Kamran Məmmədli: “Sərnişinlər 30-40 manata taksidən istifadə etməyəcək, taksi sürücülərinin isə gəliri azalacaq”
Taksi fəaliyyəti ilə bağlı tətbiq edilən yeni tələblər sürücülər arasında ciddi narazılıq doğurub. Xüsusilə paytaxt və ətraf şəhərlərdə çalışan taksi sürücüləri qeyd edirlər ki, ərazi üzrə məhdudiyyətlər onların gündəlik qazanc imkanlarını əhəmiyyətli dərəcədə azaldıb.
Yeni qaydalara əsasən, Bakıda qeydiyyatdan keçmiş sürücülərin Sumqayıt ərazisində, Sumqayıtda qeydiyyatda olan taksi sürücülərinin isə Bakıda sərnişin götürməsinə icazə verilmir.
Mövcud vəziyyətdən sui-istifadə edən taksi sürücüləri gediş haqqını iki yox, üç dəfə artırıblar. Bakı–Sumqayıt xətti üzrə taksilərdə qiymət 30 manata yüksəlib ki, bu da sərnişinlərin narazılığına səbəb olub.
İqtisadçı ekspert Kamran Məmmədli baki-xeber.com-a açıqlamasında bildirdi ki, taksi ilə daşınma digər nəqliyyat növləri ilə müqayisədə daha sürətli, daha səmərəli və “qapıdan qapıya” xidmət prinsipi əsasında həyata keçirilir: “Vaxt itkisi və xidmət keyfiyyəti baxımından taksilər üstün mövqedədir. Ancaq son zamanlar taksilərlə bağlı tətbiq edilən yeni qaydalar bu sahədə vəziyyəti çətinləşdirir. Bu vəziyyətdən həm taksi sürücüləri, həm də sərnişinlər əziyyət çəkəcək. Sərnişinlər 30-40 manata taksidən istifadə etməyəcək, taksi sürücülərinin isə gəliri azalacaq. Nəzərə almaq lazımdır ki, Bakı–Sumqayıt marşrutu minlərlə insan üçün gündəlik zərurətdir. İşə gedən, dərsə çatan, tələsən insanlar üçün taksi bəzən yeganə alternativdir. Bu yanaşma düzgün deyil”.
Günel CƏLİLOVA
