İlqar Hüseynli: “Birdən-birə bir strukturun üç generalının, nazir müavinlərinin işdən azad olunması və təqaüdə göndərilməsi şübhə doğurur”
Fövqaladə hallar nazirinin üç müavini- general-leytenant Faiq Tağızadə, general-leytenant Etibar Mirzəyev və Orucəli Hacıyev tutduqları vəzifələrdən azad edilərək təqaüdə göndəriliblər. Mətbuatda gedən məlumatlara görə, hər üç müavin eyni vaxtda təqaüdə göndərilib. Hələ indiyə kimi belə hal olmamışdı ki, bir nazirlikdə 3 müavin eyni vaxtda vəzifədən azad edilsin və təqaüdə göndərilsin. Xüsusilə də güc strukturlarında yüksək vəzifəli məmurlar eyni vaxtda yox, müxtəlif vaxtlarda istefaya göndəriliblər. Ancaq bu Fövqaladə Hallar Nazirliyində (FHN) baş verdi və nazirin üç müavini eyni vaxtda vəzifədən azad edilib təqaüdə göndərildilər.
Bu necə izah oluna bilər?Onların hansısa biri saxlanıla bilərdimi? Ya heç olmasa hamısı bir il də vəzifədə saxlana bilərdilərmi?
Ekspert İlqar Hüseynli baki-xeber.com-a bildirdi ki, bu hadisə ictimaiyyətin diqqətini cəlb edən bir məsələdir. “Faktiki olaraq FHN-də de-generalizasiya prosesi baş verib. Yəni dövlətin böyük vəsait xərcləyib illərlə yetişdirdi generalların birdən-birə eyni gündə işdən çıxarılması fikrimcə, onların pensiya yaşı ilə bağlı ola bilməz. Əslinə baxanda, FHN-də elə generallar var ki, yaşca bunlardan xeyli böyükdür.
Bu yaxınlarda Orucəli Hacıyevin varidatı ilə bağlı geniş apaşdırma paylaşılmışdı. Əgər bu paylaşımlar həqiqəti əks etdirirsə, burada söhbət böyük sərvətlərdən, var-dövlətdən, biznes obyektlərdən, daşınmaz əmlakdan və sairdən gedir. Bu nöqteyi-nəzərdən yanaşsaq belə çıxır ki, digər iki general da aşağı-yuxarı az sərvətə sahib olmayıblar. Bu da cəmiyyətdə narazılıqlar yaradan bir məsələdir.
Baxırsan ki, üç nazir müavini işdən azad olunub, üçü də generaldır, üçü də Naxçıvan Muxtar Respublikasının ayrı-ayrı rayonlarındandır. Bəlkə bu faktın özü də, yəni regional prinsip əsasında yaranan münaqişə və üçünün də birdən işdən azad olunması bir qədər düşündürücü görsənir.
Yaxud da bu həmin mülklərin, əmlakların, varidatın ortaya çıxması ilə əlaqədar bunların üçünün də birdən sakit şəkildə işdən çıxması ilə bağlı razılığın nəticəsi də ola bilər.
Azərbaycan dövlətinin bəlli bir büdcəsi var və biz büdcə azlığından əziyyət çəkirik. Yəni hazırda müəyyən sosial proqramların icrasına dövlətin vəsaitinin yetərli olmadığı baxımından maddi vəsait ayrılmır. Ancaq baxırsan ki, hansısa bir nazirliyin, dövlət qurumunun, komitə sədrinin işdən azad olunan müavinin ortaya milyardlarla sərvəti çıxır. Yəni bu qədər talançılıq edən, dəhşətli dərəcədə korrupsiyalaşmış məmurların məsələsi ortalığa çıxanda, bunlar artıq ictimailəşən məqamda onların işdən azad olunması baş verir. Görünür, bununla da nazirlik özünü sığortalamaq istəyir ki, yəni bu məsələlər ortalığa çıxdı və işdən azad etdik. Axtarış versək, Orucəli Hacıyevlə bağlı saytlarda belə bir xəbərlə rastlaşarıq ki, fövqaladə hallar nazirinin milyarder müavini.
Birdən-birə bir strukturun üç generalının, nazir müavinlərinin pensiya yaşı ilə bağlı işdən azad olunması və təqaüdə göndərilməsi şübhə doğurur. Hər halda bunun arxasında dayanan faktorlar başqadır və bu maliyyə vəsaitlərinin, pulların mənimsənilməsinin və yaxud da digər məsələlərin gündəmə gəlməsi fonunda atılan addım kimi dəyərləndirilə bilər”-deyə İ.Hüseynli qeyd etdi.
İradə SARIYEVA
