Qafqaz Müsəlmanları İdarəsinin (QMİ) Gəncə bölgəsi üzrə qazisi, "İmamzadə ziyarətgah" kompleksinin imamı Hacı Tahir Abbasov çağrış edib ki, Gəncədə yas mərasimlərində israfçılığın qarşısı alınsın. Məlumat üçün bildirək ki, 2011-ci ildə bu məsələ ilə bağlı ilk dəfə ölkə miqyasında “Bakı-Xəbər” qəzeti təşəbbüslə çıxış edib və fundamental bir tədbir keçirib. “Bakı-Xəbər” qəzetinin “İslamda yas mərasimləri və əyintilər” mövzusunda 2011-ci ildə keçirdiyi peşəkar jurnalistlər, həvəskar yazarlar və ictimaiyyət nümayəndələri arasında yazı müsabiqəsi o vaxt böyük maraqla qarşılandı.
6 ay müddətində müsabiqəyə 61 yazı tədim edildi ki, bu məqalələrin 29-u qəzet, jurnal və internet saytlarda dərc olundu. Məqalələrin 22-i “Bakı-Xəbər” qəzetində, 35-i başqa qəzetlərdə, 4-i isə müvafiq olaraq Modern.az, Qafqaz.info, Milli.az və “Xəzər” jurnalında çap edilmişdi. Məqalələrin 36-ı peşəkar, 25-i həvəskar yazarlar və ictimaiyyət nümayəndələri tərəfindən yazıldı. Ekspertlərin rəyləri əsasında bir məqalə birinci, iki məqalə ikinci, üç məqalə üçüncü yerə, yeddi məqalə isə həvəsləndirici mükafata layiq görülmüşdü ki, müsabiqədə birinci yerə 1000 manat, ikinci yerə 500 manat, üçüncü yerə isə 300 manat məbləğində mükafat verildi. Həvəsləndirici yerləri tutanların hər birinə 100 manat verilib. Mükafatlandırılan 13 nəfərdən 11-i peşəkar yazarlar, 2-i isə ictimaiyyət nümayəndələri oldu.
Çox maraqlıdır ki, bu müsabiqədə əsasən başqa mətbuat orqanlarının əməkdaşları qalib gəliblər, “Bakı-Xəbər”in öz əməkdaşları isə könüllü olaraq müsabiqəyə buraxılmadı. Amma ictimaiyyət nümayəndəsinin “Bakı-Xəbər”də dərc olunan yazısı qalib gəldi, üçüncü yeri tutdu.
Redaksiyanın öz vəsaiti hesabına keçirdiyi “İslamda yas mərasimləri və əyintilər” mövzusunda müsabiqənin nəticələrinə dair mətbuat konfransında “Bakı-Xəbər” qəzetinin baş redaktoru Aydın Quliyev çıxışında qeyd edirdi: “Hamını yas mərasimlərinin keçirilməsində əziyyət çəkir, biz də problemə baxışlar sistemini ortaya qoymaq istədik. Ümid edirəm ki, bu yazılardakı təkliflər və dəyərli fikirlər nə zamansa situasiyanı dəyişməkdə mühüm rol oynayacaq. Bu problemə təkcə dini nöqteyi-nəzərdən yanaşmaq olmaz...”
Onu da vurğulayaq ki, layihə çərçivəsində “Bakı-Xəbər” bir neçə dəyirmi masa da təşkil etdi və bu tədbirlərdə ölkənin tanınmış elm və ədəbiyyat xadimləri, ilahiyyatçılar, tanınmış şəxslər ictimaiyyət nümayəndələri yaxından iştirak edirdi. 15 il bundan əvvəl “Bakı-Xəbər”in həyata keçirdiyi bu fundamental layihə çərçivəsində keçirilən toplantılarda tanınmış şəxslər yas mərasimlərdə israfçılığın qarşısının alınmasının vacibliyini vurğulayır, yasların daha sadə keçirilməsi üçün cəmiyyətə çağrışlar edirdilər.
Dediyimiz kimi, “Bakı-Xəbər”in 15 il əvvəl ictimailəşdirdiyi mövzu bu gün daha da genişlənir.
İradə SARIYEVA
