1 iyun 2020-ci ildən tədrisin bərpası nəzərdə tutulmur, yəni həmin tarixdən dərslər başlamayacaq. “Trend”in məlumatına görə, bunu Nazirlər Kabineti yanında Operativ Qərargahın keçirdiyi brifinqdə Təhsil naziri Ceyhun Bayramov deyib.
Nazirin sözlərinə görə, Dövlət İmtahan Mərkəzi kütləvi tədbirlərin keçirilməsi ilə bağlı sənəd hazırlayaraq Nazirlər Kabinetinə təqdim edib. Yaxın günlərdə bu sənədin təsdiqi planlaşdırılır.
Bu il şagirdlərin qiymətləndirilməsi aparılmayacaq
Nazir bildirib ki, ümumtəhsil səviyyəsində 2019-2020-ci tədris ilinin ikinci yarımili üzrə şagirdlərin qiymətləndirilməsinin aparılması nəzərdə tutulmur. Nazirin sözlərinə görə, şagirdlər və müəllimlər arasında KSQ və BSQ kimi tanınan qiymətləndirmələrin aparılması nəzərdə tutulmur: “Şagirdlərin illik qiymətləndirilməsinin çıxarılması üçün 1-ci yarımil üzrə qiymətlər əsas götürüləcək və onun əsasında illik qiymətlər çıxarılacaq, bununla şagird növbəti sinfə keçiriləcək. Qiymətlərdən narazı qalan şagirdlər dərs ili öncəsi məktəblərə müraciət edərək qiymətlərini yaxşılaşdıra bilərlər”.
Ali məktəblərdə yay imtahan sessiyası iyun-iyul aylarında keçiriləcək
Naziri C.Bayramov deyib ki, ali məktəblərdə yay imtahan sessiyasının iyun-iyul ayları ərzində həyata keçirilməsi nəzərdə tutulur. Onun sözlərinə görə, bu il ali məktəblərdə tədris ilinin uzadılması nəzərdə tutulmur: “Bir sıra ixtisaslar üzrə imtahanlar onlayn formatda olacaq. Bu mümkün olmadıqda ənənəvi qaydada imtahanlar təşkil oluna bilər”.
Nazir əlavə edib ki, iyun-iyul aylarında imtahan sessiyasına hazır olmayan tələbələr bu barədə ali məktəbləri məlumatlandırmalıdırlar. Belə tələbələr üçün tədris ili öncəsi ayrıca imtahan sessiyası təşkil olunacaq.
Buraxılış imtahanında pandemiya ilə əlaqədar metodiki göstəriş nəzərə alınacaq
“İyunda buraxılış imtahanı zamanı pandemiya ilə əlaqədar metodiki göstərişi nəzərə alacağıq”. Bunu isə Dövlət İmtahan Mərkəzinin Direktorlar Şurasının sədri Məleykə Abbaszadə deyib.
Onun sözlərinə görə, imtahanlarda hər bir masa arxasında bir nəfər olacaq: “Onların arasında məsafə saxlanacaq. Bir auditoriyada 12-15 nəfər yer alacaq”.
M.Abbaszadə qeyd edib ki, imtahanlarda aprel-iyun ayları üzrə olan mövzular nəzərə alınmayacaq.
Qəbul imtahanları iyulun 20-dən sonra keçiriləcək
M.Abbaszadə bildirib ki, ali təhsil müəssisələrinə qəbul imtahanlarının 20 iyul tarixindən sonra 1 dəfə keçirilməsi nəzərdə tutulur. Onun sözlərinə görə, ali təhsil müəssisələrinə qəbul olunmaq üçün abituriyentlərin sənəd qəbulu onlayn şəkildə 12 may - 5 iyun tarixlərində aparılacaq.
Əvvəlki illərdə olduğu kimi, müsabiqə buraxılış və qəbul imtahanlarında toplanan ballar əsasında 700 ballıq şkala əsasında aparılacaq.
I-IV ixtisas qruplarının biri üzrə imtahanda iştirak etmiş abituriyentlər, eyni zamanda, V ixtisas qrupu üzrə müsabiqədə iştirak edə bilərlər (qabiliyyət imtahanında müvəffəqiyyət qazanmaq şərtilə).
Qəbul imtahanı proqramlarından martın 1-dən sonra tədris olunan mövzular (11-ci sinfə aid) çıxarılır və imtahanlarda həmin mövzuların qiymətləndirilməsi nəzərdə tutulmur.
Magistraturaya onlayn ixtisas seçimi qəbul planı təsdiq olunduqdan sonra aparılacaq.
Şagirdlər arasında ölçmələr aparılacaq
Təhsil naziri bildirib ki, gələn ay hər yaş qrupuna aid, seçmə yolla müəyyən edilən şagirdlər arasında ölçmələr aparılacaq. Nazirin sözlərinə görə, teledərslər vasitəsilə şagirdlərə ümumi məzmun çatdırılıb: “Növbəti ayda hər yaş qrupuna aid olan, seçmə şagirdlər arasında ölçmələr aparılacaq. Bunun əsasında proqramın mənimsəmə faizini daha dəqiq müəyyənləşdirəcəyik. Eyni zamanda, şagird və valideynlərə əlavə dəstək mexanizmləri təqdim edəcəyik”.
