Azərbaycanda koronavirus xəstələrinin bölgələr üzrə dəqiq təsnifatı açıqlanıb. İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev media nümayəndələrinə açıqlamasında qeyd edib ki, Yasamalda bir neçə ocaq müəyyənləşmişdi:
"Bir nəfər çoxlu sayda insanı yoluxdurmuşdu. Ümumilikdə, Yasamalda 22,7 %, Sabunçuda 14%, Binəqədidə 13,5%, Nəsimidə 12,6%, Xətaidə 7,7%, Nərimanovda 6,8%, Nizamidə 5,8%, Suraxanıda 5,3%, Xəzər rayonunda 4,5%, Qaradağda 3,5%, Səbaildə 2,8%, Pirallahıda isə 0,8 faiz yoluxma qeydə alınıb”.
Qeyd edildiyi kimi, koronavirusa ən çox yoluxma Yasamal və Sabunçu rayonlarında qeydə alınıb. Bu ərazilərdə qeyd olunan virusa yoluxma nə səbəbdən çoxdur?
“…həmin ərazilərdə yaşayan insanların karantin rejiminə əməl etməməsidir”
Məsələ ilə bağlı həkim-ekspert Rasif Bağırova müraciət etdik. O bizimlə söhbətində qeyd etdi ki, koronavirus bu günədək 5 qitədə yayılaraq 250 mindən çox insanın həyatına son qoyub. Azərbaycanda epidemiyanın qarşısının alınması aidiyyəti orqanların gördüyü tədbirlərin cəldliyi və effektivliyi nəticəsində mümkün olub: “Məlumdur ki, Amerika Birləşmiş Ştatları və Avropa virusun ən çox yayıldığı ərazilərdir ki, buna da səbəb bu dövlətlərin virusdan gec xəbər tutmaları və onun təhlükəsini gec anlamalarıdır. Azərbaycanda isə bunun əksinə olaraq, virus tapılandan üç gün ərzində müvafiq tədbirlər görülməyə başlanıb. Sərhədlər, habelə İranla sərhəd bağlanıb, insanların ictimai yerlərdə toplanması qadağan edilib, məktəblər bağlanıb, virus daşıyıcısı olmaqda şübhəli bilinən insanlar karantinə götürülüb. Beləliklə, Azərbaycanda epidemiyaya cəld reaksiya verilməsi virusla mübarizədə öz effektini göstərib”.
Həmsöhbətimiz vurğuladı ki, koronavirusun sürətli yayılmasının qarşısının alınması istiqamətində görülən işlərə rəğmən, virusa yoluxma hələ də qeydə alınır: “Açıqlanan məlumatlara görə, Bakıda virusa ən çox yoluxma Yasamal və Sabunçu ərazisində aşkar olunub. Bunun da səbəbi həmin ərazilərdə yaşayan insanların karantin rejiminə əməl etməməsidir”.
Günel CƏLİLOVA
