Dünyada koronavirus adlı bir kabus dolaşır. Bu xəstəlik vahiməli olduğu qədər də sirlidir. Hazırda onun vahid müalicə forması yoxdur. İndiki halda, bir neçə müalicə üsulundan istifadə olunur ki, o da bir xəstəyə müsbət təsir göstərdiyi halda, digərinə kömək etmir. Bir sözlə, bütün dünyada həkimlər bu xəstəliyin qarşısını almağa çalışsalar da, istəklərinə tam nail ola bilmirlər.
Hazırda koronavirusun müalicəsi üçün dərman və ya peyvəndin hazırlanması ilə məşğul olan alimlərin rəyinə görə, onlara ən azı bir-iki il vaxt gərəkdir. Çünki indiyədək heç yerdə belə bir virus müşahidə edilməyib. Xəstəliyin başlanğıcının bəzən gizli keçməsi, ətrafdakıların tez yoluxması, hər xəstə üçün bir cür müalicə üsulundan istifadə edilməsi işləri daha da çətinləşdirir.
Dünyanı bürüyən koronavirus təəssüf ki, ölkəmizə də gəlib çatdı.
Koronavirusun yarada biləcəyi fəsadların qarşısını almaq üçün Nazirlər Kabineti yanında Operativ Qərargah yaradılıb və fəaliyyət göstərir. Qabaqlayıcı tədbirlərin görülməsi məqsədilə bu sahə üzrə ekspertlərdən ibarət qrup formalaşdırıldı. Prezident İlham Əliyevin göstərişi ilə ölkənin bütün maddi resursları əhalinin sağlamlığının qorunmasına səfərbər edilib. Buraya 575 çarpayılıq "Yeni klinika”nın vaxtından əvvəl istifadəyə verilməsi, xaricdən müasir laboratoriyaların alınıb gətirilməsi, mövcud xəstəxanaların lazımi tibbi avadanlıqlarla təchizi də daxildir. Eyni zamanda, infeksiyaya yoluxmuş xəstələrin müalicəsinin səmərəli təşkili üçün modul tipli xəstəxanaların quraşdırılması məqsədilə dövlət tərəfindən böyük vəsait ayrılıb. Məlum olduğu kimi, Azərbaycanda koronavirus pandemiyası ilə mübarizənin gücləndirilməsi məqsədilə modul tipli xəstəxanaların tikintisinə başlanıb. Prezident İlham Əliyevin sərəncamı ilə “Azərbaycan Respublikasının 2020-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”ndə göstərilmiş məbləğin 14,8 milyon manatı ayrılıb.
Qeyd edək ki, ilk modul tipli xəstəxananın tikintisi başa çatmaq üzrədir. Bir neçə gündən sonra paytaxtda yerləşən yeni xəstəxana TƏBİB-ə təhvil veriləcək. Bu xəstəxana 200 koronavirus diaqnozlu pasienti qəbul edə biləcək.
Onu da bildirək ki, yaxın günlərdə təhvil veriləcək modul tipli xəstəxanada fəaliyyət göstərəcək tibbi personal da təlimlərini yekunlaşdırıb. Bu xəstəxanaların əsas missiyası koronavirus pandemiyası zamanı tibb müəssisələrinə və tibbi avadanlığa artan tələbatın qarşılanmasından ibarətdir.
Məlumat üçün vurğulayaq ki, tikiləcək modul tipli xəstəxanalar Abşeron, Sumqayıt və Bakıda inşa edilir. Artıq Gəncədə də modul tipli xəstəxananın inşasına start verilib. 45 günə istifadəyə verilməsi nəzərdə tutulan xəstəxana 100 palatadan ibarət olacaq.
