Son illər elmi ictimaiyyətdə Azərbaycan Milli Elmlər Akademiyası sistemində və ali məktəblərdə fəaliyyət göstərən müdafiə şuraları haqqında xoşagəlməz fikirlər dolaşır. Son zamanlar isə, ümumiyyətlə, müdafiə şuralarının fəaliyyətinin dayandırılması haqqında məlumatlar yayılıb. Hətta bu fakta tanınmış türkoloq-alim, professor Məmmədəli Qıpçaq (Novruzov) “Facebook”da yazdığı statusda toxunub. Görkəmli alimin yazdığına görə, iki ildir müdafiə şuraları ləğv olunub və fəaliyyət göstərmirlər.
Müdafiə şuraları niyə fəaliyyətini dayandırıb?
Ali Attestasiya Komissiyasının müdafiə şurasında təmsil olunan tanınmış professorlardan biri bizimlə söhbətində bildirdi ki, müdafiə şuralarının fəaliyyətinin dayandırılmasının müxtəlif səbəbləri var. Professor bildirdi ki, bütün müdafiə şuraları hələ karantindən çox əvvəl, Prezidentin elm haqqına məlum fərmanından sonra yenidən qurulmağa başlayıb. “AAK sistemi təzələndi və bir çox şuralar tam yeni tərkibdə yenidən açıldı. Amma karantinə görə proseslər yenidən dayandı. Hesab edirəm ki, karantin başa çatdıqdan sonra proses davam etdiriləcək” - deyə alim vurğuladı.
“Prezident İlham Əliyevin sərəncamı ilə Ali Attestasiya Komissiyası haqqında əsasnamə yeniləndi”
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov isə bizimlə söhbətində dedi ki, müdafiə şuralarının iki ildir fəaliyyət göstərməməsi ilə bağlı informasiya həqiqəti əks etdirmir. “Müdafiə şuralarının hansısa bir ixtisas üzrə fəaliyyəti dayandırıla bilər. Bu hal mümkündür. Bu da onunla bağlıdır ki, müdafiə şuralarında konkret şifrə üzrə mütəxəssislərin təmsil olunması əsas şərtdir. Ola bilsin, hansısa ixtisasla bağlı şifrə üzrə müdafiə şurasında elmlər doktoru olan mütəxəssislər olmasın. Bu səbəbdən də müdafiə şuraları formalaşmaya bilər. Amma, konkret olaraq, Azərbaycanda bütün ixtisaslar üzrə müdafiə şuralarının fəaliyyət göstərməməsi ilə bağlı məlumatlar həqiqəti əks etdirmir. Müdafiə şuraları fəaliyyət göstərirlər. Bilirsiniz ki, Prezident İlham Əliyevin sərəncamı ilə Ali Attestasiya Komissiyası haqqında əsasnamə yeniləndi, AAK-ın fəaliyyətini tənzimləyəcək hüquqi sənədlər qəbul edildi. Bundan sonra AAK qəbul olunan sənədlər üzərində öz işini qurmağa başladı. Amma məsələ burasındadır ki, müdafiə şuralarının müddəti var və müdafiə şuraları konkret müddət çərçivəsində fəaliyyət göstərirlər. Müddəti başa çatdıqdan sonra isə müdafiə şuraları yenidən təşkil olunur. Ola bilsin, hansısa bir ixtisas, sahə üzrə müdafiə şurası ləğv edilsin, hələ formalaşmasın. Bütövlükdə isə Azərbaycanda həm fəlsəfə doktorluğu, həm də elmlər doktorluğu üzrə müdafiə şuraları fəaliyyət göstərirlər və müdafiə şuralarında müdafiələr də həyata keçirilir”.
İ. Orucov qeyd etdi ki, Ali Attestasiya Komissiyasının yeni əsasnamə əsasında öz fəaliyyətini yenidən qurması nəticəsində hansısa sahə üzrə müdafiə şurasının buraxılması və onların yenidən formalaşdırılması məsələsi ola bilər, amma, bütövlükdə, ölkə üzrə müdafiə şuraları mövcuddur və işləyirlər.
İradə SARIYEVA
