İyulun 16-da Mingəçevir Dövlət Universiteti (MDU) ilə Türkiyənin nüfuzlu ali təhsil müəssisələrindən biri olan Marmara Universiteti arasında Anlaşma Memorandumu imzalanıb.
Bu münasibətlə MDU-nun rektoru Anar Eminovun rəhbərlik etdiyi nümayəndə heyəti Marmara Universitetində səfərdə olub. Nümayəndə heyətini Marmara Universitetinin rektoru Prof. Dr. Mehmet Emin Okur qəbul edib.
Görüş zamanı Azərbaycan və Türkiyə arasında mövcud olan dostluq və qardaşlıq münasibətlərinin ali təhsil, elm, innovasiya və insan kapitalının inkişafı sahələrində konkret layihələrlə daha da möhkəmləndirilməsinin əhəmiyyəti vurğulanıb. Universitetlər arasında uzunmüddətli, nəticəyönümlü və qarşılıqlı faydalı tərəfdaşlığın qurulması, tələbə və müəllimlər üçün beynəlxalq imkanların genişləndirilməsi, eləcə də birgə elmi potensialın formalaşdırılması ilə bağlı geniş fikir mübadiləsi aparılıb.
İmzalanmış Anlaşma Memorandumunun əsas məqsədi tərəflər arasında qarşılıqlı maraq doğuran sahələrdə mübadilə və əməkdaşlıq proqramlarının yaradılması, tədris və tədqiqat fəaliyyətlərinin inkişaf etdirilməsi, birgə elmi layihələrin hazırlanması, tələbə, müəllim və əməkdaş mübadiləsinin təşviq edilməsidir.
Görüşün əsas nəticələrindən biri Mingəçevir Dövlət Universiteti ilə Marmara Universiteti arasında strateji əməkdaşlığın daha səmərəli, sistemli və ölçüləbilən nəticələr əsasında inkişaf etdirilməsi məqsədilə Birgə Koordinasiya Komitəsinin yaradılması barədə razılığın əldə olunması olub.
Komitə iki universitetin yer aldığı birgə layihələrin hazırlanması və icrasını, ortaq elmi-tədqiqat və tədris laboratoriyalarının yaradılmasını, akademik mobillik proqramlarının həyata keçirilməsini, ikili diplom imkanlarının qiymətləndirilməsini, konfrans və seminarların təşkilini, həmçinin innovasiya və texnologiya transferi sahəsində əməkdaşlığı əlaqələndirəcək.
Razılaşmaya əsasən, Komitə ilkin mərhələdə MDU-nun “Beynəlxalq ticarət və logistika” və “Maliyyə” ixtisaslarında təhsil alan tələbələrinin Marmara Universitetində akademik mübadilə proqramlarında iştirak imkanlarının yaradılması istiqamətində müvafiq tədbirlərin həyata keçirilməsinə xüsusi diqqət yetirəcək.
Komitə mütəmadi iclaslar keçirəcək, fəaliyyət istiqamətləri üzrə yol xəritələri hazırlayacaq, görülmüş işlərin nəticələrini qiymətləndirəcək və əməkdaşlığın inkişaf dinamikasının monitorinqini aparacaq. Memorandumda da hər iki universitet tərəfindən əlaqələndiricilərin müəyyənləşdirilməsi, onların birgə fəaliyyətləri planlaşdırması, akademik nəticələr barədə məlumat mübadiləsi aparması və zərurət yarandıqda fakültə və kafedra nümayəndələrindən ibarət işçi qrupların yaradılması nəzərdə tutulur.
Əməkdaşlıq çərçivəsində tələbə və müəllimlər üçün bir semestrlik və qısamüddətli akademik mübadilə proqramlarının həyata keçirilməsi, yay və qış məktəblərinin təşkili, doktorantlar və gənc tədqiqatçılar üçün elmi staj proqramlarının yaradılması planlaşdırılır.
Bakalavriat, magistratura və doktorantura səviyyəsində təhsil alan tələbələrin tərəfdaş universitetdə təhsil və tədqiqat fəaliyyətinə cəlb olunması, professor-müəllim heyətinin birgə dərslər, açıq mühazirələr və elmi araşdırmalarda iştirakı da əməkdaşlığın əsas istiqamətlərindəndir. Memorandumda bakalavr, magistr və doktorantların təhsil və tədqiqat məqsədilə qəbul edilməsi, professor-müəllim və əməkdaşların tədris və elmi fəaliyyətlərə cəlb olunması nəzərdə tutulur.
Tərəflər süni intellekt, kibertəhlükəsizlik, data analitikası, rəqəmsal transformasiya, yaşıl iqtisadiyyat və davamlı inkişaf sahələrində birgə elmi-tədqiqat layihələrinin hazırlanması barədə razılığa gəliblər.
Bu istiqamətdə TÜBİTAK və TÜRKUNİB kimi beynəlxalq proqram və fondlara birgə layihə müraciətlərinin təqdim olunması, ortaq elmi məqalələrin, monoqrafiyaların və metodik nəşrlərin hazırlanması nəzərdə tutulur.
