2026-cı ildə "Respublika Xatirə Kitabı"nın yaradılmasının 30 illiyi tamam olur. Bu münasibətlə "Şəhidlər ölməz, Vətən bölünməz!" tədbirlər silsiləsi çərçivəsində "Respublika Xatirə Kitabı – 30" adlı iki videoçarx hazırlanaraq ictimaiyyətə təqdim edilib. Videoçarxlarda Ümummilli Lider Heydər Əliyevin, Azərbaycan Respublikasının Prezidenti İlham Əliyevin və Birinci vitse-prezident Mehriban Əliyevanın şəhidlər, onların əziz xatirəsi və Vətən müdafiəsi ilə bağlı səsləndirdikləri fikirlər yer alıb. Birinci videoçarxda "Respublika Xatirə Kitabı" redaksiyasının yaranma və inkişaf mərhələləri əks olunub. Bildirilir ki, redaksiya 1991-ci ildən müstəqil qurum kimi fəaliyyət göstərir və onun fəaliyyətində əsas dönüş nöqtəsi Ümummilli Lider Heydər Əliyevin diqqət və qayğısı nəticəsində baş verib. Qeyd olunur ki, redaksiya öz fəaliyyətini Ulu Öndərin 1997-ci il 23 dekabr tarixində imzaladığı "Vətən uğrunda həlak olanların xatirəsinin əbədiləşdirilməsi haqqında" Azərbaycan Respublikası Qanununun tələblərinə uyğun qurur. Videoçarxda həmçinin qeyd edilir ki, "Respublika Xatirə Kitabı" ilk illərdə Azərbaycan Milli Ensiklopediyası nəzdində fəaliyyət göstərib, 2016-cı ildən isə Mədəniyyət Nazirliyinin tabeliyinə verilib.
Redaksiya İkinci Dünya müharibəsi, lokal hərbi münaqişələr, 44 günlük Vətən müharibəsi, Aprel döyüşləri, Tovuz hadisələri və 23 saat 43 dəqiqə davam edən antiterror əməliyyatı zamanı şəhid olmuş, itkin düşmüş, əsir və girov götürülmüş vətəndaşlar haqqında ensiklopedik məlumatları özündə əks etdirən 28-dən çox cild nəşr edib. İkinci videoçarxda isə igid şəhidlərin qəhrəmanlığına, xüsusilə 44 günlük Vətən müharibəsində şücaət göstərmiş şəhid əsgər və zabitlərə həsr olunan nəşrlər barədə məlumat verilir. Eyni zamanda həmin nəşrlərin Bakı, Naxçıvan, Şuşa, Gəncə, Mingəçevir, Şirvan, Quba, Sumqayıt, Şamaxı, Biləsuvar və digər şəhər və rayonlarda keçirilmiş təqdimat mərasimlərinin qısa xronikası təqdim olunur. Materialda vurğulanır ki, yerli icra hakimiyyəti orqanları, regional mədəniyyət idarələri və digər dövlət qurumları ilə əməkdaşlıq çərçivəsində keçirilən tədbirlərdə şəhid ailələrinə, qazilərə və ziyalılara təqdim edilən nəşrlər mühüm mənəvi əhəmiyyət daşıyır.
Bildirilib ki, "Heydər Əliyev Xatirə kitabının yaradıcısıdır" kitabı, eləcə də Vətən müharibəsi qəhrəmanlarına həsr olunmuş xatirə nəşrləri gənc nəslin vətənpərvərlik ruhunda tərbiyəsində xüsusi rol oynayır. Videoçarxların ideya müəllifi tarixçi-alim, Fəxri mədəniyyət işçisi Lətifə Məmmədova, mətnlərin redaktoru "Respublika Xatirə Kitabı"nın baş redaktoru Nəzakət Məmmədova, müəllifi isə M.Ş. Vazeh adına Mərkəzi Kitabxananın əməkdaşı Günay Qululudur. Qeyd edək ki, "Respublika Xatirə Kitabı – 30" adlı videoçarxlar M.Ş. Vazeh adına Mərkəzi Kitabxananın rəsmi YouTube kanalında yayımlanıb.
