Azərbaycan dövlətinin pandemiyaya qarşı önləyici və məqsədyönlü mübarizə tədbirləri həyata keçirməsi nəticəsində dünyaya nümunə olan nailiyyətlər əldə edə bilmişik. Virusun ilk titrəyişlərinin hiss edildiyi dövrlərdən başlayaraq indiyə kimi ölkəmiz bu istiqamətdə genişşaxəli tədbirlər həyata keçirir və bu tədbirlərin də əsas məqsədi vətəndaşların sağlamlığını qorumaq, virusun təsirini sıfıra endirməkdir.
“…Yeni xəstəxanaların tikintisi, əlbəttə, gələcəyə hesablanıb. Çünki hazırda mövcud xəstəxana fondu bizim tələbatımızı ödəyir və 20-dən çox dövlət xəstəxanası koronavirus xəstələrinin sərəncamına verilibdir, o cümlədən, ən yeni və ən müasir 575 çarpayılıq “Yeni klinika”. Orada hazırda xəstələr müalicə olunurlar. Bu, gələcəyə hesablanmış düzgün addımdır, çünki heç kim bilmir pandemiya nə qədər davam edəcək, heç kim bilmir bunun gələcək mərhələləri nədən ibarət olacaq. Ona görə biz tam hazır olmalıyıq.
Bizim atdığımız bütün addımlar qabaqlayıcı xarakter daşıyır. Bu xəstəxananın və bundan sonra buna oxşar 9 xəstəxananın istifadəyə verilməsi 1-2 ay ərzində nəzərdə tutulub. Bütün bu addımlar qabaqlayıcı xarakter daşıyırdı və məhz buna görə hesab edirəm ki, koronavirusla mübarizədə biz birinci mərhələdə qalib gələ bilmişik. Ancaq mübarizə davam edir, koronavirus heç bir yerə qeyb olmayıb, dolaşır və dolaşacaq və bunu hər kəs bilməlidir”. Bu fikirləri mayın 7-də Bakıda modul tipli ilk xəstəxana kompleksinin açılışındakı çıxışında Prezident İlham Əliyev bildirib.
“…onlar koronavirusla mübarizənin birinci mərhələsindən böyük itki ilə çıxıblar”
Azərbaycan dövlətinin koronavirusla mübarizənin birinci mərhələsində qalib gəlməsi faktına şərh verən “Səs” qəzeti və eyniadlı informasiya agentliyinin rəhbəri, tanınmış siyasi icmalçı Bəhruz Quliyev bizimlə söhbətində bildirdi ki, Azərbaycan dövləti koronavirusla mübarizədə ortaya tamamilə fərqli bir mövqe, yanaşma qoyub: “Burada həm karantin rejiminin tətbiq edilməsini, eyni zamanda, sosial təcrid prosesinin, bunlardan əvvəl önləyici tədbirlərin həyata keçirilməsini və s. qeyd edə bilərəm. Bilirsiniz ki, koronavirusla mübarizə ilə bağlı dövlət tərəfindən xüsusi plan təsdiqləndi. Azərbaycan dövləti proqram şəklində konseptual olaraq öz vətəndaşını qorumaq üçün mərhələli şəkildə proqramlar həyata keçirdi. Bunun tərkibində bir sıra məsələlər vardı. Sosial izolyasiya dövründə evdə qalan insanlar, istər-istəməz, hansısa sosial problemlərlə qarşılaşa bilərdi. Bu təbii haldır. İnsanlar evdə qalarkən Azərbaycan dövləti onları minimal əməkhaqqı ilə təmin etmək məqsədilə maddi yardım proqramları həyata keçirdi. Əhalinin sosial cəhətdən zəif təbəqələrinə maddi yardımlar göstərilməsi prosesinə sahibkarların, ictimai qurumlatın cəlb edilməsi, eləcə də cənab Prezidentin təşəbbüsü və sərəncamı ilə Koronavirusla Mübarizəyə Dəstək Fondunun yaradılması, bu fonda sahibkarlar da daxil olmaqla, cəmiyyətin digər təbəqələrinin də maliyyə yardımları göstərməsi özü göstərdi ki, koronavirusla mübarizədə cəmiyyətin və dövlətin hədəfi birdir. Bütün bunlar da daxil olmaqla, verilən qərar və tapşırıqların icrası da göstərdi ki, mübarizədə hamı eyni mövqe nümayiş etdirə bildi. Ona görə də cənab Prezidentin dediyi kimi, biz koronavirusla mübarizənin birinci mərhələsini qələbə ilə başa vurduq. İtki sayını bütün dünya ölkələri ilə müqayisə etdikdə birmənalı şəkildə deyə bilərik ki, Azərbaycan pandemiya ilə mübarizənin birinci mərhələsini az itki ilə başa vurdu. Ümumiyyətlə, dövlətin məqsədi öz vətəndaşını qorumaqdır. Dəfələrlə demişəm, indi də deyirəm ki, dövlətin ən qiymətli sərvəti onun vətəndaşıdır. Görülən bütün tədbirlər öz vətəndaşının sağlamlığını qorumağa xidmət etdi. Ona görə də Azərbaycan modeli dünyada qəbul olundu. Azərbaycan həm də koronavirusla mübarizədə nümunəvi dövlət kimi özünü təsdiq etdi”.
