlamasında qeyd etdi ki, qanunvericiliyə əsasən, orta məktəblərdə ali orqan pedaqoji şuralardır: “Təəssüf ki, pedaqoji şuraların iclasında öncədən razılaşdırılmış qərarlar qəbul olunur. Bunun da səbəbi pedaqoji şuralara məktəb direktorlarının rəhbərlik etməsidir. Bu sahədə yaşanan formallığı aradan qaldırmaq üçün qanunvericiliyə müəyyən dəyişiklik etmək lazımdır. Bir çox hallarda pedaqoji şuralarda qəbul olunan qərarlar məktəb rəhbərliyinin istəyinə uyğun olaraq həyata keçirilir. Hansısa müəllimin cəzalandırılması və ya şagirdin sinifdə qalması kimi qərarlar iclasda iştirak edənlərin rəyi ilə deyil, direktorun istəyi ilə icra olunur”.

Həmsöhbətimizin sözlərinə görə, əksər xarici ölkədə pedaqoji şuralara məktəb rəhbərliyi müdaxilə edə bilməz: “Bir çox ölkələrdə, o cümlədən, Türkiyə, Gürcüstan, Avropa və Amerika ölkələrində pedaqoji şuranın qərarı çıxarılarkən valideynlərlə yanaşı, yerli və təhsilə aid qurumlar həmin iclasda iştirak edirlər. Ancaq bizdə isə vəziyyət fərqlidir. Bu səbəbdən də ölkəmizdə keçirilən pedaqoji şuraların fəaliyyəti bizi qane etmir. Bununla yanaşı, məktəblərə nəzarət məsələsinə də diqqət etmək lazımdır”.

Ekspert xüsusi olaraq vurğuladı ki, pedaqoji şuraların nizamnamələri Sovet dövründən qalmış əsasnamə əsasında hazırlanıb. Bu səbəbdən pedaqoji şuralar formal xarakter daşıyır: “Bu hal təhsilin əlçatanlığına, inkişafına, əhatə dairəsinin genişlənməsinə mənfi təsir göstərir. Qeyd etdiyim kimi, pedaqoji şurada təmsil olunanlar öncədən müəyyən olunmuş qərarı qəbul edir. Bu üzdən, pedaqoji şuralarda hansısa müzakirənin effekti olmur”.   

Günel CƏLİLOVA 

Son xəbərlər