İkinci Qarabağ müharibəsində Azərbaycanın müqəddəsliyini canından əziz tutub döyüş meydanında yağıya qan udduran igidlərimizdən biri də şəhid Alim Mirzə oğlu Yoldaşovdur. Qana-qan deyib sinəsini Vətənə sipər edib qazanılan qələbəmizin qəhrəmanlıq simvoluna çevrilən Alim Biləsuvarın Nəsimikənd kəndində dünyaya göz açıb. Xalqımızın mənliyini, kimliyini bütün dünyaya bəli etmək üçün 30 il yağı tapdağında olan Qarabağımızın azadlığı uğrunda can qoyub. Vətənin daşına, torpağına sevdalanmaqla adını əbədi olaraq yeni, şanlı tariximizə yazıb. Beləcə, Alimin bu işıqlı dünyaya gəlib-getməsi 23 il çəksə də, ömür yolu gələcək nəsillərə də nümunə olacaq.
Alim Yoldaşov hələ orta məktəbdə oxuduğu illərdə Qarabağ müharibəsində ermənilərin törətdiyi vəhşilikləri eşidə-eşidə böyüyüb. Ürəyində bu qanlı hadisələrin qisasını almaq istəyi ilə orta məktəbi başa vuran Alim ordu sıralarına yollanıb. Vətən qarşısında övladlıq borcunu cəbhə bölgəsində layiqincə yerinə yetirən əsgər uzun müddət yağı tapdağında qalan hər qarış torpaq uğrunda canından keçməyə hazır olub, keçirilən bütün təlimlərdə fəallıq göstərib. Bir qayda olaraq mərdliyi, cəsurluğu, Vətənə sədaqəti həmişə ona hörmət qazandırıb. Əsgər yoldaşlarına da bildirib ki, Qarabağımızı azad, ölkəmizi müstəqil, xalqımızı xoşbəxt görməkdən ötrü canımızdan, qanımızdan keçmək bizim borcumuzdur. Fədakarlıqla, eləcə qürur, heyrət doğuran məqamlarla dolu bir əsgər həyatını yaşayıb.
Alim əsgərlikdən sonra heç cür evdə qərar tuta bilməyib, yenidən orduya qayıdıb və silaha sarılıb yağıya qarşı döyüş meydanına atılmaq üçün məqam gözləyib.
27 sentyabr 2020-ci ildə erməni işğalçıların təxribatı nəticəsində İkinci Qarabağ müharibəsi başlananda ürəyi Vətənlə bir döyünən, onun müqəddəsliyinə tapınan qeyrətli oğullar “Vətən bizi çağırır”- deyərək səngərə giriblər. Alim də öndə olmaqla. O, ilk gündən ən qaynar nöqtədə ağır vuruşlarda peşəkar pulemyotçu kimi mərdlik nümunəsini göstərməklə ad qoyub. Yağıya endirdiyi sarsıdıcı zərbələrlə onlara ciddi itkilər verib. Qazandığı hər zəfərə ürəkdən sevinən əsgər erməni dığalara qarşı son damla qanınadək döyüşüb qisasını alacağına bir daha and içib. Qatıldığı əməliyyatlarda nəyin bahasına olursa-olsun yağıya qalib gəlmək onun həyat kredosuna çevrilib.
Bir neçə ciddi sınaqdan alnıaçıq çıxan pulemyotçu Alim Füzuli rayonun və kəndlərinin düşmən tapdağından azad olunması uğrunda gedən ölüm-dirim savaşlarında dığaların kabusuna çevrilməklə onlara qan uddurub. Hər dəfə ulu torpaqların bağrına üçrəngli Azərbaycan bayrağı sancılananda Alim murdar niyyətli erməni qəsbkarlara qarşı daha da amansız olub.
Qəhrəman Vətən oğlu Xocavənd istiqamətində düşmənin xeyli sayda canlı qüvvəsini və ön xəttə yerləşən artilleriya və minaatan batareyalarını dəqiq atəşlə məhv edib.
28 oktyabrda erməni dığaları yenidə Füzuliyə hücum təşkil edib. Onun qəhrəmanlığı sayəsində düşmən ağır itkilərlə məğlub olub. Amma Alim bu zaman özü də qəfil atılan gülləyə tuş gəlib və Vətənə sevdalanan ürəyi əbədi olaraq dayanıb. Adı yaddaşlara köçməklə, həm də ölümündən sonra Alim Yoldaşov dövlət tərəfindən “Vətən uğrunda”, “İgidliyə görə”, Xocavəndin və Füzulinin azadlığı uğrunda medallara layiq görülüb.
Zəfər ORUCOĞLU Azərbaycan Jurnalistlər Birliyinin üzvü