B.Quliyev qeyd etdi ki, bu özünü həm vətəndaşların sosial dayanıqlığının təmin edilməsi üçün Azərbaycan dövlətinin həyata keçirdiyi çoxşaxəli sosial proqramların, həm də sosial izolyasiya tədbirlərinin və müxtəlif modul tipli xəstəxanaların inşasının, ayrı-ayrı böyük xəstəxanaların əsaslı təmir edilərək istifadəyə verilməsinin timsalında təsdiqlədi. “Virusun ortaya qoyduğu şərtlər daxilində dövlətin atdığı məqsədyönlü addımlar çox təqdirəlayiqdir və bu təkcə vətəndaşlar tərəfindən deyil, beynəlxalq aləm tərəfindən də çox yüksək qiymətləndirildi. Mübarizə tədbirləri kompleks şəkildə həyata keçirildi. Bir tərəfdən modul tipli xəstəxanaların tikintisinə qərar verildi, artıq onlardan birinin açılışı oldu. Digər tərəfdən, maska fabrikinin açılması, eyni zamanda da sosial izlolyasi, dezinfeksiya məsələsinin davam etdirilməsi, ailələrin sosial problemlərinin aradan qaldırılması istiqamətində görülən tədbirlər, sahibkarlara dəyən ziyanın ödənilməsi ilə bağlı verilən qərarlar, qəbul edilən proqramlar - bunların hər biri sırf yeni Azərbaycan modelini ortaya qoydu. Hadisələr göstərdi ki, Azərbaycan, sözün əsl mənasında, bu pandemiya ilə mübarizənin birinci mərhələsindən üzüağ, alnıaçıq çıxdı.
İkinci mərhələ bizə hansı şərtləri diqtə edir? Bilirsiniz ki, COVID-19 adlı bir pandemiya dünyaya özünün şərtlərini diqtə etdi və dünya ölkələri koronavirusun diqtə etdiyi şərtlər daxilində müəyyən işlər apardılar ki, virusla mübarizədə uduzmasınlar, ona qalib gəlsinlər.
Bəzi dövlətlər koronavirusla mübarizədə virusun diqtə etdiyi şərtlərə əməl etmədiklərinə, o şərtlərə qarşı ciddi mübarizə planı qurmadıqlarına görə çox böyük itki verdilər. Biz Azərbaycanla bir sıra ölkələri müqayisə etdikdə görürük ki, onlar koronavirusla mübarizənin birinci mərhələsindən böyük itki ilə çıxıblar. Amma Azərbaycanda isə karantin rejiminin yumşalma prosesi gedir və proses də mübarizənin birinci mərhələsinin başa çatdığına işarədir. Lakin vətəndaşlar öz məsuliyyətini dərk etməsə və dövlətin bu sahədə apardığı mübarizə tədbirlərinə dəstək verməsə, bu belə çıxır ki, artıq koronavirus pandemiyasının yenidən alovlanmasına xidmət edə, bunun nəticəsində də karantin rejiminin şərtləri yenidən sərtləşdirilə bilər. Ona görə ki, dövlətin əsas məqsədi vətəndaşların sağlamlığını, Azərbaycan ailəsini qorumaqdır. Bu nəticələr göstərsə ki, yoluxanların sayı get-gedə artır, onda dövlət məcbur olub karantin rejiminin sərtləşdirilməsi ilə bağlı addım atacaq” - deyə B.Quliyev vurğuladı.
İradə SARIYEVA
