Koronavirus pandemiyası ilə mübarizə tədbirləri çərçivəsində, bütün sahələrdə olduğu kimi, həbsxanalarda da ciddi tədbirlər görülüb. Dəfələrlə Ədliyyə Nazirliyinin müvafiq qurumları tərəfindən mətbuata bildirilib ki, dustaqların bu virusa yoluxmaması üçün bütün lazımi tədbirlər görülür.
Ədliyyə Nazirliyindən baki-xeber.com-a verilən məlumata görə, Azərbaycan Respublikası Nazirlər Kabineti yanında Operativ Qərargahın tələb və tövsiyərinə uyğun olaraq, Ədliyyə Nazirliyi tərəfindən koronavirus (COVID-19) infeksiyasının yarada biləcəyi təhlükənin qarşısının vaxtında alınması məqsədilə bütün struktur qurumlarda, o cümlədən, penitensiar müəssisələrdə ardıcıl tədbirlər görülür.
Nazirlikdən verilən məlumata görə, Azərbaycanda koronavirusa yoluxan 33 məhkum karantinə alınıb. Xüsusi karantin rejiminin qaydalarına əsasən, penitensiar və tibb xidmətləri gücləndirilmiş iş rejiminə keçib, penitensiar müəssisələrdə davamlı olaraq dezinfeksiya işləri, əməkdaşların, məhkumların və həbs edilmiş şəxslərin gündəlik termometriyası, səhhətlərində hər hansı narahatlığı olan şəxslərin dərhal izolyasiya olunaraq müayinəsi keçirilir.
Həmçinin, vətəndaşların penitensiar müəssisələrə daxil olması, məhkum və həbs edilmiş şəxslərə görüşlərin verilməsi, habelə gətirilən sovqatların qəbul edilməsi müvəqqəti olaraq dayandırılıb. Əməkdaşlar və digər aidiyyəti şəxslər (vəkil, müstəntiq, həkim və s.) və nəqliyyat vasitələri müəssisələrə karantin rejiminə uyğun xüsusi qaydada buraxılırlar.
Eyni zamanda, qabaqlayıcı tədbirlər çərçivəsində Penitensiar Xidmətin İxtisaslaşmış müalicə müəssisəsində izolyasiya və müalicə məqsədilə xüsusi karantin şöbələri yaradılıb. Bəzi xroniki xəstəlikləri olan məhkumlar isə cəzaçəkmə müəssisəsindən kənarda ixtisaslaşmış xəstəxanalarda müayinədən və müalicədən keçirilirlər. Kənara çıxarılmış belə məhkumların birində virusa yoluxma faktı aşkar olunduğundan, o dərhal təcrid edilərək zəruri tibbi tədbirlər görülüb.
Penitensiar müəssisələrdə, o cümlədən, 13 saylı cəzaçəkmə müəssisəsində məhkumlar və əməkdaşlar arasında COVID-19 müayinələri aparılıb. Test nəticələri 33 məhkumda müsbət çıxdığından, onlar dərhal izolyasiya olunaraq xüsusi karantinə yerləşdirilib və müvafiq müalicə tədbirləri görülüb. Xəstələrin vəziyyəti hazırda stabildir və onlar həkim nəzarəti altında saxlanır.
Bununla yanaşı, virusun yayılma risqi tam lokallaşdırılıb və xəstələrin müalicəsi üçün bütün zəruri tibbi avadanlıq və dərman təminatı mövcuddur.
Penitensiar müəssisələrdə pandemiyanın yayılmasının qarşısının alınması məqsədilə kompleks dezinfeksiya, tibbi-profilaktik və digər qabaqlayıcı tədbirlər davam etdirilir.
Onu da vurğulayaq ki, respublikamızda pandemiyanın yayıldığı ilk vaxtlardan məhkumların ailə üzvləri ilə görüşməsinə, ərzaq qəbuluna və s. məhdudiyyətlər qoyulub.
Nəzərə alsaq ki, pandemiya ilə əlaqədar olaraq həbsxanalara gediş-gəlişlə bağlı məhdudiyyətlər tətbiq olunub, dustaqlar ailə üzvləri ilə görüşmür, ünsiyyətdə olmur, bu halda, 33 nəfər məhkum koronavirus infeksiyasına necə yoluxub?
“...bunun zərərini azaltmaqdan söhbət gedir”
Ədliyyə Nazirliyi yanında İctimai Komitənin üzvü, hüquqşünas Səadət Bənənyarlı “Bakı-Xəbər”ə bildirdi ki, 33 nəfər məhkumun hansı yolla koronavirusa yoluxması səbəbi məlum deyil. Bu məsələ tam araşdırıldıqdan sonra bu barədə hansısa bir fikir söyləmək olar. Onun sözlərinə görə, yəqin ki, bu məsələ tezliklə aydınlaşar. “Bilirsiniz ki, pandemiya başlayandan sonra Azərbaycan həbsxanalarında bütün lazımi tədbirlər görülmüşdü. Amma nə qədər tədbirlər görülsə də, təəssüf ki, bu hal baş verib. Bu istiqamətdə yenə də tədbirlər görülməlidir. Bu gün bu istiqamətdə Ədliyyə Nazirliyi tərəfindən çox qəti addımlar atılır. Mən bunu bildiyim üçün deyirəm. Yəni həbsxanalarda fəaliyyət göstərən insanlar gecə-gündüz işləyirlər, məhkumların bu virusdan qorunması üçün addımlar atırlar”.
S.Bənənyarlı vurğuladı ki, məhkumlardan hansınınsa həbsxanadan çıxışı yoxdur. Onun sözlərinə görə, həbsxanalarda vaxtlı-vaxtında antivirus tədbirləri görülüb: “Məhkumlardan hansınınsa oradan çıxışları da yoxdur. Amma həbsxanaya virusun necə düşməsi ilə bağlı məsələni yəqin ki, aydınlaşdırarlar. Bilirsiniz ki, həbsxanalara məhkumlar üçün ayrıca yeməklər gedirdi. Eyni zamanda da həbsxanaların təchizat və digər məsələləri diqqətdə saxlanır, həbsxanalar vaxtlı-vaxtında dezinfeksiya olunur, hər şey yoxlanır, profilaktik tədbirlər və s. görülür. Məhkumların vəkillərlə görüşləri də olub. Məhkumların koronavirusa necə, hansı yolla yoluxduğunu dəqiq söyləmək çətindir. Mən bunun səbəbini dəqiq deyə bilmərəm, çünki bilmirəm. Amma bu fakt varsa, bunun zərərini azaltmaqdan söhbət gedir. Bunun üçün də bütün lazımi tədbirlər görülür” - deyə S.Bənənyarlı qeyd etdi.
İradə SARIYEVA
