Azərbaycanda koronavirusa yoluxma sayı getdikcə artır. Xəstələrin sayında ciddi artım var. Trend-in məlumatına görə, bunu Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı Nazirlər Kabineti yanında Operativ Qərargahın bu gün keçirilən brifinqində deyib.
R.Bayramlı qeyd edib ki, əsas yoluxma halları Bakı, Gəncə, Yevlax, Abşeron, Kürdəmir, Tovuz və Şirvanda aşkar edilib: “Yoluxma halları əsasən Gəncə və Abşeronun payına düşür. Gözlədiyimiz ikinci dalğa ola bilər. Statistik rəqəmlərə əsasən də ikinci dalğanı yaşayacağımızı gözləyirik”.
TƏBİB sədri qeyd edib ki, xəstə sayında olan artım vətəndaşların qaydalara məsuliyyətsiz yanaşmasının nəticəsidir.
R.Bayramlı əlavə edib ki, hazırda 771 nəfər aktiv xəstə var, 1620 nəfər sağalıb. Reanimasiya və intensiv terapiya şöbələrində 22 xəstə var, onun 9-u süni tənəffüs aparatına qoşulub.
Rusiyadan gələnlərdə də koronavirus aşkarlanıb
R.Bayramlı deyib ki, Rusiyadan yeni gələn həmvətənlərimiz arasında koronavirusa yoluxma faktı aşkarlanıb. Onun sözlərinə görə, ötən həftə ərzində Türkiyədən, Rusiyadan həmvətənlərimiz xüsusi reyslərlə ölkəmizə gətirilib. Onlar müvafiq hotellərdə yerləşdirilib və müayinələr aparılıb.
R.Bayramlı qeyd edib ki, Bakıda ümumi yoluxmaların böyük əksəriyyəti Nəsimi rayonunun payına düşür.
Yoluxma hallarının 19,8 faizi Yasamal rayonundadır.
Birlik sədri əlavə edib ki, yoluxanların 22 faizi 50-59, 18 faizi 30-39 yaşlıdır. Vəfat edənlərin 43 faizi 60-69 yaşlı insanlardır. Vəfat edənlər arasında 1 nəfər 40-49 yaş qrupuna aiddir. Həmin şəxsdə uzun müddət davam edən xroniki xəstəlik də olub.
Yeni məhdudiyyətlərlə bağlı Operativ Qərargaha müraciət ediləcək
“Təəssüflər olsun ki, əhalinin sıx toplaşdığı yerlərdə insanlar hələ də sosial məsafəni gözləmir, qoruyucu maskalardan istifadə etmirlər” deyən R.Bayramlının sözlərinə görə, bu baxımdan TƏBİB tərəfindən maarifləndirici broşüralar hazırlanıb.
R.Bayramlı qeyd edib ki, hər gün aparılan təhlil əsasında bayram günlərində və həftə sonlarında məhdudiyyətlərin tətbiq olunması üçün Operativ Qərargaha müraciət ediləcək.
Maska qıtlığı problemi yoxdur
R.Bayramlı deyib ki, maskalardan istifadə məcburi olduğu üçün maska qıtlığı problemi də yarana bilər, lakin hazırda belə bir problem yoxdur. Onun sözlərinə görə, bütün apteklər qoruyucu vasitələrlə, eləcə də maskalarla təmin edilib: “Təlimata uyğun olaraq, ev şəraitində də maskalar hazırlana və onlardan istifadə edilə bilər”.
TƏBİB sədrinin valideynlərə müraciəti...
TƏBİB sədri valideynlərə də müraciət edib. “Qarşıda qəbul imtahanlarının keçirilməsi gözlənilir. Biz valideynləri məsuliyyətli olmağa və onları imtahan binalarının qarşısında toplaşmamağa çağırırıq” deyən R.Bayramlının sözlərinə görə, artıq imtahanların keçirilməsi ilə bağlı təlimat hazırlanıb və yayımlanıb.
R.Bayramlı imtahanların həmin təlimat əsasında keçiriləcəyini söyləyib.
Xaricdən idxal olunan infeksiya göstəricisi - 9,1 faiz...
TƏBİB sədri qeyd edib ki, xaricdən idxal olunan infeksiya göstəricisi 9,1 faiz təşkil edib. Onun sözlərinə görə, xaricdən idxal edilən infeksiya ilə bağlı göstərici onu deməyə əsas verir ki, xaricdən gələn vətəndaşlar karantində saxlanılmalıdır.
