Qarabag Regional Təhsil İdarəsi fevralın 7-də Bərdə rayon Lənbəran kənd tam orta məktəbində dərsə davamiyyətlə bağlı yayılan görüntülərlə bağlı açıqlama yayıb.
Qeyd edək ki, Bərdə rayonu Lənbəran kənd tam orta məktəbinin fizika müəllimi Qasım Hümmətov sosial şəbəkə hesabında paylaşdığı videoçarxda 11-ci sinif şagirdlərinin dərsə gəlmədiyini iddia edib. Müəllimin yaydığı görüntülərdə sinif otağının boş olduğu görünür.
Qarabağ Regional Təhsil İdarəsinin açıqlamasında isə bildirilir ki, idarə tərəfindən aparılan ilkin araşdırmalar zamanı müəyyən olunub ki, qeyd edilən gün 11-ci sinif şagirdləri 6-cı saatda fizika fənn müəllimi Hümbətov Qasım Ramiz oğlunun icazəsi ilə evə buraxılıblar. Bu səbəbdən həmin dərs saatlarında şagirdlərin iştirakı qeydə alınmayıb: "Məsələ ilə bağlı məktəb rəhbərliyi tərəfindən valideynlərlə söhbət aparılıb, aidiyyəti qrumlara müraciət edilib. Hazırda məktəbdə tədris prosesi gündəlik əsasda monitorinq olunur, əlavə nəzarət tədbirləri gücləndirilib.
Eyni zamanda, qeyd olunan videogörüntüləri paylaşan müəllim barəsində “Təhsil verənlərin etik davranış qaydaları”nın pozulması ilə əlaqədar müvafiq tədbir görülüb".
Haqqında söhbət gedən məktəbin fizika müəllimi Qasım Hümbətov isə deyilənləri təkzib edir. O, Oxu.Az-a açıqlamasında bildirilib ki, Qarabağ Regional Təhsil İdarəsindən verilən açıqlama həqiqəti əks etdirmir: "Şagirdlərə mənim tərəfimdən heç bir icazə verilməyib. Şagirdlər hazırlıq kurslarına getdiyi üçün dərslərdə iştirak etmirlər. Bu proses uzun müddətdir davam edir. Elə məktəb direktoru Mahmud Məmmədovun qızı da həmin sinifdə oxuyur. Mən dəfələrlə davamiyyətlə bağlı yaranan problemlərə görə məktəb rəhbərliyinə də, aidiyyəti təhsil qurumlarına da müraciət etmişəm. Əfsus ki, heç bir tədbir görülmür. Məktəbimiz rayon içərisində yüzə yaxın təhsil ocağı arasında ən son sırada yer alanlardan biridir.
Dəfələrlə şikayət etdiyimə görə, qanunsuz olaraq işdən azad edilmişəm və məhkəmənin qərarı əsasında işimə bərpa olunmuşam.
Həmçinin Qarabağ Regional Təhsil İdarəsinin barəmdə müvafiq tədbirlər görülməsi ilə bağlı verdiyi açıqlama da həqiqəti əks etdirmir. Barəmdə heç bir tədbir görülməyib və əgər görülübsə də, bu barədə mənə heç bir məlumat verilməyib".
Göründüyü kimi müəllim Təhsil İdarəsinin açıqlamalarını təkzib edir.
Burada diqqət çəkən bir neçə məqam var. Təhsil İdarəsinin açıqlamasında qeyd edilir ki, şagirdlər fizika müəllimi Qasım Hümbətovun icazəsi ilə evə buraxılıb. Sözügedən videonu da elə fizika müəllimi Qasım Hümbətov yayıb. Buradan belə çıxır ki, müəllim Qasım Hümbətov şagirdləri evə buraxır, sonra da boş sinifi videoya alıb, bildirir ki, 11-ci sinif şagirdləri dərsə gəlmir. Yaxşı müəllimin nə marağı olub ki, şagirdləri evə buraxır, sonra da çəkib göstərir ki, şagirdlər dərsə gəlmir? Bəlkə həqiqətən 11-ci sinif şagirdləri dərsə gəlmir?
Digər tərəfdən, Təhsil İdarəsinin açıqlamasında ziddiyətli bir məqam da var. Qeyd edilir ki, məktəb rəhbərliyi valideynlərlə söhbət aparıb. Əgər doğrudan şagirdlər müəllimin icazəsi ilə evə buraxılıbsa, valideynlərlə söhbətə nə ehtiyac vardı?
Təhsil İdarəsinin açıqlamasında bütün bu məqamlara aydınlıq gətirilmir. Sadəcə müəllimin barəsində tədbir görüldüyü bildirilir… Müəllim isə bunu təkzib edir. Bu suallar isə açıq qalır. Kim haqlıdır, müəllim, ya məktəb rəhbərliyi…
Tahir TAĞIYEV
