Ali Məhkəmə daşınmaz əmlak mübahisələrində vicdanlı əldəetmə institutunun tətbiqi və əmlakın hansı hallarda əsl mülkiyyətçiyə qaytarılması ilə bağlı hüquqi yanaşmanı açıqlayıb.
Ali Məhkəmənin Mətbuat Xidmətindən verilən məlumata görə, saxta sənədlərlə özgəninkiləşdirilmiş daşınmaz əmlakın sonradan üçüncü şəxslərə satılması hallarında mübahisənin həlli üçün ilk növbədə əmlakın mülkiyyətçinin iradəsi olmadan əlindən çıxdığı sübuta yetirilməlidir.
“Əmlakın geri qaytarılması yalnız iki halda mümkündür: sonrakı alqı-satqı müqavilələrinin yalnız “vicdanlı əldə edən görüntüsü” yaratmaq məqsədilə bağlandığı və ya sonrakı alıcının vicdanlı olmadığı, yaxud vicdanlılığının qanunla qorunmadığı müəyyən edilərsə.
Formal xarakter daşıyan müqavilələr qohumluq və yaxın münasibətlər, bazar qiymətindən xeyli aşağı satış, alıcının əmlaka real maraq göstərməməsi, real alıcılıq qabiliyyətinin olmaması və digər halların məcmusu əsasında müəyyən edilə bilər. Bununla yanaşı, yalnız bir faktın mövcudluğu müqavilənin uydurma hesab olunması üçün kifayət etmir”,-deyə Məhkəmənin Mətbuat Xidmətindən bildirilib.
Ali Məhkəmənin Mətbuat Xidmətinin məlumatına görə, qanun yalnız iki halda alıcını vicdanlı hesab etmir: daşınmaz əmlakın dövlət reyestrindəki qeydiyyata əvvəlcədən etirazın daxil edilməsi və ya alıcının həmin qeydiyyatın əsassız olduğunu bilməsi.
“Vicdanlı alıcıların hüquqları ümumilikdə qanunla qorunsa da, ər-arvadın birgə mülkiyyətinin razılıqsız satılması, ikili qeydiyyat, xüsusi mülkiyyətə verilə bilməyən daşınmaz əmlaklar və əvəzsiz əldə edilən əmlaklar üzrə vicdanlı əldəetmə qaydası tətbiq edilmir.
Qeyd edilib ki, belə mübahisələrə baxılarkən bütün sübutlar məcmu şəkildə qiymətləndirilməli, qanunvericiliyin məqsədi formal olaraq vicdanlı görünən şəxsi deyil, həqiqətən vicdanlı olan alıcını qorumaqdır”,-deyə məhkəmənin Mətbuat Xidmətindən əlavə edilib.
ZÜMRÜD