Qeyd edilir ki, infeksiyanın yoluxma göstəricisi Bakı şəhəri üzrə 47,5, Gəncə-Qazax bölgəsi üzrə 13,6 faiz, Aran bölgəsi üzrə 10,2 faiz, Lənkəran üzrə 9,4 faizdir.
65 yaşdan yuxarılar üçün karantin rejimi yumşaldıla bilər
R.Bayramlı bildirib ki, qarşıdakı günlərdə yaşı 65-dən yuxarı olan şəxslər üçün karantin rejiminin yumşaldılması ilə bağlı qərar verilə bilər. Onun sözlərinə görə, bu məsələ gündəmdədir: “Qarşıdakı günlərdə bununla bağlı qərar veriləcək. Ancaq gənclərin böyükləri qorumaq üçün atacaqları addımlardan da çox şey asılıdır”.
Modul tipli xəstəxanalar gələcəkdə necə fəaliyyət göstərəcək...
“Modul tipli xəstəxanalar səhra hospitalları kimi istifadə edilə bilər. Bu xəstəxanaların hər biri mövcud xəstəxanalara təhkim olunub. Bunlar təhkim olunduğu xəstəxanaların infeksion şöbələri kimi fəaliyyət göstərəcəklər” R.Bayramlı deyib.
Onun sözlərinə görə, pandemiya bitdikdən sonra modul tipli xəstəxanaların aktuallığı bitməyəcək: “Lazım gəldikdə bu xəstəxanaları səhra xəstəxanalarına çevirə bilərik. Bu xəstəxanaların təchizatı da imkan verəcək ki, onları səhra hospitalları kimi istifadə edək”.
Qrup şəklində koronavirusa yoluxmalar müşahidə edilir
R.Bayramlı bildirib ki, koronavirus xəstəliyinin birinci mərhələsində yoluxma pərakəndə şəkildə qeydə alınırdı. Amma indi qrup şəklində yoluxmalar müşahidə edirik.
Onun sözlərinə görə, artıq yoluxma ilə bağlı sporadik hallara rast gəlinir: “Bu da yaxın təmasda olan insanların bir-biriləri ilə sosial məsafə gözləməməsi, qoruyucu maskalardan istifadə etməməsinin nəticəsidir. Buna görə də qrup şəklində yoluxmalar müşahidə edirik”
Böyük ticarət mərkəzləri mayın sonuna kimi açılmayacaq
R.Bayramlı qeyd edib ki, böyük ticarət mərkəzlərinin açılması ilə bağlı müzakirələr davam edir. Onun sözlərinə görə, böyük ticarət mərkəzlərinin mayın sonuna kimi açılması gözlənilmir: “Amma təbii ki, Nazirlər Kabineti yanında Operativ Qərargah bütün statistik göstəriciləri təhlil edərək bununla bağlı qərar verəcək. Ola bilsin ki, gələcək günlərdə ticarət mərkəzləri açılsın. Amma mərkəzlərin içində yoluxma sayını artıra bilən sahələrdə, məsələn, uşaqlar üçün əyləncə mərkəzlərində, qida bölmələrində məhdudiyyətlər qoyula bilər”.
Kafe və restoranlar nə vaxt açılacaq…
“Bu gün Nazirlər Kabineti yanında Operativ Qərargahda kafe və restoranların nə zaman açılacağı və hansı iş saatlarının tətbiq olunacağı məsələsi ilə bağlı müzakirələr aparılıb. Artıq müvafiq layihələr var” deyən R.Bayramlının sözlərinə görə, müzakirələr bu günlərdə də davam etdiriləcək: “Yəqin ki, qarşıdakı günlər ərzində bu məsələ açıqlanacaq. Bakıda və rayonlarda restoranların fəaliyyətə başlaması barədə qərarlar aparılan təhlillərə əsasən verilir. Biz bundan sonra onları çox uzun müddət bağlı saxlaya bilmərik. Sərt karantin dövründə biz infeksiyanın məhdudlaşmasına nail olduq. Tibb müəssisələrini səfərbər etdik, resurslarımızı yenilədik. Bundan sonrakı dövrdə isə açılma və epidemioloji vəziyyətin nəzarət altında saxlanılması üçün əvvəlcədən planlaşdırılmış tədbirlərin həyata keçirilməsi dövrüdür. Başqa sözlə, biz indi ikinci mərhələni yaşayırıq. Bütün bu mərhələlər üçün də hər bir sahə üzrə müvafiq qaydalar hazırlanıb. Əgər biz bu qaydalara əməl etsək, yoluxma olmayacaq və onun qarşısını alacayıq. Təbii ki, bu qaydalara əməl etməsək, sosial məsafəni gözləməsək, ikinci dalğa çox sərt şəkildə davam edə bilər”.
