Koronavirusla mübarizə tədbirləri çərçivəsində ölkəmizdə mövcud olan xüsusi karantin rejiminin yumşaldılması prosesi ilə bağlı Nazirlər Kabineti yanında Operativ Qərargah tərəfindən qərar verildikdən sonra bir sıra problemlər ortaya çıxıb. Yumşaldılma prosesindən vətəndaşların sui-istifadə etməsi hallarına yol verməsi nəticəsində respublika ərazisində yoluxma halları artıb. Bu da karantin rejiminin yenidən sərtləşdirilməsini, qanunu pozan vətəndaşlara qarşı daha sərt cəza tədbirlərinin həyata keçirilməsini gündəmə gətirib.
Mayın 7-də Bakıda modul tipli ilk xəstəxana kompleksinin açılışında çıxış edən Prezident İlham Əliyev karantin rejiminin qaydalarını pozan şəxslərə qarşı ciddi cəza tədbirlərinin həyata keçirilməli olduğunu qeyd edib: “…Əlbəttə, vətəndaşlar şəxsi gigiyenaya riayət etməlidirlər. Hesab edirəm ki, uzun müddət bundan sonra bu, bir növ, yeni reallıqdır və biz bu reallıqla barışmalıyıq, istəsək də, istəməsək də. Maska taxmaq, məsafə saxlamaq, gündə bir neçə dəfə sabunla əlləri yumaq, dezinfeksiya vasitələrindən istifadə etmək bir qayda olmalıdır. İndi bilirsiniz, biz bəzən özümüzü bir neçə ölkə ilə müqayisə edirik, deyirik, - bəli, mən də bu gün bunu deyirəm, - həqiqətdir ki, bir çox inkişaf etmiş ölkələrdə vəziyyət acınacaqlıdır, böhranlıdır. Azərbaycandan fərqli olaraq, o ölkələr bilmirlər ki, bu böhranla necə bacarsınlar. Amma, digər tərəfdən, biz görürük ki, o ölkələrdə, inkişaf etmiş ölkələrdə, məsuliyyət, nizam-intizam yüksək səviyyədə olan ölkələrdə insanlar məsafə saxlayırlar. Biz televiziyada görürük, növbə var, adamlar öz aralarında bir metr yarım, iki metr məsafə saxlayırlar, maska taxırlar. Amma bizdə məsafə saxlayan var? Açın istənilən kanala baxın. Dünən mən baxmışam, bankın qabağında bir-birinin yanında durublar, maska yox, müxbirlər soruşurlar ki, nə üçün? Elə bil ki, məktəb uşaqlarıdır, min cür bəhanə gətirirlər - yadımdan çıxdı, havada maska lazım deyil, cibimdədir. Biz belə münasibətə dözə bilmərik. Bu, zarafat deyil. Hər kəs bunu çox ciddi qəbul etməlidir. Belə adamlara qarşı ciddi cəza tədbirləri görüləcək. Mən bu gün bütün aidiyyəti orqanlara müraciət edərək deyirəm, cəza tədbirlərini sərtləşdirin. Biz vətəndaşları qorumalıyıq. Biz imkan verə bilmərik ki, hansısa intizamı pozan, məsuliyyətsiz adama görə vətəndaşlarımız xəstələnsin, ölsün. Ona görə bu qaydalara hər kəs riayət etməlidir, özü də bundan sonra uzun müddət ərzində...”.
“...bütün qurumlar düzgün nəticə çıxarmalıdırlar”
Prezident İlham Əliyevin karantin rejiminin qaydalarına əməl etməyənlərlə bağlı cəza tədbirlərinin sərtləşdirilməsi barədə aidiyyəti qurumlara xüsusi göstəriş verməsini təqdir edən Azərbaycanda Atatürk Mərkəzinin baş redaktoru Dəyanət Osmanlı bildirdi ki, digər vətəndaşların sağlamlığı üçün təhlükə törədən insanlarla bağlı cəzaların sərtləşdirilməsi vacibdir. “Cənab Prezident İlham Əliyevin vətəndaşların sağlamlığından dolayı narahatlıq ifadə edən bu göstərişini dəstəkləyirəm. Bu çox yerində və məqamında verilmiş qərardır. Son günlər koronavirusa yoluxanların sayının artması, əlbəttə ki, cəmiyyətdə narahatlıq doğurur. Dövlətimizin başçısının qaydaların sərtləşdirilməsi barədə xəbərdarlığı əbəs deyil. İnsanlar, eləcə də bütün qurumlar düzgün nəticə çıxarmalıdırlar. Doğrudan da real təhlükəyə saymazyana yanaşan bir cox vətəndaş var ki, onlar təkcə özləri üçün deyil, əksəriyyətin sağlamlığına problem yaratmış olur. Gündəlik olaraq müxtəlif məqamlarla rastlaşırıq. Təəssüf ki, bəzi hallarda yollarda yenə tıxaclar, qrup halında insanların hərəkəti, qoruyucu vasitələrdən istifadə olunmaması müşahidə olunmaqdadır. Əsasən də yaşlı vətəndaşlar qaydaları pozurlar, sanki heç nə vecinə deyil, yeri gəldi-gəlmədi, küçələrdə dolaşırlar. Onlar niyə qəbul etmək istəmirlər ki, hərəsi bir ailəyə bağlı olduqları halda, hələ çarəsi tapılmayan potensial xəstəlik təhlükəsini, ölümü evlərinə daşıyırlar”. D.Osmanlının fikrincə, sərtləşdirilən qaydaların tətbiqinə ictimai qurumlar və media da ciddi dəstək verməlidir. “Görünür, maarifləndirici tədbirləri və üsulları da artırmaq lazımdır. Qayda pozucuları anlamalıdırlar ki, fərd olaraq həm özlərini, həm ailələrini, həm də digərlərini düşünməlidirlər” - deyə D.Osmanlı bildirdi.
İradə SARIYEVA