Memorandum birgə tədqiqat və ömürboyu təhsil proqramlarının həyata keçirilməsini, innovativ tədris və idarəetmə təcrübələrinin mübadiləsini, ətraf mühitin idarə olunması sahəsində ortaq təşəbbüslərin və elmi-metodik nəşrlərin hazırlanmasını da əhatə edir.
Görüşdə kompüter mühəndisliyi, biznesin idarə edilməsi, iqtisadiyyat və təhsil sahələrində bakalavr və magistratura səviyyələrində ikili diplom proqramlarının yaradılması imkanları da müzakirə olunub.
Bu məqsədlə mövcud təhsil proqramlarının və kurikulumların müqayisəli təhlilinin aparılması, kreditlərin qarşılıqlı tanınması, təlim nəticələrinin uyğunlaşdırılması və akademik keyfiyyət təminatı mexanizmlərinin formalaşdırılması nəzərdə tutulur.
İkili diplom proqramları üzrə ilkin akademik və hüquqi qiymətləndirmələr Birgə Koordinasiya Komitəsi və universitetlərin aidiyyəti struktur bölmələri tərəfindən həyata keçiriləcək.
Rektorlar iki universitetin iştirakı ilə elmi-tədqiqat və tədris laboratoriyalarının yaradılmasının, mövcud laboratoriya infrastrukturundan birgə istifadənin və tədqiqatçılar üçün açıq elmi mühitin formalaşdırılmasının vacibliyini qeyd ediblər.
Memorandum çərçivəsində mərkəzlərin, laboratoriyaların və institutların qarşılıqlı faydalı layihələr həyata keçirməsi, həmçinin tərəflərin razılığı əsasında layihə xərclərinin bölüşdürülməsi mümkündür.
Rəqəmsal təhsil istiqamətində birgə onlayn kursların hazırlanması, virtual laboratoriyaların yaradılması, rəqəmsal universitet idarəetməsi, elektron tədris resursları və innovativ qiymətləndirmə mexanizmləri üzrə təcrübə mübadiləsinin aparılması planlaşdırılır.
Əməkdaşlıq proqramında “Azərbaycan–Türkiyə Ali Təhsil Forumu”nun keçirilməsi, Türk dünyasında innovasiya, rəqəmsallaşma, yaşıl iqtisadiyyat və ali təhsilin gələcəyi mövzularında beynəlxalq konfrans və seminarların təşkili də nəzərdə tutulur.
Hər iki universitetin professorlarının açıq mühazirələrinin, ustad dərslərinin, qısamüddətli təlimlərin və elmi görüşlərin təşkili planlaşdırılır. Memorandum simpoziumların, konfransların, qısamüddətli kursların və tədqiqat mövzularına həsr olunmuş görüşlərin keçirilməsini əməkdaşlığın əsas istiqamətlərindən biri kimi müəyyənləşdirir.
Tərəflər tələbə və gənc tədqiqatçıların innovativ ideyalarının dəstəklənməsi məqsədilə startap akselerasiya proqramlarının, hackathonların, innovasiya müsabiqələrinin və mentorluq proqramlarının təşkili imkanlarını müzakirə ediblər.
Universitet–sənaye əməkdaşlığının genişləndirilməsi, elmi nəticələrin real sektora transferi, tələbələrin sahibkarlıq və rəqəmsal bacarıqlarının inkişaf etdirilməsi, eləcə də ortaq texnologiya və innovasiya layihələrinin həyata keçirilməsi əsas prioritetlər sırasında yer alır.
Əməkdaşlıq çərçivəsində Azərbaycan və Türkiyə mədəniyyət həftələrinin təşkili, akademik türk dili və Azərbaycan dili üzrə sertifikat proqramlarının hazırlanması, iki ölkənin tələbə və müəllimləri arasında mədəni dialoqun genişləndirilməsi planlaşdırılır.
Eyni zamanda, Türk dünyasının ortaq tarixi, dili, ədəbiyyatı və mədəni irsinin öyrənilməsi məqsədilə birgə tədqiqat mərkəzinin yaradılması imkanları nəzərdən keçiriləcək.
Görüşün sonunda Mingəçevir Dövlət Universitetinin rektoru Anar Eminov və Marmara Universitetinin rektoru Prof. Dr. Mehmet Emin Okur tərəfindən imzalanan Anlaşma Memorandumu ilə iki ali təhsil müəssisəsi arasında əməkdaşlığın hüquqi və institusional əsasları müəyyənləşdirilib. Sənəddə tərəflərin səlahiyyətli nümayəndələri kimi hər iki universitetin rektorları göstərilib.
Üç il müddətində qüvvədə olacaq Memorandum davam edən proqram və layihələrin sənədin müddəti başa çatdıqdan sonra da yekunlaşdırılmasına imkan verir.
Yeni əməkdaşlıq Mingəçevir Dövlət Universitetinin beynəlxalqlaşma, keyfiyyətli təhsil, rəqəmsal transformasiya, elmi məhsuldarlıq və tələbəyönümlü inkişaf prioritetlərinə uyğun olaraq universitetin qlobal tərəfdaşlıq şəbəkəsinin genişləndirilməsinə, tələbə və əməkdaşlar üçün yeni akademik imkanların yaradılmasına mühüm töhfə verəcək.
