23 iyun 2026-cı il tarixində Mingəçevir Dövlət Universitetinin rektoru Anar Eminov qlobal transformativ şirkət olan “Clarivate”in “Ustadla görüş: Tədqiqatda Keyfiyyətə Doğru” rubrikasının fəxri qonağı olub.
“Clarivate” şirkətinin Azərbaycan üzrə rəsmi nümayəndəsi Xəyalə Hacıyevanın moderatorluğu ilə təşkil olunan və “Journal Citation Reports”™️ (JCR) Platformasının 2026-cı il Buraxılışının İcmalı və Yenilikləri” mövzusuna həsr olunan onlayn vebinarda ölkənin və xaricinin müxtəlif universitet və institutlarından yüzlərlə tədqiqatçı, professor-müəllim heyəti və gənc alimlər iştirak edib. Vebinarın keçirilməsində əsas məqsəd Azərbaycanın elm, təhsil və tədqiqat mühitində mühüm rol oynayan ali təhsil rəhbərləri ilə akademik heyəti bir araya gətirmək, tədqiqatda keyfiyyət, beynəlxalq elmi bazalar və müasir akademik göstəricilər barədə faydalı təcrübə mübadiləsi aparmaqdan ibarət olub. Tədbirdə çıxış edən MDU rektoru Anar Eminov müasir dövrdə ali təhsil müəssisələrinin beynəlxalq elmi mühitə inteqrasiyasında “Clarivate” və “Web of Science” kimi qlobal platformaların rolunu xüsusi vurğulayıb. Rektor bildirib ki, elmi nəşrlərin düzgün qiymətləndirilməsi, tədqiqat keyfiyyətinin yüksəldilməsi və impakt faktor göstəricilərinin təhlili universitetlərin strateji inkişaf hədəflərinin mühüm tərkib hissəsidir. “Müasir universitetlərin rəqabəti binaların hündürlüyü ilə deyil, elmi təsirin dərinliyi ilə ölçülür. Keyfiyyətli elm olduqda indekslənmə onun təbii nəticəsinə çevrilir”, – deyə Anar Eminov qeyd edib. Region universitetlərində elmi potensialın gücləndirilməsinə toxunan rektor bildirib ki, beynəlxalq elmi platformaların təqdim etdiyi analitik imkanlar akademik fəaliyyətin daha şəffaf, ölçüləbilən və nəticəyönümlü idarə olunmasına şərait yaradır. O, bu cür vebinarların tədqiqatçıların qlobal elmi mühitə inteqrasiyası, yüksək indeksli nəşrlərə çıxışı və universitetlərin beynəlxalq akademik nüfuzunun artırılması baxımından mühüm əhəmiyyət daşıdığını diqqətə çatdırıb. Anar Eminov qeyd edib ki, MDU-da son illərdə beynəlxalq elmi görünürlüğün artırılması və əməkdaşların nüfuzlu indeks bazalarında təmsil olunan jurnallarda nəşr fəaliyyətinin stimullaşdırılması prioritet istiqamətlərdən biri kimi müəyyənləşdirilib. Bu məqsədlə yüksək kvartilli jurnallarda dərc olunan elmi məqalələrə görə mükafatlandırma mexanizmi təkmilləşdirilib. Hazırda Q1 kvartilli jurnallarda dərc edilmiş və indekslənmiş məqalələrə görə birdəfəlik mükafatın məbləği 3000 manat təşkil edir. Rektor, həmçinin universitetdə elmi fəaliyyətin davamlı qiymətləndirilməsi məqsədilə ASİS – Akademik Stimullaşdırma və İndeksləmə Sistemi adlı rəqəmsal platformanın yaradıldığını bildirib. Platforma vasitəsilə əməkdaşların elmi fəaliyyət göstəriciləri, indekslənən məqalələrin sayı, nəşrin kvartili və digər akademik nəticələr sistemli şəkildə qiymətləndirilir. Cari ilin sonundan etibarən ASİS platforması əsasında formalaşacaq reytinq nəticələrinə uyğun olaraq yüksək göstəricilər əldə edən əməkdaşlara aylıq əməkhaqqına 30 faizədək əlavə tətbiq olunması nəzərdə tutulur. Çıxışda Mingəçevir Dövlət Universitetinin Web of Science bazasında elmi görünürlüğünün mərhələli şəkildə artdığı da diqqətə çatdırılıb. Bildirilib ki, MDU üzrə ümumi WoS məqalələrinin sayı 41-dir. 2024-cü ildə universitet üzrə 5, 2025-ci ildə 9, 2026-cı ildə isə hazırkı mərhələyə qədər 7 məqalə qeydə alınıb. Bu göstəricilər universitetdə elmi nəşr mədəniyyətinin inkişaf etdirilməsi, beynəlxalq indeksli jurnallara çıxış imkanlarının genişləndirilməsi və tədqiqatçıların qlobal akademik mühitə inteqrasiyası istiqamətində aparılan işlərin nəticəsi kimi qiymətləndirilib. Daha sonra vebinarda “Journal Citation Reports”™️ platformasının 2026-cı il buraxılışındakı ən son yeniliklər, elmi jurnalların reytinq göstəriciləri və tədqiqatçıların beynəlxalq bazalardan effektiv istifadə imkanları barədə ətraflı məlumat verilib. Sonda iştirakçıların sualları cavablandırılıb. Qeyd edək ki, tədqiqata və akademik inkişafa dəstək məqsədilə keçirilən bu beynəlxalq statuslu vebinarın sonunda iştirakçılara sertifikatlar təqdim olunacaq.
