11 may 2020-ci il tarixində saat 22:51-də Bakı şəhərinin Binəqədi rayonunda yerləşən “EuroHome” tikinti materialları bazarında yanğın baş verib. Yanğın saat 00:30-da məhdudlaşdırılıb, 01:30-da isə tam söndürülüb.
Ümumi sahəsi təqribən 22 500 kv.m.-ə yaxın olan bazarın 3 300 kv.m. hissəsi yanıb, bazarın qalan hissəsi yanğından mühafizə olunub. Hadisə yerinə Dövlət Yanğından Mühafizə Xidməti, Xüsusi Risqli Xilasetmə Xidməti, Mülki müdafiə qoşunları və Bakı Regional Mərkəzinin ümumilikdə 406 nəfər canlı qüvvəsi və 54 ədəd texnikası cəlb olunub. Onu da bildirək ki, bazar 2019-cu ilin dekabrında da, demək olar ki, tam yanmışdı.
Fövqəladə hallar naziri Kəmaləddin Heydərov sözügedən bazarda yenidən yanğının baş verməsini bazar rəhbərliyinin məsuliyyətsizliyi ilə izah edib:
“Ticarət mərkəzindəki əvvəlki yanğından sonra obyekt sahiblərinə və ümumilikdə rəhbərliyə xəbərdarlıq edilmişdi ki, təmir-bərpa işləri tam yekunlaşmamış mallar yerləşdirilməsin. Çünki işlər tam yekunlaşdıqdan sonra Fövqəladə Hallar Nazirliyi və müvafiq icra hakimiyyəti orqanı buna icazə verməlidir. Lakin görünən odur ki, ticarət mərkəzinin rəhbərliyi bu işə məsuliyyətsiz yanaşıb. Təmir işləri tam yekunlaşmamış, obyektin fəaliyyətinə tərəfimizdən tam razılıq verilməmiş mağazalara mallar yerləşdirilib. Nəticədə yenidən belə bir hadisə baş verib”.
K.Heydərov vurğulayıb ki, yanğının səbəbkarı haqqında hüquqi prosedur tətbiq olunacaq:
“Yanğının baş verməsinə səbəb olan hər bir şəxs barəsində qanuna müvafiq tədbirlər görüləcək. Artıq bu barədə hüquq-mühafizə orqanları əməkdaşlarına lazımi tapşırıqlar verilib”.
Qeyd edək ki, “EuroHome” tikinti materialları bazarının rəhbəri Samir Məmmədov təkrarən baş verən yanğının səbəblərini başqa cür əsaslandırıb. Onun sözlərinə görə, bazarda yanğından mühafizə olunmaq üçün bütün ehtiyat tədbirləri görülübmüş: “Bazarda nə elektrik naqilləri işləyib, nə qaz olub. Belə olan halda yanğın necə baş verə bilər? Mühafizəçimizin sözlərinə görə, yanğın bazarın arxasında yerləşən “TIR parkı”ndan başlayıb. Çox güman ki, onun dedikləri təsdiqlənər. Hazırda burada ciddi araşdırmalar gedir. Bu dəqiqə mən Baş Prokurorluğun müstəntiqlərinə ifadə verirəm”.
İş adamı Fövqəladə hallar naziri Kəmaləddin Heydərovun onu məsuliyyətsizlikdə suçlamasına da münasibət bildirib:“Düzdür, cənab nazir bizi məsuliyyətsizlikdə ittiham edir. Amma biz yanğından mühafizə üçün lazım olan hər şeyi etmişdik və bu məsələni tam şəkildə standartlara uyğunlaşdırmaq üçün şirkətlərlə müqavilə bağlamışıq. Dünən yanğının söndürülməsi üçün bazarda olan su ehtiyatından və digər köməkçi vasitələrdən istifadə olundu”.
Göründüyü kimi, bazar rəhbərliyi baş verən təkrar yanğınla bağlı ünvanlarına səslənən ittihamları qəbul etmək istəmir. Biz adətən görürük ki, baş verən analoji yanğın halları ilə bağlı daha çox bazarları işlədən sahibkarların məsuliyyətsilziyi üzə çıxır. Nəticədə məlum olur ki, aylıq baha qiymətə icarəyə verdikləri obyektlərin icarədarlarının heç birinin sığortası yoxdur. Yanan bazarlarda isə yanğından təhlükəsizlik qaydalarına, demək olar ki, əməl edilməyib. Sözügedən bazar birinci dəfə yananda biz bunun şahidi olduq. Deyilən qaydalara əməl edilmədiyi səbəbindən bazar, demək olar ki, külə döndü. Sonra şahidi olduq ki, orda tələsik işlər aparılır. Bazarın təmir edilməsi normaldır. Ancaq xüsusi icazəyə məhəl qoymadan, nə olursa-olsun daha çox pul toplayım prinsipi ilə işləməyin son aqibəti belə olur. Bir daha şahidi oluruq ki, qanunlara meydan oxumaq istəyən sahibkarların məsuliyyətsiz davranışlarının sonda ziyanı dövlətə və sadə vətəndaşlara dəyir.
Məhəmmədəli QƏRİBLİ
