Vətən müharibəsində şəhidlik zirvəsinə ucalan Lerikin qəhrəman oğlanlarının adları xalq tərəfindən həmişə qürurla, iftixarla çəkilir. Həm də onların xatirəsini yaşatmaq üçün çox dəyərli işlər görülür. İndi dağlar diyarında şəhid adını daşıyan bulaqlar, parklar, küçələr, mədəniyyət ocaqları, məktəblər çoxdur. Rayonun Peştətük kəndində şəhidlərin xatirəsinə inşa olunmuş “Zəfər parkı” memorial abidə kompleksi uzaqdan belə öz möhtəşəmliyi ilə diqqəti cəlb edir. Bu günlər Lerik Rayon İcra Hakimiyyəti başçısının səlahiyyətlərini icra edən Cəlil Baxşıyevin, Azərbaycan Respublikası Milli Məclisinin deputatı İqbal Məmmədovun, rayonun hüquq mühafizə orqanları rəhbərlərinin, idarə, müəssisə və təşkilat kollektivlərinin, şəhid ailə üzvlərinin, Vətən müharibəsi iştirakçılarının, ziyalılar, ağsaqqallar və ictimaiyyət nümayəndələrinin iştirakı ilə abidə kompleksin açılışı oldu.
Ziyarətçilər şəhidlərin xatirəsinə ehtiram əlaməti olaraq abidə kompleksin önünə əklil və tər gül-çiçək dəstələri qoydular. Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev çıxış etdi. O, dedi: - Vətən müharibəsində qazandığımız Şanlı Qələbənin təcəssümü olan Zəfər gününün birinci ildönümünü iftixarla keçirdik. Bu qələbə tariximizin ən parlaq səhifəsidir, Azərbaycan xalqının qürur mənbəyidir. Azərbaycan xalqı öz liderinin - müzəffər Ali Baş Komandan İlham Əliyevin ətrafında sıx birləşməklə bütün dünyaya öz gücünü, mətinliyini, mübarizliyini bildirdi. Ölkə başçımızın 17 ildə həyata keçirdiyi siyasətin nəticəsində ölkəmiz 30 ilə yaxın davam edən münaqişədə qalib tərəfə çevirdi. Azərbaycana məxsus torpaqlar birmənalı olaraq düşmən tapdağından təmizləndi. Düzdür, bu zəfər heç də asan başa gəlmədi. Lerik rayonu 46, ölkəmiz isə 3000-ə yaxın şəhid verdi. Mən bütün şəhid valideynlərinin qarşısında baş əyirəm. Onlara sonsuz məhəbbət və ehtiramımı bildirirəm.
Mərasimdə Azərbaycan Respublikası Milli Məclisinin deputatı İqbal Məmmədov, SHXÇDX-nin Lerik rayon şöbəsinin rəisi polkovnik Arif Həsənov, şəhid ataları Ağaverdi Ağayev, Tahir Mövlanov və Qəhrəman Həşimov, şəhid qardaşı Namiq Musayev çıxışında şəhidlərin adının yaddaşlara yazılması istiqamətində həyata keçirilən tədbirlərə, şəhid ailələrinə göstərilən diqqət və qayğıya görə ölkə başçısına, eləcə də abidənin ərsəyə gəlməsində əməyi olan hər kəsə minnətdarlıq etdilər Məktəblilərə də söz verildi. Onların ifasında Vətənə, şəhidlərə həsr olunmuş şerlər səsləndi. Sonda dövlət tərəfindən ölümündən sonra təltif edilmiş şəhid Balaş Fərziyev və Ceyhun Səfərovun medalları ailə üzvlərinə verildi.
Zəfər ORUCOĞLU Azərbaycan Jurnalistlər Birliyinin üzvü
