21 fevral, dünya miqyasında dil və mədəni müxtəlifliyi təşviq etmək, çoxdilliliyi dəstəkləmək məqsədilə UNESCO tərəfindən 1999-cu ildə elan edilən Beynəlxalq Ana Dili Günüdür. Bu gün, ana dilinin milli kimliyin, mənəvi dəyərlərin və tarixi yaddaşın qorunmasındakı əhəmiyyətini vurğulamaq üçün hər il qeyd olunur. 1999-cu ilin noyabrında UNESCO-nun baş konfransında Banqladeş səfirinin təşəbbüsü ilə təsis edilib və 2000-ci ildən etibarən qeyd olunur.
Bu günün təsis edilməsində məqsəd dil və mədəni müxtəlifliyi qorumaq, ana dilinin saflığını və gələcək nəsillərə ötürülməsini təmin etməkdir.
Ana dili hər bir xalqın milli kimliyinin əsası, mədəni irsinin daşıyıcısı sayılır.
Azərbaycanda da bu gün xüsusi qeyd olunur, Azərbaycan dilinin yad təsirlərdən qorunması və inkişafı əsas mövzulardan biri kimi vurğulanır.
Ümummilli Lider Heydər Əliyev Azərbaycan dilinin dövlət dili səviyyəsinə yüksəlməsi üçün mühüm tədbirlər həyata keçirib. Hələ 1978-ci ildə Azərbaycan dilinin Konstitusiyada dövlət dili kimi təsdiq edilməsi o dövr üçün böyük bir siyasi cəsarət idi. Müstəqillik illərində isə - 2001-ci ildə latın qrafikasına tam keçid və hər il avqustun 1-nin Azərbaycan Əlifbası və Azərbaycan Dili Günü kimi qeyd olunması dilimizin özünəqayıdış prosesini tamamladı. 2002-ci il sentyabrın 30-da “Azərbaycan Respublikasında dövlət dili haqqında” Qanunun qəbul edilməsi dilimizin dövlət dili kimi işlədilməsi, tətbiqi, qorunması və inkişaf etdirilməsi, dünya azərbaycanlılarının Azərbaycan dili ilə bağlı milli-mədəni özünümüdafiə ehtiyaclarının ödənilməsi istiqamətində daha bir addım olub.
Prezident İlham Əliyevin rəhbərliyi ilə Azərbaycan dilinin qorunması məsələsi dövlət siyasətinin prioritet istiqamətlərindən biridir. Prezidentin “Azərbaycan dilində latın qrafikası ilə kütləvi nəşrlərin həyata keçirilməsi haqqında”, “Azərbaycan Milli Ensiklopediyasının nəşri haqqında”, “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın təsdiq edilməsi haqqında”, “Azərbaycan Respublikasının Dövlət Dil Komissiyasının yeni tərkibinin təsdiq edilməsi haqqında”, “Azərbaycan dilinin elektron məkanda daha geniş istifadəsinin təmin edilməsi ilə bağlı bir sıra tədbirlər haqqında” sərəncamları, “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərmanı və bu istiqamətdə görülən işlər dilimizin inkişafına böyük qayğının təzahürüdür.
İradə SARIYEVA
