Karantin rejimi qaydalarında da qoruyucu vasitələrdən istifadə zəruridir. İstifadə etməmək də bu qaydaları pozmaq deməkdir. Koronavirusdan qorunmaq üçün tibbi maska taxmağın məcburiliyi barədə dəfələrlə ictimaiyyətə çağırış edilib.
Aidiyyəti qurumlar əhaliyə tibbi maska olmadan evdən bayıra çıxmamağı tövsiyə edir. Hətta ölkə başçısı İlham Əliyev də bir neçə gün öncə çıxışında bildirib ki, xəstələnənlərin sayının sağalanların sayından çox olması kəskin artarsa, məcbur olub karantin rejimini əvvəlki vəziyyətə gətirəcəyik, sərtləşdirəcəyik, qaydaları pozanlara qarşı da daha ciddi cəza tədbirləri görüləcək: "Bəzi məsuliyyətsiz vətəndaşlar heç bir qaydalara əməl etmirlər, maska taxmırlar, məsafə saxlamırlar, özlərini elə aparırlar ki, sanki virus artıq məhv olub. Buna qətiyyən yol vermək olmaz. Ona görə bu adamlara qarşı ciddi tədbirlər görüləcək. Hamı bunu bilsin və nəticə çıxarsın. Biz imkan verə bilmərik ki, hansısa məsuliyyətsiz vətəndaşlara görə insanların həyatı risq altına düşsün. Koronavirusun yayılmaması üçün vətəndaşların şəxsi məsuliyyəti mühüm şərtdir. Maska taxmaq, məsafə saxlamaq, tez-tez əlləri yumaq, dezinfeksiya vasitələrindən istifadə etmək bir qayda olmalıdır. Mən bu gün bütün aidiyyəti orqanlara müraciət edərək deyirəm, cəza tədbirlərini sərtləşdirin. Biz vətəndaşları qorumalıyıq. Biz imkan verə bilmərik ki, hansısa intizamı pozan, məsuliyyətsiz adama görə vətəndaşlarımız xəstələnsin, ölsün”.
Pandemiyanın qarşısının alınması üçün qoyulan qaydalara əməl olunması vacibdır. Amma ölkə başçısının da vurğuladığı kimi, bəziləri bu qaydalara riayət etmir və özü ilə bərabər başqa insanların da həyatını risqə atır.
Qeyd edək ki, DİN bir daha əhaliyə müraciət edərək karantin rejimi qaydalarına, o cümlədən, sosial məsafə və gigiyena normalarına riayət edilməsinin vacibliyini xatırladıb.
DİN-in əhaliyə etdiyi müraciətdə qeyd olunur: “Son günlər koronavirusa yoluxma halları artıb. Bunun səbəbi ictimai yerlərdə tibbi maskalardan istifadə olunmaması və sosial məsafəyə əməl edilməməsidir. Vətəndaşlardan tələb olunur ki, evdən çıxarkən mütləq tibbi maskalardan istifadə etsinlər, qapalı yerlərdə, ictimai nəqliyyatda insanlarla ünsiyyətdə olduqda 2 metr məsafə saxlasınlar, ümumiyyətlə, karantin rejimi müddətində müəyyən edilmiş qaydalara ciddi əməl etsinlər”.
Onu da bildirək ki, mayın 8-dən etibarən polis bir çox yerdə vətəndaşlarda maskaların olub-olmadığını yoxlayır və karantin rejiminin pozulmasına görə məsuliyyət barədə xəbərdarlıq edir.
Hesab etmək olarmı ki, Prezidentin cəzaların sərtləşdirilməsi barədə haqlı tələbi artıq icra olunmağa başlayıb?
“Əhalinin şüurlu hissəsi, ictimai təşkilatlar bu cəhalətə qarşı ciddi mübarizə aparmalıdır”
Sosioloq Aytəkin Kamranqızı bildirdi ki, ölkə başçısının çağırışları cəmiyyət tərəfindən çox həssaslıqla qarşılanmalıdır: “Vətəndaşlardan rica edirik ki, dövlətin müəyyənləşdirdiyi qaydalara əməl etsinlər. Əgər maska taxılması, sosial məsafənin qorunması tələb olunursa, mütləq şəkildə bu qaydalar yerinə yetirilməlidir. Kütləvi toplaşma hallarından qaçmalıyıq. Vətəndaşlar bunları özlərinin və yaxınlarının sağlamlığı üçün etməlidirlər”.
Həmsöhbətimiz onu da əlavə etdi ki, bəzi insanlar xəstəliyin ciddiliyinin fərqində deyil: “Vətəndaşlara qaydalara riayət etməyi məsləhət görəndə isə əksəriyyəti "əşşi yalandır, xəstəlik, filan yoxdur”, ya da "Allah kərimdir, məni Allah qoruyacaq” deyirlər. İnsanların bir çoxu növbədə, mağazada biri-birilə nəfəs-nəfəsə söhbət edir, öpüşür, əl verir. Sanki qadağalara, xəbərdarlığa etinasızlığı qəhrəmanlıq hesab edirlər. Ona görə son günlər yoluxmaların sayı artmaqdadır. Belə bir davranışla qadağaları yumşaltmaq çox təhlükəlidir. Bu insanlara izah etmək lazımdır ki, təhlükə çox ciddidir. Lazım gələrsə, inzibati tədbirlərdən, cərimələrdən də istifadə etmək lazımdır. Camaatı evdə saxlamaq yox, onlara müasir dövrün tələb etdiyi davranış mədəniyyətini öyrətmək lazımdır.
Əhalinin şüurlu hissəsi, ictimai təşkilatlar bu cəhalətə qarşı ciddi mübarizə aparmalıdır. Əks halda, uzun müddət evdən eşiyə çıxmaq təhlükəli olacaq”.
Günel CƏLİLOVA
