Biz heç vaxt Xocalı soyqırımının qisasını ala bilməyəcəyik, ona görə ki, Azərbaycan əsgəri ləyaqətlidir. Uşaq, qoca, qadın, hətta yaralı, köməksiz düşmən əsgərini öldürmədi, öldürməz.
Vətən müharibəsində rəşadətli ordumuzun əsgərləri bunu sübut etdi, düşmənin yaralı əsgərinə yardım etdi, uşaqlarının başına sığal çəkdi. Qocalarına çörək verdi.
Kaş ki, indiki gücümüzdə zamanı geri gedə bilərdik...
Soyuq, qarlı, qaranlıq gecədə mühasirədə, köməksiz qalan xocalılar görəydi ki, "052" gəlir, " Yarasa", " Dəniz pişikləri" irəli atılır... Bunu da görə bilməyəcəyik.. Deməli qisas, əvəz çıxa bilməyəcəyik. Doğrudur biz qalib gəldik, döyüş meydanında mərdlklə onları məhv etdik. Bəzilərini həbs etdik.
Ancaq bu Xocalı qatillərindən istədiyimiz kimi qisas deyildi. Məsələn biz Zorinin dərisini soya bilmədik, hansı ki, o azərbaycanlı uşağı belə etmişdi.. Yeganə çıxış yolumuz, təsəllimiz və borcumuz heç olmasa " Xocalını" unutmamaqdır. Bu o qədər mühümdür ki, milli qürur, bitməyən vətəndaş borcu səviyyəsindədir.
"Xocalını" unutduğumuz günün dünəni qələbəmizi , sabahı milli dövlətçiliyimizi, birisügünü müstəqilliyimizi unudacağıq.
Amma deyəsın indi biz sülh dövrünün çirkinliyini, gölməçə kimi durğunluğunu yaşayırıq. Beynimizi, ruhumuzu yosun, bakteriyalar basır.
Bizi birləşdirmək, milli şüurumuzu, ruhumuzu saflaşdırmaq üçün yenə müharibə lazımıdır? Nə saf cəmiyyət idik, ucalmış, dirçəlmiş milli ruhumuz var idi 44+1 gündə...
Biz iki aparıcının davasını, kim yatmış- kim oyaq mənasız xəbərlərini gündəm etmişik.
Ancaq!
Təsəvvür edin, 34 il əvvəl, bu günü, bu axşamı. Həmən gecədəki azərbaycanlıların yerinə özünüzü qoyun.
Ailə uşaqla girov düşə bilərsiz, yaxud düşmüsüz və ya ata- ananız, oğul uşağınız gözünüz önündə vəhşicəsinə işgəncələrə məruz qalıb, qar, şaxta, ayaqyalın çöllərdəsiz... ALLAHDAN başqa ümid yeriniz yox. Ölkə sahibsiz. Dövlət və dövlətçilik sökülmüş, ilməsi qaçmış palaz...
Və indini gözünüz önünə gətirin. Xocalıda müasir binalar tikirik. Sakinləri qaydır.
Həqiqət müqayisələrlə yellənəndə bilinir, yağ kimi üzə çıxır.
ALLAH şəhidlərimizə rəhmət eləsin, Ali Baş Komandana, qazilərimizə sağlıq versin. Ordumuz, dövlətimizi qorusun.
SADIQ QARAYEV.
