Elyar İslamoğlu: “Yüksək nəticə göstərən müəllimlərin marker kimi cəlb edilməsi qiymətləndirmənin keyfiyyətini və obyektivliyini artıracaq”
“Marker (ekspert qiymətləndirici) kimi fəaliyyət göstərmək üçün Dövlət İmtahan Mərkəzi (DİM) tərəfindən təşkil olunan təlimlərə müəllimlərin qoşulmasına çağırış etmişdim. Məqsəd markerlərin sayını artırmaqdır”. Bu fikirləri "Azərtac"a müsahibəsində DİM-in İdarə Heyətinin sədri Məleykə Abbaszadə deyib. O bildirib ki, müəllimlərin sertifikatlaşdırma prosesindən uğurla keçənlər arasında fənlər üzrə ən yüksək nəticə göstərənləri təlimlərə cəlb etmək üçün Elm və Təhsil Nazirliyinə rəsmi müraciət ünvanlanıb.
DİM rəhbəri prioritetin yüksək nəticə göstərən müəllimlər olduğunu vurğulayıb: “Müraciətdə sertifikasiya imtahanlarında fənlər üzrə ən yüksək nəticə əldə edən müəllimlərin siyahısının bizə təqdim olunması xahiş edilib. Bu siyahı əsasında həmin müəllimləri marker təlimlərinə cəlb edəcəyik. Bizim üçün vacibdir ki, həmin müəllimlər öz fənlərindən 90 faizdən yuxarı nəticə göstərsinlər. Belə müəllimlərin sayı kifayət qədər deyil”.
Qeyd edək M.Abbaszadə keçən il verdiyi müsahibələrdən birində orta ümumtəhsil məktəblərinin buraxılış imtahanlarının mart ayında keçirilməsinin səbəblərini izah etmişdi. M.Abbaszadə deyirdi ki, saysız yazılar yoxlanılır və marker-müəllim çatışmazlığı üzündən qiymətləndirməni aparmaq çətin olur. Yəni marker-müəllim tapa bilmədikləri üçün proses ilin əvvəlində başlanır. O, bildirirdi ki, marker-müəllimlər üçün imtahan keçirməyi qarşılarına məqsəd kimi qoyublar. DİM-in İdarə Heyətinin sədrinin o vaxt imtahanla bağlı açıqlaması narazılıqla qarşılanmışdı. “Bakı-Xəbər” qəzetinin baş redaktoru Aydın Quliyev öz rəsmi “Facebook” hesabında bu məsələyə tənqidi reaksiya vermişdi: “...Müəllimlər onsuz da bir neçə kütləvi və üzücü imtahan-test proseslərindən ( işə qəbul, direktorluğa qəbul, sertifikasiya və sair) keçirildiyi halda, onları növbəti imtahan prosesinə cəlb etməyin nə mənası var?! Müəllimlər məgər illər boyu tədris işini bir kənara qoyaraq hansısa imtahana hazırlaşmalıdır?! Bu müəllim oxuyub-öyrəndiklərini şagirdə nə vaxt öyrədəcək bəs?!... Demişdim ki, DİM-in "mürəkkəbləşdirdiyi " bu problemin sadə həll yolu var. Yetər ki, Təhsil Nazirliyi ilə DİM-in arasında sağlam əməkdaşlıq qurulsun, ya varsa, onun imkanlarından səmərəli istifadə olunsun. Necə? Təklif etdim ki, Təhsil Nazirliyinin sertifikasiya imtahanlarından keçmiş və yüksək nəticə göstərmiş müəllimlər marker-müəllimlər olaraq DİM-in buraxılış imtahanlarına cəlb edilsinlər...”
“Bakı-Xəbər”in baş redaktorunun irəli sürdüyü təklif öz bəhrəsini verir və artıq DİM müəllimlərin sertifikatlaşdırma prosesindən uğurla keçənlər arasında fənlər üzrə ən yüksək nəticə göstərənləri təlimlərə cəlb etmək üçün Elm və Təhsil Nazirliyinə rəsmi müraciət ünvanlanıb.
Filogiya üzrə fəlsəfə doktoru, təhsil eksperti Elyar İslamoğlu baki-xeber.com-a bildirdi ki, DİM-in bu prosesə müəllimlərin sertifikatlaşdırma prosesindən uğurla keçənlər arasında fənlər üzrə ən yüksək nəticə göstərənləri təlimlərə cəlb etməsi çox müsbət nəticə verəcək.
“Bu müraciət DİM və Elm və Təhsil Nazirliyi arasında real əməkdaşlıq cəhdi kimi qiymətləndirilməlidir. İllərdir deyilirdi ki, qiymətləndirmə, imtahan və tədris prosesləri bir-birindən ayrı düşünülməməlidir. Məleykə Abbaszadənin müraciəti göstərir ki, artıq sertifikasiya nəticələri real qərarvermədə istifadə olunur, bu da ictimai rəyin və ekspert çağırışlarının nəzərə alındığını sübut edir”.
E.İslamoğlu qeyd etdi ki, ikincisi, yüksək nəticə göstərən müəllimlərin marker kimi cəlb edilməsi prinsipcə doğrudur. “90%-dən yuxarı nəticə tələbi markerin öz fənnini dərindən bilməsi, qiymətləndirmə meyarlarını düzgün anlaması, subyektivlik riskini azaltması baxımından əsaslandırılıb.
Bu həm də müəllimlər üçün motivasiya mexanizmi yaradır-yaxşı nəticə, peşəkar inkişaf əlavə məsuliyyət və nüfuz. Qısaca desək, bu addım DİM və Elm və Təhsil Nazirliyi arasında əməkdaşlığın gücləndirilməsi və sertifikasiya nəticələrinin real tətbiqə çevrilməsi baxımından müsbət və vacib təşəbbüsdür. Yüksək nəticə göstərən müəllimlərin marker kimi cəlb edilməsi qiymətləndirmənin keyfiyyətini və obyektivliyini artıracaq”-deyə E.İslamoğlu vurğuladı.
İradə SARIYEVA
