Babək Rayonu Cəhri qəsəbə sakini İskəndərov Əbülfət Rzaqulu oğlu və doğmaları Naxçıvan Diaqnostika Mərkəzinin həkim- kardioloqu və baş həkimi Nail Mehbalıyevə ürəkdən təşəkkür edirlər.
Əbülfət Rzaqulu oğlunun ürəyində ciddi problem olub və vəziyyəti o qədər ağır imiş ki, sağalacağına heç ümidi qalmayıbmış. Ozan Ələsgər babamız yaxşı deyib: "Təbib qarşı gəlsə sağalar yara". Əbülfət kişinin də dərdinə çarə bulan həkim tapılıb. Naxçıvan Diaqnostika Mərkəzinin həkim- karfioloqu və baş həkimi Nail Mehbalıyev bu yaxınlarda Əbülfət Rzaqulu oğlunun ürəyində çox uğurlu əməliyyat aparıb və onu sağlamlığına qovuşdurub. Əbülfət kişi hazırda özünü çox yaxşı hiss edir və onu yenidən həyata tutunduran həkimə baki-xeber.com vasitəsilə ürəkdən təşəkkür edir.
"Nail həkim mənə çox diqqət və qayğı ilə yanaşdı. Mənə münasibəti də, davranışı da, qayğısı da əlləri qədər şəfalıdır, ümidvericidir. Sözün düzü, sağalacağıma heç ümidim qalmamışdı, əlimi üzmüşdüm. Amma Nail həkimin şəfalı əlləri məni yenidən həyata qaytardı. Həkimin yalnız öz peşəsini dərindən bilməsi xəstənin sağalması üçün kifayət deyil, həkim xəstəyə öz doğması kimi yanaşanda xəstə də tez sağalır. Nail həkim mənə öz doğması kimi yanaşdı.
Məni sağaltdığı, yenidən həyata qaytardığı üçün həm özüm, həm ailə üzvlərim, həm də bütün qohum-əqrabam peşəkar həkim-kardioloq, şəfalı əllərin sahibi Nail həkimə ürəkdən təşəkkür edirik! Nail həkim bizim camaatın ümid yeridir!"-deyə Əbülfət Rzaqulu oğlu bildirdi.
İradə SARIYEVA
