Dünyada insan qənimi kimi hökmran rol oynayan COVİD-19 pandemiyasına qarşı ölkə başçısı İlham Əliyevin gördüyü təxirəsalinmaz tədbirlər respublikada öz müsbət nəticələrini göstərir.
Məhz buna görə də rayonların çoxunda karantin dövründəki məhdudiyyətlərin əsası hissəsi, demək olar, aradan qaldırılıb. Belə rayonlardan biri də Masallıdır. Amma burada bu bəla bütövlükdə respublikamızdan tam əlini üzməyincə bir sıra işlərin görülməsi qərara alınıb.
Belə ki, rayonda təzəlikcə “Karantin qaydalarının yumşaldılması karantin qaydalarının aradan qaldırılması deyil” adı altında mobil qruplar yaradılıb. Qrup RİH, YAP Masallı rayon təşkilatı, Heydər Əliyev Mərkəzi, rayon Polis Şöbəsi, Təhsil Şöbəsi, Gənclər və İdman İdarəsi, Gənclər evi, Gənclər İnkişaf və Karyera Mərkəzinin nümayəndələri və gənc könüllülər olmaqla 114 nəfərdən ibarətdir. Onlar 20 mobil qrupunda birləşir.
Artıq indiyə kimi Masallı şəhəri ərazisində mobil qrup 7024 nəfərlə maarifləndirici söhbət aparıb, ehtiyacı olanlara 239 ədəd tibbi maska verilib. Bundan əlavə, həm də şəhərdəki vacib obyektlərin divarlarına ümumilikdə 3900 ədəd metodik tövsiyədən ibarət lövhə yapışdırılıb. 2796 nəfərə isə metodik vərəq paylanıb.
Təbliğat işi hər gün öz əhatə dairəsini genişləndirir.
Zəfər ORUCOĞLU Azərbaycan Jurnalistlər Birliyinin üzvü
