Yeni növ koronavirus infeksiyası (COVID-19) ilə əlaqədar Azərbaycan Respublikası ərazisində tətbiq olunan xüsusi karantin rejiminin mərhələli yumşalma planına və mövcud sanitar-epidemioloji vəziyyətə uyğun olaraq "Bakı Metropoliteni"nin fəaliyyətinin 9 may 2020-ci il saat 06.00-dan etibarən bərpa edilməsinə dair qərar verilib.
Bu barədə baki-xeber.com Nazirlər Kabineti yanında Operativ Qərargaha istinadən xəbər verir.
"Bakı Metropoliteni" pandemiya dövründə fəaliyyətini Operativ Qərargahın tələb və qaydalarına, o cümlədən “İctimai nəqliyyatda koronavirus infeksiyasının profilaktikasına dair metodiki göstəriş”ə uyğun olaraq həyata keçirməlidir.
Eyni zamanda metro stansiyalarına yalnız yaşayış yerini SMS icazə ilə, “icaze.e-gov.az” portalında qeydiyyatdan keçməklə, xidməti vəsiqə və ya iş yeri barədə arayışla tərk edən sərnişinlərin girişinə icazə verilməlidir.
Sərnişinlərin metro stansiyası ərazisində, eləcə də qatarlarda qoruyucu maskalardan istifadəsi və sosial məsafəni gözləməsi mütləqdir.
"Metroya maskasız daxil olan sərnişinlərin cərimələnməsi "Bakı Metropoliteni"nin səlahiyyətində deyil". Trend-in məlumatına görə, bunu isə Nazirlər Kabineti yanında Operativ Qərargahın brifinqində "Bakı Metropoliteni" QSC-nin sədri Zaur Hüseynov bildirib.
Onun sözlərinə görə, bununla bağlı aidiyyəti qurumlar tədbir görə bilər: "Biz yalnız səlahiyyətimiz daxilində qaydalara uyğun fəaliyyət göstərəcəyik və qaydalara uyğun da nəzarət həyata keçirəcəyik".
Z.Hüseynov deyib ki, metro stansiyalarında sıxlığın aradan qaldırılması üçün bütün tədbirlər görüləcək. Onun sözlərinə görə, bununla bağlı stansiyalada sərnişinlərə nəzarət ediləcək: "Əgər sıxlığı aradan qaldırmaq mümkün olmasa, metronun fəaliyyəti yenidən bağlana bilər. Bu, istisna deyil. Amma biz çalışacağıq ki, sıxlığın aradan qaldırılması üçün bütün üsullardan istifadə edək".
İdarə Heyətinin sədr müavini Hidayət Məmmədov isə deyib ki, stansiyalar səhər saat 06: 00-dan gecə 00:00-a kimi fəaliyyət göstərəcək: "Qatarlar arasında interval uzadılmayacaq. Belə ki, interval 2 dəqiqə müəyyən edilib. Sıxlıq olarsa, qatarların qrafikində dəyişiklik edilə bilər. Hələlik mayın 9-u sıxlıq olması gözlənilmir. Amma olarsa, bu barədə tədbirlər görüləcək".
