Mayın 12-də paytaxtın Binəqədi rayonunda yerləşən “EuroHome” tikinti materialları bazarında yenidən yanğın baş verib. Ərazisi təxmini 22500 kv.m-ə yaxın olan bazarın 3300 kv.m. hissəsi yanıb. Yanğın xüsusilə taxta, dik, boya, xırdavat materiallar satılan mağazaları əhatə edib.
Mağaza sahiblərinin yaydığı məlumatda qeyd edilir ki, üçüncü sırada yerləşən təxminən 10-a yaxın mağaza yanaraq kül olub, mallarının böyük hissəsi yararsız hala düşüb.
Malları yanan mağaza sahibləri bildirirlər ki, bazara heç bir sığorta şirkəti girmədiyi üçün obyektləri sığortalanmayıb.
Maraqlıdır, sığorta şirkətləri böyük bazarları sığorta etməkdə həvəsli deyillər. Apardığımız araşdırma zamanı məlum oldu ki, sığorta olunmazdan əvvəl obyekt və bazarların risq qrupuna daxil olub-olmadığı araşdırılır. “EuroHome” bazarı ilə bağlı isə qeyd olundu ki, yanğınların səbəbi bilinmədiyi üçün şirkətlər sığorta etmək istəmirlər.
Azərbaycan Mərkəzi Bankının sədri Elman Rüstəmov media nümayəndələrinə açıqlamasında qeyd edib ki, ticarət mərkəzində baş vermiş hadisə ilə bağlı hələ ki, konkret bir söz deyə bilməz, amma bu məsələ ilə bağlı araşdırma aparılacaq. Kimin sığortası varsa, kompensasiya alacaq.
“...sahibkarları zərərlərlə üz-üzə qoyur”
Məsələ ilə bağlı fikir bildirən sığorta üzrə ekspert İlkin İbrahimov qeyd etdi ki, “EuroHome” tikinti materialları bazarındakı məsələ artıq təhlükəli hal alıb və ciddi araşdırma tələb edən məsələlərdən birinə çevrilib: “Bu günə kimi baş verən yanğınlardan görünən odur ki, belə halların təhlükəsizliyinə nəzarət edən qurum daim qarşı tərəfi ittiham edir. Bu ittihamlar onu göstərir ki, onlar da bu məsələdə irəliləyişə nail ola bilmirlər. Bu məsələdə tək sahibkarlar və bazar sahibi məsuliyyət daşımır. Çünki bazarın təhlükəsizlik qaydalarına nəzarət və orada qayda-qanunun yoxlanılması birbaşa FHN-in vəzifəsidir. Bu günə kimi bütün yanğınlardan sonra bu qurum hər dəfə qarşı tərəfi günahlandırır. Bu azmış kimi, heç kim onlardan buna qədər hansı tədbirləri gördüklərini ya soruşmur, ya da soruşduqda onlardan sənəd əsasında sübut ala bilmirlər. İnzibati Xətalar Məcəlləsinə əsasən, obyektləri və bütöv bazarı sığortalamamağa görə FHN-in səlahiyyətli şəxsləri dükan sahiblərini və bazar rəhbərini cərimələməli idilər. Lakin maraqlıdır ki, belə tənbeh tədbirləri görülməyib. Digər tərəfdən, sahibkarların bu məsələdə günahı ondan ibarətdir ki, onlar birinci yanğın hadisəsindən sonra sığortalanmağa ciddi yanaşmayıblar. Ümumiyyətlə, bütün sahibkarlar bu məsələdə həm dövlətin, həm də əlaqədar qurumların tələb və tövsiyələrini heçə sayırlar. Bu da hadisədən sonra sahibkarları zərərlərlə üz-üzə qoyur”.
Ekspertin sözlərinə görə, daşınar əmlakla bağlı sığortalanma səviyyəsi ölkə üzrə, ümumilikdə, zəif gedir: “Lakin xüsusilə sahibkarlar üçün daşınar əmlakın sığortası vacibdir. Eyni zamanda, daşınar əmlakın sığortalanması üçün sahibkarların da mühasibatlıqlarının rəsmiləşdirilməsi çox vacibdir. Belə ki, daşınar əmlak sığortalanan zaman nə qədər malın bilinməsi üçün mütləq mədaxil olunan mal görünməlidir. Bu ona görədir ki, sığorta şirkəti də öz risqini, yəni gələcəkdə baş verən hadisədə nə qədər ödəməli olmasını hesablasın”.
Günel CƏLİLOVA
