Eyyub Kərimli: “Həm qlobal miqyasda, həm də ölkə daxilində baş verən iqtisadi proseslər və yeni trendlər əmək bazarına təsir göstərir”
Bu günlərdə Dövlət Məşğulluq Agentliyi tərəfindən açıqlanan bir məlumat böyük marağa səbəb olub. Belə ki, Agentliyin İdarə Heyətinin sədri Hasil Abbasov ötən ilin yekunları və 2026-cı il üçün hədəflərə dair keçirilən mətbuat konfransında bildirib ki, qurumun vakansiya bankında hazırda 61 mindən çox iş yeri mövcuddur. Maraqlıdır, ölkədə 60 mindən çox boş iş yeri varsa, niyə işsizlik problemi hələ də aktualdır?
Rəsmi statistikaya əsasən, 2025-ci il noyabrın 1-nə olan ilkin məlumatlara görə, ölkədə işsizlərin sayı 278,9 min nəfərdir. İşsizlik səviyyəsi ölkə üzrə 5,2 faiz təşkil edir. İqtisadi fəal əhalinin sayı 5 milyon 381,5 min nəfər olsa da, onların yalnız 5 milyon 102,6 mini məşğul əhali hesab olunur.
İqtisadçı Eyyub Kərimli baki-xeber.com-a şərhində bildirdi ki, Dövlət Məşğulluq Agentliyinin məlumat bazasında yer alan vakansiyalar hər zaman iş axtaranların tələblərinə cavab vermir: “Əmək haqqının aşağı olması, ixtisasla uyğunluğun təmin edilməməsi, eləcə də iş yerlərinin yaşayış yerindən uzaqda yerləşməsi bir çox vakansiyanın boş qalmasına səbəb olur. Mövcud vəziyyət fonunda ixtisaslı və ali təhsilli şəxslərin işsiz qalması diqqət çəkir. İşsizlik problemi təkcə ölkəmizdə deyil, dünyanın bir çox dövlətlərində müşahidə olunur və bu, birbaşa iş yerlərinin olmaması ilə əlaqəli deyil. Bəzi hallarda əmək bazarında yüksək ixtisas tələb edən sahələr üzrə kadr çatışmazlığı yaranır”.
Ekspertin fikrincə, həm qlobal miqyasda, həm də ölkə daxilində baş verən iqtisadi proseslər və yeni trendlər əmək bazarına təsir göstərir və daha peşəkar kadrların axtarışını aktuallaşdırır.
Günel CƏLİLOVA