Nazirlər Kabineti yanında Operativ Qərargahın mətbuat konfransında İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev bildirib ki, hazırda Azərbaycanda hökumət tərəfindən dövlət büdcəsindən ayrılan vəsaitlə 6, özəl şirkətlər tərəfindən isə 4 modul tipli xəstəxana tikilir: “Hər bir xəstəxana 200 çarpayıdan ibarət olacaq, bu isə əlavə 2000 çarpayı imkanı yaradacaq. Əgər yoluxma sayı daha çox olsa, biz bu xəstəxanalardan da istifadə edə biləcəyik. Yaxın zamanlarda, hətta 1-2 gün ərzində ilk modul tipli xəstəxananın açılışı gözlənir. İyun ayının ortalarına qədər digər xəstəxanaların da açılması nəzərdə tutulur. Bu həm Bakıda, həm də regionlarda olacaq. Həmin xəstəxanalara COVID-19 xəstələrini rahat yerləşdirə biləcəyik”.
Qeyd edək ki, modul tipli xəstəxanaların əsas üstünlükləri azməsrəfli olması, qısa müddət ərzində istənilən relyefdə quraşdırılmasıdır. Məqsəd koronavirus pandemiyasına qarşı mübarizə tədbirləri çərçivəsində tibb müəssisələrinə və tibbi avadanlığa artan tələbatın qarşılanması və infeksiyaya yoluxmuş xəstələrin müalicəsinin səmərəli təşkilidir.
TƏBİB-in İdarə Heyətinin sədri Ramin Bayramlı media nümayəndələrinə açıqlamasında bildirib ki, bu xəstəxanalar gözlənilməz hallara qarşı nəzərdə tutulub.
Mütəxəssislər qeyd edirlər ki, modul xəstəxanalar digər tibb müəssisələrinin başqa xəstəliklərdən əziyyət çəkən insanlara xidmət göstərməkdə davam etməsinə imkan verəcək.
Onu da bildirək ki, modul tipli xəstəxanalar pandemiya zamanı xəstəxanalara artan ehtiyacı ən qısa zamanda qarşılamaq üçün istifadə olunan çevik tibb infrastrukturudur. Tez quraşdırılan bu xəstəxanaları qısa bir zamanda da ləğv etmək mümkündür. Koronavirusun geniş yayıldığı Çində yoluxmanın sürətlə artmağa başladığı ilk dövrlərdə, fevralın əvvəlində ümumi sahəsi 25 min kvadratmetrdən çox olan bir neçə mobil xəstəxana qurulub. Martın 10-da isə artıq həmin xəstəxanalara ehtiyac qalmadığından bağlanıb. Qonşu Türkiyədə isə İstanbulda 2 belə xəstəxananın quraşdırılmasına başlanıb.
“Modul tipli xəstəxanaların əsas üstünlükləri azməsrəfli olması, qısa müddət ərzində istənilən relyefdə quraşdırılmasıdır”
Modul tipli xəstəxanaların üstünlükləri barədə danışan tibb elmləri doktoru, həkim-ekspert Adil Qeybulla bildirdi ki, Azərbaycanda hazırda koronavirusa qarşı müalicəni təşkil etmək üçün xəstəxanalar var: “Bakıda 4 xəstəxana ayrılıb. Həmçinin, regionlarda da xəstəxanalar ayrılıb. Modul xəstəxanaların qurulması ehtiyacı xəstələrin sayının artmasından doğur. Amma sərt tədbirlər görə bilsək, yəqin ki, qısa müddət ərzində infeksiyanın enmə tempini görə bilərik. Tədbirlər pozulsa, bu temp arta da bilər”.
Həmsöhbətimiz onu da əlavə etdi ki, modul tipli xəstəxanalar Bakı ilə yanaşı, bölgələrdə də qurulur: “Bakıda əhalinin sayının çox olduğu nəzərə alınıb, regionlarda da bu tip xəstəxanalar inşa edilir. Modul tipli xəstəxanaların bir çox üstünlüyü var. Onlardan biri qısa müddət ərzində inşa edilməsidir. Həmçinin, bu xəstəxanalar gözlənilməz hallara qarşı nəzərdə tutulub”.
Günel CƏLİLOVA
