Bu yay həddindən artıq istilər Dunay çayının suyunun son 30 ilin ən aşağı səviyyəsinə düşməsinə səbəb olub və bu da bir çox Şərqi Avropa ölkəsi üçün enerji böhranı təhlükəsi yaradıb.
Dunay çayının suyunun səviyyəsinin tezliklə yüksəlməsi ehtimalı azdır. Sinoptiklər qarşıdakı günlərdə əhəmiyyətli yağış gözləmir və temperaturun 38 dərəcəyə çatacağı ilə daha bir ekstremal isti dalğası proqnozlaşdırırlar. Macarıstanın baş naziri Peter Magyar, su çatışmazlığı səbəbindən enerji bloklarını soyutmaq mümkün olmadığı üçün, elektrik enerjisi istehsalının artıq dörd dəfə azaldığı “Paks” Atom Elektrik Stansiyasının bağlana biləcəyini istisna etmir. Ötən həftə Macarıstan hakimiyyəti iri sənaye müəssisələrini və istehlakçılarını, xüsusən də pik saatlarda - saat 17:00-dan 22:00-dək enerji istehlakını azaltmağa çağırdı. Rumıniyada Dunay çayının səviyyəsinin aşağı olması səbəbindən hakimiyyət orqanları artıq çay suyundan istifadə edən “Çernavoda” Atom Elektrik Stansiyasındakı iki reaktordan birini bağlamaq məcburiyyətində qalıblar. Rumıniyalı fermerlər də taxılı çay vasitəsilə daşıya bilməyərək problemlərlə üzləşiblər. Avtomobil istehsalçıları “Dacia” və “Ford” şirkətləri elektrik enerjisi çatışmazlığı səbəbindən elektrik enerjisi istehlakını azaltmaq üçün Rumıniya zavodlarını 19 avqusta qədər bağlayacaqlarını açıqlayıblar.
Çay səviyyəsinin düşməsi Serbiyadakı neft emalı zavodunda da problemlərə səbəb olub. Dunay çayında yerləşən ölkənin ən böyük su elektrik stansiyası olan “Cerdap”ın gücü artıq maksimum həddin 20%-ə düşüb. Serbiya hakimiyyəti həmçinin sakinləri enerji istehlakını azaltmağa, xüsusən də kondisionerlərin istifadəsini azaltmağa çağırıb. Avropanın digər böyük çayı olan Reyn də bu yay suyun səviyyəsinin əhəmiyyətli dərəcədə aşağı düşməsi problemi yaşayır. Çayın su səviyyəsi son səkkiz ilin ən aşağı səviyyəsinə yaxınlaşır. “Financial Times” qəzeti ekspertlərə istinadən bildirib ki, Reyn çayının səviyyəsinin aşağı olması Almaniyanın ÜDM artımını 0,1-0,2% azalda bilər, o cümlədən çayla daşınan yüklərin həcminin təxminən 10% azalması hesabına. Fransada 57 reaktorun elektrik enerjisinin 70%-ni istehsal etdiyi bəzi nüvə elektrik stansiyaları da bağlanıb. Nüvə enerjisi sənayesindəki problemlər fonunda Aİ-nin isti hava dalğası elektrik enerjisi istehsalı üçün qaz istehlakını artırıb. “Kept” şirkətinin neft və qaz xidmətləri üzrə rəhbəri Maksim Malkov bildirib ki, iyun ayının sonundan bəri istehlak illik müqayisədə 34% artıb və bu da qışa hazırlıqları xeyli çətinləşdirib.
Samirə SƏFƏROVA
