Azərbaycan dövlətinin koronavirusla mübarizədə göstərdiyi həmrəylik nümunələri bütün dünya tərəfindən təqdir edilir. Ümumdünya Səhiyyə Təşkilatı ilə uzun illərdir səmərəli əməkdaşlıq edən ölkəmiz bu istiqamətdə üzərinə düşən işin hamısını layiqincə həyata keçirib.
AZƏRTAC-ın yaydığı məlumata görə, Azərbaycanla ÜST arasında donor sazişi imzalanıb.
Qoşulmama Hərəkatının sədri kimi Azərbaycan Respublikasının Prezidenti İlham Əliyev onun təşəbbüsü ilə cari il mayın 4-də keçirilmiş Hərəkatın COVID-19 virusu ilə mübarizəyə həsr olunmuş Zirvə görüşündə bu sahədə Qoşulmama Hərəkatının ən çox yardıma ehtiyacı olan üzv dövlətləri üçün Azərbaycan Hökuməti tərəfindən Ümumdünya Səhiyyə Təşkilatına ianənin ayrılmasını bəyan edib.
Mayın 11-də Ümumdünya Səhiyyə Təşkilatının Cenevrədəki baş qərargahında “Azərbaycan Respublikası ilə Ümumdünya Səhiyyə Təşkilatı (ÜST) arasında donor sazişi” imzalanıb.
Azərbaycan Respublikasının Cenevrədəki BMT bölməsi və digər beynəlxalq təşkilatlar yanında daimi nümayəndəsi səfir Vaqif Sadıqov və ÜST-in Baş direktoru Tedros Qebreyesus tərəfindən imzalanmış donor sazişi Azərbaycan tərəfindən ÜST-in “Strateji Hazırlıq və Cavab Planı” çərçivəsində “COVID-19 müraciəti” Fonduna 5 milyon ABŞ dolları məbləğində vəsaitin ayrılmasını və bu vəsaitin Azərbaycanla razılaşdırmaqla ən çox köməyə ehtiyacı olan Afrika, Asiya və Latın Amerikasında yerləşən Qoşulmama Hərəkatının üzv dövlətləri üçün istifadə edilməsini nəzərdə tutur.
Sənədin imzalanma mərasimi zamanı ÜST-in Baş direktoru Azərbaycan tərəfindən verilmiş bu qərarın çox təqdirəlayiq olduğunu vurğulayaraq, ölkəmizin səhiyyə sektoruna, xüsusilə hazırda COVID-19 virusuna qarşı beynəlxalq səviyyədə mübarizəyə yönəldiyi diqqət və qayğının yüksək qiymətləndirildiyini bildirib. Tedros Qebreyesus Azərbaycan tərəfindən COVID-19 virusu ilə mübarizə üçün ayrılmış könüllü maliyyə töhfəsinin qlobal həmrəyliyin nümunəvi nümayişi olduğunu diqqətə çatdıraraq, verilmiş qərara görə Azərbaycan Respublikasının Prezidentinə ÜST adından dərin minnətdarlığını ifadə edib.
Daimi nümayəndə V.Sadıqov, öz növbəsində, Azərbaycanın ÜST ilə əməkdaşlığa yüksək önəm verdiyini vurğulayıb və ölkəsi tərəfindən təşkilatın qlobal miqyasda COVID-19 virusuna qarşı mübarizə səylərinin yüksək qiymətləndirildiyini bildirərək, pandemiya ilə bağlı ÜST-in tövsiyələrinin Azərbaycan tərəfindən tətbiq edildiyini nəzərə çatdırıb.
Qeyd edək ki, BMT-nin ixtisaslaşmış qurumu kimi qlobal miqyasda beynəlxalq sağlamlığa cavabdeh olan Ümumdünya Səhiyyə Təşkilatı Azərbaycanın səhiyyə sahəsində əməkdaşlıq etdiyi əsas beynəlxalq tərəfdaşıdır. Azərbaycanın ÜST ilə əməkdaşlığı təşkilatın Cenevrədəki baş qərargahı və Kopenhagendəki ÜST-in Avropa üzrə Regional Ofisi vasitəsilə həyata keçirilir. Eyni zamanda, ÜST-in ölkəmizdə ofisi mövcuddur.
Azərbaycanla ÜST arasında imzalanan donor sazişinin nə kimi əhəmiyyəti var? Azərbaycanın ÜST-lə əlaqələri başqalarından nə ilə fərqlənir?
Qeyd edək ki, mütəxəssislər Azərbaycanla ÜST arasında donor sazişinin imzalanmasının böyük əhəmiyyətə malik olduğunu bildirirlər. Mütəxəssislərin fikrincə, Azərbaycanın koronavirusla qlobal mübarizədə göstərdiyi ümumbəşəri həmrəylik özü böyük bir nümunədir. Dövlətimiz ÜST-in bu yöndə çağırışlarına operativ reaksiya verməklə bir sıra dövlətlərdən üstün olduğunu sübut etdi. Onlar hesab edirlər ki, məlum sazişin imzalanması Azərbaycanla ÜST arasında əməkdaşlıq əlaqələrini daha da möhkəmləndirir.
“Bu donor sazişinin də, əslində, mahiyyəti odur ki, Azərbaycanın razılığı ilə həmin vəsait ehtiyacı olan ölkələrə...”
Tibb üzrə tanınmış mütəxəssis, professor Adil Qeybulla da “Bakı-Xəbər”ə donor sazişinin Azərbaycanın beynəlxalq aləmdə imicinə müsbət dividendlər gətirdiyini vurğuladı: “Bilirsiniz ki, Azərbaycan ÜST-in ölkəmizdəki missiyası ilə koronavirusla mübarizədə çox səmərəli əməkdaşlıq edib. Bununla yanaşı, bildiyiniz kimi, Azərbaycan pandemiya ilə mübarizəyə 5 milyon dollar civarında töhfə verib. Bu donor sazişinin də, əslində, mahiyyəti odur ki, Azərbaycanın razılığı ilə həmin vəsait ehtiyacı olan ölkələrə, xüsusən də Latın Amerikası ölkələrinə yardım kimi ayrılsın. Burada söhbət donor kimi çıxış edən təşkilatın, ölkənin razılığı ilə vəsaitin xərclənməsindən gedir. Təbii ki, bu həm də Azərbaycanın beynəlxalq təsisatlara inteqrasiyası baxımından da mühüm bir məsələdir”.
İradə SARIYEVA
