Məlum olduğu kimi, mayın 12-də Sumqayıtda “Gilan Tekstil Park” Məhdud Məsuliyyətli Cəmiyyətin tibbi maska fabrikinin və tikiş fabrikinin nəzdində fəaliyyət göstərən qoruyucu kombinezonların istehsalı müəssisəsinin açılışı olub. Açılışda iştirak edən Prezident İlham Əliyev bir sıra məsələlərə toxunub.
Prezident qeyd edib ki, indiki şəraitdə cəmiyyətdə mövcud olan həmrəylik bəlkə ən yüksək səviyyədədir: “Çünki bütün cəmiyyət bu mübarizədə birləşib. Fürsətdən istifadə edərək özəl sektorun nümayəndələrinə, ictimai təşkilatlara, ayrı-ayrı adamlara bir daha təşəkkürümü bildirmək istəyirəm, həm ianələrə, həm vətəndaşlara göstərdikləri yardımlara, həm də bu qısa müddət ərzində tibbi sənayeni bizim maraqlarımıza uyğun şəkildə təşkil etdiklərinə görə. Bu gün ehtiyac içində yaşayanlara da özəl sektor, ictimai təşkilatlar tərəfindən yardım göstərilir. Onların arasında birinci yerdə, əlbəttə ki, Heydər Əliyev Fondu dayanır. Fond, ayrı-ayrı adamlar ehtiyacı olan insanlara kütləvi surətdə kömək göstərirlər, kimin imkanı nəyə çatır etməlidir. Bu, bizim xalqımıza xas olan ən yüksək keyfiyyətləri bir daha göstərir. Ümid edirəm ki, pandemiya gec-tez sona çatacaq, ondan sonra bu həmrəylik ovqatı, həmrəylik əhval-ruhiyyəsi cəmiyyətimizdə daha da güclənəcək.
Bu bir daha göstərir ki, özəl sektor bizim çağırışımıza cavab verərək öz sosial məsuliyyətini nümayiş etdirir. Eyni zamanda, mənim təşəbbüsümlə yaradılmış Koronavirusla Mübarizəyə Dəstək Fondunda artıq 100 milyon manatdan çox vəsait yığılıb. Bu bir daha göstərir ki, vətəndaşlar, sahibkarlar həmrəylik, birlik nümayiş etdirirlər. Ona görə qabaqlayıcı tədbirlərin görülməsi birinci mərhələdə imkan verdi ki, biz bu vəziyyətdən az itkilərlə çıxaq”.
Maraqlıdır, karantin dönəmində yaşanan həmrəylik pandemiyadan sonra da müşahidə olunacaqmı?
“Kimliyindən, vəzifəsindən asılı olmayaraq, hər kəs ehtiyacı olan ailələrə yardım etdi”
“Vəfa” Sosial-İctimai Birliyinin rəhbəri Fatimə Hacıbəyli qeyd etdi ki, pandemiya dönəmində hər bir azərbaycanlı həmrəylik nümayiş etdirdi: “Kimliyindən, vəzifəsindən asılı olmayaraq, hər kəs ehtiyacı olan ailələrə yardım etdi. Sevindirici haldır ki, bu istiqamətdə ölkəmizdə həmrəylik yaşandı. Təşkilatlar, fərdi şəxslər, sahibkarlar həm aztəminatlı ailələrə yardım etdi, həm də Koronavirusla Mübarizəyə Dəstək Fonduna müəyyən məbləğdə vəsait köçürdülər. Düzdür, miqyasına görə Heydər Əliyev Fondu bu sahədə böyük iş gördü. Ancaq ictimai təşkilatlar və sahibkarlar ehtiyacı olan ailələrə yardım etdilər”.
Birlik sədri hesab edir ki, pandemiya dövründə müşahidə olunan həmrəylik koronavirus tam yox olduqdan sonra da mümkün olacaq. Çünki insanlar yardım etməyi, ehtiyacı olan ailələrə dəstək olmağı özlərinə vəzifə biləcəklər.
Günel CƏLİLOVA
